Shiva Purana · Chapter 2.2.6

brahmovāca //
sutavarya mahāprājña śṛṇu saṃdhyātapo mahat //
yacchrutvā naśyate pāpasamūhastatkṣaṇāddhruvam

upaviśya tapobhāvaṃ vasiṣṭhe svagṛhaṃ gate //
saṃdhyāpi tapaso bhāvaṃ jñātvā modamavāpa ha

tatassānaṃdamanaso veṣaṃ kṛtvā tu yādṛśam //
tapaścartuṃ samārebhe bṛhallohitatīragā

yathoktaṃ tu vaśiṣṭhena maṃtraṃ tapasi sādhanam //
maṃtreṇa tena sadbhaktyā pūjayāmāsa śaṃkaram

ekāntamanasastasyāḥ kurvaṃtyā sumahattapaḥ //
śaṃbhau vinyastacittāyā gatamekaṃ caturyugam

prasannobhūttadā śaṃbhustapasā tena toṣitaḥ //
aṃtarbahistathākāśe darśayitvā nijaṃ vapuḥ

yadrūpaṃ ciṃtayaṃtī sā tena pratyakṣatāṃ gataḥ

atha sā purato dṛṣṭvā manasā ciṃtitaṃ prabhum //
prasannavadanaṃ śāṃtaṃ mumodātīva śaṃkaram

sasādhvasamahaṃ vakṣye kiṃ kathaṃ staumi vā haram //
iti ciṃtāparā bhūtvā nyamīlayata cakṣuṣī

nimīlitākṣyāstasyāstu praviśya hṛdayaṃ haraḥ //
divyaṃ jñānaṃ dadau tasyai vācaṃ divye ca cakṣuṣī

divyajñānaṃ divyacakṣurdivyā vācamavāpa sā //
pratyakṣaṃ vīkṣya durgeśaṃ tuṣṭāva jagatāṃ patim

//
saṃdhyovāca //
nirākāraṃ jñānagamyaṃ paraṃ yannaiva sthūlaṃ nāpi sūkṣmaṃ na coccam //
aṃtaściṃtyaṃ yogibhistasya rūpaṃ tasmai tubhyaṃ lokakartre namostu

sarvaṃ śāṃtaṃ nirmalaṃ nirvikāraṃ jñānāgamyaṃ svaprakāśe'vikāram //
khādhvaprakhyaṃ dhvāṃtamārgātparastadrūpaṃ yasya tvāṃ namāmi prasannam

ekaṃ śuddhaṃ dīpyamānaṃ tathājaṃ cidānaṃdaṃ sahajaṃ cāvikāri //
nityānaṃdaṃ satyabhūtiprasannaṃ yasya śrīdaṃ rūpamasmai namaste

vidyākārodbhāvanīyaṃ prabhinnaṃ sattvacchaṃdaṃ dhyeyamātmasvarūpam //
sāraṃ pāraṃ pāvanānāṃ pavitraṃ tasmai rūpaṃ yasya caivaṃ namaste

yattvākāraṃ śuddharūpaṃ manojñaṃ ratnākalpaṃ svacchakarpūragauram //
iṣṭābhītī śūlamuṃḍe dadhānaṃ hastairnamo yogayuktāya tubhyam

gaganaṃ bhūrdiśaścaiva salilaṃ jyotireva ca //
punaḥ kālaśca rūpāṇi yasya tubhyaṃ namostu te

pradhānapuruṣau yasya kāyatvena vinirgatau //
tasmādavyaktarūpāya śaṃkarāya namonamaḥ

yo brahmā kurute sṛṣṭiṃ yo viṣṇuḥ kurute sthitim //
saṃhariṣyati yo rudrastasmai tubhyaṃ namonamaḥ

namonamaḥ kāraṇakāraṇāya divyāmṛtajñānavibhūtidāya//
samastalokāṃtarabhūtidāya prakāśarūpāya parātparāya

yasyā'paraṃ no jagaducyate padāt kṣitirdiśassūrya iṃdurmanaujaḥ //
barhirmukhā nābhitaścāntarikṣaṃ tasmai tubhyaṃ śaṃbhave me namostu

tvaṃ paraḥ paramātmā ca tvaṃ vidyā vividhā haraḥ //
sadbrahma ca paraṃ brahma vicāraṇaparāyaṇaḥ

yasya nādirna madhyaṃ ca nāṃtamasti jagadyataḥ //
kathaṃ stoṣyāmi taṃ devaṃ vāṅmanogocaraṃ haram//

yasya brahmādayo deva munayaśca tapodhanāḥ //
na vipraṇvaṃti rūpāṇi varṇanīyaḥ kathaṃ sa me

striyā mayā te kiṃ jñeyā nirguṇasya guṇāḥ prabho //
naiva jānaṃti yadrūpaṃ sendrā api surāsurāḥ

namastubhyaṃ maheśāna namastubhyaṃ tamomaya //
prasīda śaṃbho deveśa bhūyobhūyo namostu te

brahmovāca //
ityākarṇya vacastasyāssaṃstutaḥ parameśvaraḥ //
suprasannataraścābhūcchaṃkaro bhaktavatsalaḥ

atha tasyāśśarīraṃ tu valkalājinasaṃyutam //
paricchannaṃ jaṭāvrātaiḥ pavitre mūrdhni rājitaiḥ

himānītarjitāṃbhojasadṛśaṃ vadanaṃ tadā //
nirīkṣya kṛpayāviṣṭo haraḥ provāca tāmidam

maheśvara uvāca //
prītosmi tapasā bhadre bhavatyāḥ parameṇa vai //
stavena ca śubhaprājñe varaṃ varaya sāṃpratam

yena te vidyate kāryaṃ vareṇāsminmanogatam //
tatkariṣye ca bhadraṃ te prasannohaṃ tava vrataiḥ

brahmovāca //
iti śrutvā maheśasya prasannamanasastadā //
saṃdhyovāca suprasannā praṇamya ca muhurmuhuḥ

saṃdhyovāca // //
yadi deyo varaḥ prītyā varayogyāsmyahaṃ yadi //
yadi śuddhāsmyahaṃ jātā tasmātpāpānmaheśvara

yadi deva prasavro'si tapasā mama sāṃpratam //
vṛtastadāyaṃ prathamo varo mama vidhīyatām

utpannamātrā deveśa prāṇinosminnabhaḥ sthale //
na bhavaṃtu samenaiva sakāmāssaṃbhavaṃtu vai

yaddhi vṛttā hi lokeṣu triṣvapi prathitā yathā //
bhaviṣyāmi tathā nānyā vara eko vṛto mayā

sakāmā mama sṛṣṭistu kutracinna patiṣyati //
yo me patirbhavennātha sopi me'tisuhṛcca vai

yo drakṣyati sakāmo māṃ puruṣastasya pauruṣam //
nāśaṃ gamiṣyati tadā sa ca klībo bhaviṣyati /

brahmovāca //
iti śrutvā vacastasyaśśaṃkaro bhaktavatsalaḥ //
uvāca suprasannātmā niṣpāpāyāstayerite

maheśvara uvāca //
śṛṇu devi ca saṃdhye tvaṃ tvatpāpaṃ bhasmatāṃ gatam //
tvayi tyakto mayā krodhaḥ śuddhā jātā tapaḥkarāt

yadyadvṛtaṃ tvayā bhadre dattaṃ tadakhilaṃ mayā//
suprasannena tapasā tava saṃdhye vareṇa hi

prathamaṃ śaiśavo bhāvaḥ kaumārākhyo dvitīyakaḥ //
tṛtīyo yauvano bhāvaścaturtho vārddhakastathā

tṛtīye tvatha saṃprāpte vayobhāge śarīriṇaḥ//
sakāmāssyurdvitīyāṃto bhaviṣyati kvacit kvacit

tapasā tava maryādā jagati sthāpitā mayā //
utpannamātrā na yathā sakāmāssyuśśarīriṇaḥ

tvaṃ ca loke satībhāvaṃ tādṛśaṃ samavāpnuhi //
triṣu lokeṣu nānyasyā yādṛśaṃ saṃbhaviṣyati

yaḥ paśyati sakāmastvāṃ pāṇigrāhamṛte tava //
sa sadyaḥ klībatāṃ prāpya durbalatvaṃ gamiṣyati

patistava mahābhāgastaporūpasamanvitaḥ //
saptakalpāṃtajīvī ca bhaviṣyati saha tvayā

iti te ye varā mattaḥ prārthitāste kṛtā mayā //
anyacca te vadiṣyāmi pūrvajanmani saṃsthitam

agnau śarītyāgaste pūrvameva pratiśrutaḥ //
tadupāyaṃ vadāmi tvāṃ tatkuruṣva na saṃśayaḥ

sa ca medhātithiryajñe mune dvādaśavārṣike //
kṛtsnaprajvalite vahnāvacirāt kriyatāṃ tvayā

etacchailopatyakāyāṃ caṃdrabhāgānadītaṭe //
medhātithirmahāyajñaṃ kurute tāpasāśrame

tatra gatvā svayaṃ chaṃdaṃ munibhirnnopalakṣitā //
matprasādādvahnijātā tasya putrī bhaviṣyasi

yaste varo vāñchanīyaḥ svāmī manasi kaścana //
taṃ nidhāya nijasvāṃte tyaja vahnau vapuḥ svakam

yadā tvaṃ dāruṇaṃ saṃdhye tapaścarasi parvate //
yāvaccaturyugaṃ tasya vyatīte tu kṛte yuge

tretāyāḥ prathame bhāge jātā dakṣasya kanyakā //
vākpāśśīlasamāpannā yathā yogyaṃ vivāhitāḥ

tanmadhye sa dadau kanyā vidhave saptaviṃśatiḥ //
candro'nyāssaṃparityajya rohiṇyāṃ prītimānabhūt/
taddhetorhi yadā candraśśapto dakṣeṇa kopinā //
tadā bhavatyā nikaṭe sarve devāssamāgatāḥ

na dṛṣṭāśca tvayā saṃdhye te devā brahmaṇā saha //
mayi vinyastamanasā khaṃ ca dṛṣṭvā labhetpunaḥ

caṃdrasya śāpamokṣārthaṃ jātā caṃdranadī tadā//
sṛṣṭā dhātrā tadaivātra medhātithirupasthitaḥ

tapasā satsamo nāsti na bhūto na bhaviṣyati//
yena yajñassamārabdho jyotiṣṭomo mahāvidhiḥ

tatra prajvalito vahnistasmintyaja vapuḥ svakam //
supavitrā tvamidānīṃ saṃpūrṇostu paṇastava

etanmayā sthāpitante kāryārthaṃ bho tapasvini//
tatkuruṣva mahābhāge yāhi yajñe mahāmuneḥ /
tasyāhitaṃ ca deveśastatraivāṃtaradhīyata

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe saṃdhyācaritravarṇanaṃ nāma ṣaṣṭho'dhyāyaḥ