Shiva Purana · Chapter 2.2.7

brahmovāca //
varaṃ dattvā mune tasmin śaṃbhāvaṃtarhite tadā //
saṃdhyāpyagacchattatraiva yatra medhātithirmuniḥ

tatra śaṃbhoḥ prasādena na kenāpyupalakṣitā //
sasmāra varṇinaṃ taṃ vai svopadeśakaraṃ tapaḥ

vasiṣṭhena purā sā tu varṇībhūtvā mahāmune //
upadiṣṭā tapaścartuṃ vacanātparameṣṭhinaḥ

tameva kṛtvā manasā tapaścaryopadeśakam //
patitvena tadā saṃdhyā brāhmaṇaṃ brahmacāriṇam

samiddhegnau mahāyajñe munibhirnopalakṣitā //
dṛṣṭā śaṃbhuprasādena sā viveśa vidheḥ sutā

tasyāḥ puroḍāśamayaṃ śarīraṃ tatkṣaṇāttataḥ //
dagdhaṃ puroḍāśagaṃdhaṃ tastāra yadalakṣitam

vahnistasyāḥ śarīraṃ tu dagdhvā sūryasya maṃḍalam //
śuddhaṃ praveśayāmāsa śaṃbhorevājñayā punaḥ

sūryo tryarthaṃ vibhajyātha taccharīraṃ tadā rathe //
svakeśaṃ sthāpayāmāsa prītaye pitṛdevayoḥ

tadūrddhvabhāgastasyāstu śarīrasya munīśvara//
prātassaṃdhyābhavatsā tu ahorātrādimadhyagā/९/
taccheṣabhāgastasyāstu ahorātrāṃtamadhyagā //
sā sāyamabhavatsaṃdhyā pitṛprītipradā sadā //2.2.7.१ ०//
sūryodayāttu prathamaṃ yadā syādaruṇodayaḥ //
prātassaṃdhyā tadodeti devānāṃ prītikāriṇī

astaṃ gate tataḥ sūryye śoṇapadmanibhe sadā //
udeti sāyaṃ saṃdhyāpi pitṝṇāṃ modakāriṇī

tasyāḥ prāṇāstu manasā śaṃbhunātha dayālunā //
divyena tu śarīreṇa cakrire hi śarīriṇaḥ

muneryajñāvasāne tu saṃprāpte muninā tu sā //
prāptā putrī vahnimadhye taptakāṃcanasuprabhā

tāṃ jagrāha tadā putrīṃ munurāmodasaṃyutaḥ //
yajñārthaṃ tāntu saṃsnāpya nijakroḍe dadhau mune

aruṃdhatī tu tasyāstu nāma cakre mahāmuniḥ //
śiṣyaiḥ parivṛtastatra mahāmodamavāpa ha

viruṇaddhi yato dharmaṃ sā kasmādapi kāraṇāt //
atastriloke viditaṃ nāma saṃprāpa tatsvayam

yajñaṃ samāpya sa muniḥ kṛtakṛtyabhāvamāsādya saṃpadayutastanayā pralaṃbhāt //
tasminnijāśramapade saha śiṣyavargaistāmeva satatamasau dayite surarṣe

atha sā vavṛdhe devī tasminmunivarāśrame //
candrabhāgānadītīre tāpasāraṇyasaṃjñake

saṃprāpte pañcame varṣe candrabhāgāṃ tadā guṇaiḥ //
tāpasāraṇyamapi sā pavitramakarotsatī

vivāhaṃ kārayāmāsustasyā brahmasutena vai //
vasiṣṭhena hyaruṃdhatyā brahmaviṣṇumaheśvarāḥ

tadvivāhe mahotsāho vabhūva sukhavarddhanaḥ//
sarve surāśca munayassukhamāpuḥ paraṃ muno/२२//
brahmaviṣṇumaheśānāṃ karanissṛtatoyataḥ //
saptanadyassamutpannāśśiprādyāssupavitrakāḥ

aruṃdhatī mahāsādhvī sādhvīnāṃ pravarottamā //
vasiṣṭhaṃ prāpya saṃreje medhātithisutā mune

yasyāḥ putrāssamutpannāḥ śreṣṭhāśśaktyādayaśśubhāḥ //
vasiṣṭhaṃ prāpya taṃ kāṃtaṃ saṃreje munisattamāḥ

evaṃ saṃdhyācaritraṃ te kathitaṃ munisattama //
pavitraṃ pāvanaṃ divyaṃ sarvakāmaphalapradam

ya idaṃ śṛṇuyānnārī puruṣo vā śubhavrataḥ //
sarvānkāmānavāpnoti nātra kāryā vicāraṇā

iti śrīśivamahāpurāṇe dvitīyāyāṃ rudrasaṃhitāyāṃ dvi- satīkhaṃḍe saptamo'dhyāyaḥ