Shiva Purana · Chapter 2.2.4

nārada uvāca//
viṣṇuśiṣya mahāprājña vidhe lokakara prabho //
adbhuteyaṃ kathā proktā śivalīlāmṛtānvitā

tataḥ kimabhavattāta caritaṃ tadvadādhunā //
ahaṃ śraddhānvitaḥ śrotuṃ yadi śambhukathāśrayam

//
brahmovāca //
śaṃbhau gate nijasthāne vedhasyaṃtarhite mayi //
dakṣa prāhātha kaṃdarpaṃ saṃsmaran mama tadvacaḥ //

//
dakṣa uvāca //
maddehajeyaṃ kaṃdarpa sadrūpaguṇasaṃyutā //
enāṃ gṛhṇīṣva bhāryārthaṃ bhavatassadṛśīṃ guṇaiḥ

eṣā tava mahā tejāssarvadā sahacāriṇī //
bhaviṣyati yathākāmaṃ dharmato vaśavartinī

brahmovāca //
ityuktvā pradadau tasyai dehasvedāṃbusambhavām //
kaṃdarppāyāgrataḥ kṛtvā nāma kṛtvā ratīti tām

vivāhya tāṃ smarassopi mumodātīva nārada //
dakṣajāṃ tanayāṃ ramyāṃ munīnāmapi mohinīm

atha tāṃ vīkṣya madano ratyākhyāṃ svastriyaṃ śubhām //
ātmā guṇena viddhosau mumoha ratiraṃjitaḥ

kṣaṇapradā'bhavatkāṃtā gaurī mṛgadṛśī mudā //
lolāpāṃgyatha tasyaiva bhāryā ca sadṛśī ratau

tasyā bhrūyugalaṃ vīkṣya saṃśayaṃ madanokarot //
utsādanaṃ matkodaṇḍaṃ vidhātrāsyāṃ niveśitam

kaṭākṣāṇāmāśugatiṃ dṛṣṭvā tasyā dvijottama//
āśu gantuṃ nijāstrāṇāṃ śraddadhe na ca cārutām

tasyāḥ svabhāvasurabhidhīraśvāsānilaṃ tathā //
āghrāya madanaḥ śraddhāṃ tyaktavān malayāṃtike // १२ /
pūrṇendusadṛśaṃ vaktraṃ dṛṣṭvā lakṣmasulakṣitam //
na niścikāya madano bhedaṃ tanmukhacandrayoḥ

suvarṇa padmakalikātulyaṃ tasyāḥ kucadvayam //
reje cūcukayugmena bhramareṇeva veṣṭitam

dṛḍhapīnonnataṃ tasyāstanamadhyaṃ vilaṃbinīm //
ānābhipratalaṃ mālāṃ tanvīṃ candrāyitāṃ śubhām

jyāṃ puṣpadhanuṣaḥ kāmaḥ ṣaṭpadāvalisaṃbhramām //
visasmāra ca yasmāttāṃ visṛjyaināṃ nirīkṣate

gambhīranābhiraṃdhrāṃtaścatuḥpārśvatvagādṛtam //
ānanābje'kṣaṇadvaṃdvamāraktakaphalaṃ yathā

madhyena vapuṣā nisargāṣṭāpadaprabhā //
rukmavedīva dadṛśe kāmena ramaṇī hi sā

raṃbhāstaṃbhāyataṃ snigdhaṃ yadūruyugalaṃ mṛdu //
nijaśaktisamaṃ kāmo vīkṣāṃcakre manoharam

āraktapārṣṇipādāgraprāṃtabhāgaṃ padadvayam //
anurāgamivā'nena mitraṃ tasyā manobhavaḥ

tasyāḥ karayugaṃ raktaṃ nakharaiḥ kiṃśukopamaiḥ //
vṛttābhiraṃgulībhiśca sūkṣmāgrābhirmanoharam

tadbāhuyugulaṃ kāṃtaṃ mṛṇālayugalāyatam //
mṛdu snigdhaṃ ciraṃ rājatkāṃtilohapravālavat

nīlanīradasaṃkāśaḥ keśapāśo manoharaḥ //
camarīvāla bharavadvibhāti sma smarapriyaḥ

etādṛśīṃ ratiṃ nāmnā prāleyādrisamudbhavām//
gaṃgāmiva mahādevo jagrāhotphullalocanaḥ

cakrapadmāṃ cārubāhuṃ mṛṇālaśakalānvitām //
bhrūyugmavibhramavrātatanūrmiparirājitām

kaṭākṣapātatuṃgaughāṃ svīyanetrotpalānvitām //
tanulomāṃbuśaivālāṃ manodrumavilāsinīm

nimnanābhihradāṃ kṣāmāṃ sarvāṃgaramaṇīyikām //
sarvalāvaṇyasadanāṃ śobhamānāṃ ramāmiva

dvādaśābharaṇairyuktāṃ śṛṃgāraiḥ ṣoḍaśairyutām //
mohanīṃ sarvalokānāṃ bhāsayaṃtīṃ diśo daśa

iti tāṃ madano vīkṣya ratiṃ jagrāha sotsukaḥ //
rāgādupasthitāṃ lakṣmīṃ hṛṣīkeśa ivottamām

novāca ca tadā dakṣaṃ kāmo modabhavāttataḥ //
vismṛtya dāruṇaṃ śāpaṃ vidhidattaṃ vimohitaḥ

tadā mahotsavastāta babhūva sukhavarddhanaḥ //
dakṣaḥ prītataraścāsīnmumude tanayā mama

kāmotīva sukhaṃ prāpya sarvaduḥkhakṣayaṃ gataḥ //
dakṣajāpi ratiḥ kāmaṃ prāpya cāpi jaharṣa ha

rarāja cetayāsārddhaṃ bhinnaścāruvacaḥ smaraḥ //
jīmūta iva saṃdhyāyāṃ saudāmanyā manojñayā

iti ratipatiruccairmohayukto ratiṃ tāṃ hṛdupari jagṛhe vai yogadarśīva vidyām //
ratirapi patimagryaṃ prāpya sā cāpi reje harimiva kamalā vai pūrṇacandropamāsyā

iti śrīśivamahāpurāṇe dvitīyāyāṃ rudrasaṃhitāyāṃ dvitī- sa० kāmavivāhavarṇanaṃ nāma caturtho'dhyāyaḥ