Shiva Purana · Chapter 2.2.5

sūta uvāca//
ityākarṇya vacastasya brahmaṇo munisattamaḥ //
sa mudovāca saṃsmṛtya śaṃkaraṃ prītamānasaḥ

nārada uvāca // //
brahman vidhe mahābhāga viṣṇuśiṣya mahāmate //
adbhutā kathitā līlā tvayā ca śaśimaulinaḥ

gṛhītadāre madane hṛṣṭe hi svagṛhe gate //
dakṣe ca svagṛhaṃ yāte tathā hi tvayi kartari

mānaseṣu ca putreṣu gateṣu svasvadhāmasu //
saṃdhyā kutra gatā sā ca brahmaputrī pitṛprasūḥ

kiṃ cakāra ca kenaiva puruṣeṇa vivāhitā //
etatsarvaṃ viśeṣeṇa saṃdhyāyāścaritaṃ vada

sūta uvāca //
ityākarṇya vacastasya brahmaputraśca dhīmataḥ //
saṃsmṛtya śaṃkaraṃ saktyā brahmā provāca tattvavit

brahmovāca //
śṛṇu tvaṃ ca mune sarvaṃ saṃdhyāyāścaritaṃ śubham //
yacchrutvā sarvakāminyassādhvyassyussarvadā mune

sā ca saṃdhyā sutā me hi manojātā purā' bhavat //
tapastaptvā tanuṃ tyaktvā saiva jātā tvaruṃdhatī

medhātithessutā bhūtvā muniśreṣṭhasya dhīmatī //
brahmaviṣṇumaheśānavacanāccaritavratā

vavre patiṃ mahātmānaṃ vasiṣṭhaṃ śaṃsitavratam //
pativratā ca mukhyā'bhūdvaṃdyā pūjyā tvabhīṣaṇā

nārada uvāca//
kathaṃ tayā tapastaptaṃ kimarthaṃ kutra saṃdhyayā//
kathaṃ śarīraṃ sā tyaktvā'bhavanmedhātitheḥ sutā/////
kathaṃ vā vihitaṃ devairbrahmaviṣṇuśivaiḥ patim/
vasiṣṭhaṃ tu mahātmānaṃ saṃvavre śaṃsitavratam

etanme śroṣyamāṇāya vistareṇa pitāmaha//
kautūhalamaruṃdhatyāścaritaṃ brūhi tattvataḥ

/
brahmovāca //
ahaṃ svatanayāṃ saṃdhyāṃ dṛṣṭvā pūrvamathātmanaḥ//
kāmāyāśu mano'kārṣaṃ tyaktvā śivabhayācca sā

saṃdhyāyāścalitaṃ cittaṃ kāmabāṇaviloḍitam //
ṛṣīṇāmapi saṃruddhamānasānāṃ mahātmanām

bhargasya vacanaṃ śrutvā sopahāsaṃ ca māṃ prati //
ātmanaścalitatvaṃ vai hyamaryādamṛṣīnprati

kāmasya tādṛśaṃ bhāvaṃ munimohakaraṃ muhuḥ//
dṛṣṭvā saṃdhyā svayaṃ tatropayamāyātiduḥkhitā

/
tatastu brahmaṇā śapte madane ca mayā mune//
aṃtarbhūte mayi śive gate cāpi nijāspade

āmarṣavaśamāpannā sā saṃdhyā munisattama//
mama putrī vicāryaivaṃ tadā dhyānaparā'bhavat

dhyāyaṃtī kṣaṇamevāśu pūrvaṃ vṛttaṃ manasvinī //
idaṃ vimamṛśe saṃdhyā tasminkāle yathocitam

saṃdhyovāca //
utpannamātrāṃ māṃ dṛṣṭvā yuvatīṃ madaneritaḥ //
akārṣitsānurāgoyamabhilāṣaṃ pitā mama

/
paśyatāṃ mānasānāṃ ca munīnāṃ bhāvitātmanām//
dṛṣṭvaiva māmamaryādaṃ sakāmamabhavanmanaḥ

mamāpi mathitaṃ cittaṃ madanena durātmanā //
yena dṛṣṭvā munīnsarvāṃścalitaṃ manmano bhṛśam

phalametasya pāpasya madanassvayamāptavān//
yastaṃ śaśāpa kupitaḥ śaṃbhoragre pitāmahaḥ

prāpnuyāṃ phalametasya pāpasya svaghakāriṇī //
tacchodhanaphalamahamāśu necchāmi sādhanam

yanmāṃ pitā bhrātaraśca sakāmamaparokṣataḥ //
dṛṣṭvā cakrusspṛhāṃ tasmānna mattaḥ pāpakṛtparā

mamāpi kāmabhāvobhūdamaryādaṃ samīkṣya tān //
patyā iva svaketāte sarveṣu sahajeṣvaṣi

kariṣyāramyasya pāpasya prāyaścittamahaṃ svayam//
ātmānamagnau hoṣyāmi vedamārgānusārata

kiṃ tvekāṃ sthāpayiṣyāmi maryādāmiha bhūtale //
utpannamātrā na yathā sakāmāssyuśśarīriṇaḥ

etadarthamahaṃ kṛtvā tapaḥ parama dāruṇam //
maryādāṃ sthāpayiṣyāmi paścāttyakṣāmi jīvitam

yasmiñccharīre pitrā me hyabhilāṣassvayaṃ kṛtaḥ//
bhātṛbhistena kāyena kiṃcinnāsti prayojanam

mayā yena śarīreṇa tāteṣu sahajeṣu ca //
udbhāvitaḥ kāmabhāvo na tatsukṛtasādhanam

iti saṃcitya manasā saṃdhyā śailavaraṃ tataḥ //
jagāma candrabhāgākhyaṃ candrabhāgāpagā yataḥ

atha tatra gatāṃ jñātvā saṃdhyāṃ girivaraṃ prati //
tapase niyatātmānaṃ brahmāvocamahaṃ sutam

vaśiṣṭhaṃ saṃyatātmānaṃ sarvajñaṃ jñānayoginam //
samīpe sve samāsīnaṃ vedavedāṅgapāragam

brahmovāca //
vasiṣṭha putra gaccha tvaṃ saṃdhyāṃ jātāṃ manasvinīm//
tapase dhṛtakāmāṃ ca dīkṣasvaināṃ yathā vidhi

maṃdākṣamabhavattasyāḥ purā dṛṣṭvaiva kāmukān//
yuṣmānmāṃ ca tathātmānaṃ sakāmāṃ munisattama

abhūtapūrvaṃ tatkarma pūrva mṛtyuṃ vimṛśya sā //
yuṣmākamātmanaścāpi prāṇānsaṃtyaktumicchati

samaryādeṣu maryādāṃ tapasā sthāpayiṣyati //
tapaḥ kartuṃ gatā sādhvī candrabhāgākhyabhūdhare

na bhāvaṃ tapasastāta sānujānāti kaṃcana//
tasmādyathopadeśātsā prāpnotviṣṭaṃ tathā kuru

idaṃ rūpaṃ parityajya nijaṃ rūpāṃtaraṃ mune //
parigṛhyāṃtike tasyāstapaścaryāṃ nidarśayan

idaṃ svarūpaṃ bhavato dṛṣṭvā pūrvaṃ yathātra vām //
nāpnuyātsā'tha kiṃcidvai tato rūpāṃtaraṃ kuru

brahmovāca //nāradetthaṃ vasiṣṭho me samājñapto dayāvatā //
yathā'sviti ca māṃ procya yayau saṃdhyāṃtikaṃ muniḥ

tatra devasaraḥ pūrṇaṃ guṇairmānasasaṃmitam //
dadarśa sa vasiṣṭotha saṃdhyāṃ tattīragāmapi/

tīrasthayā tayā reje tatsaraḥ kamalojjvalam //
udyadiṃdusunakṣatra pradoṣe gaganaṃ yathā

munirdṛṣṭvātha tāṃ tatra susaṃbhāvāṃ sa kautukī //
vīkṣāṃcakre sarastatra bṛhallohitasaṃjñakam

candrabhāgā nadī tasmātprākārāddakṣiṇāṃbudhim //
yāṃtī sā caiva dadṛśe tena sānugirermahat

nirbhidya paścimaṃ sā tu candrabhāgasya sā nadī //
yathā himavato gaṃgā tathā gacchati sāgaram

tasmin girau candrabhāge bṛhallohitatīragām //
saṃdhyāṃ dṛṣṭvātha papraccha vasiṣṭhassādaraṃ tadā

vaśiṣṭha .uvāca //
kimarthamāgatā bhadre nirjanaṃ tvaṃ mahīdharam //
kasya vā tanayā kiṃ vā bhavatyāpi cikīrṣitam

etadicchāmyahaṃ śrotuṃ vada guhyaṃ na cedbhavet //
vadanaṃ pūrṇacandrābhaṃ niśceṣṭaṃ vā kathaṃ tava

brahmovāca //
tacchrutvā vacanaṃ tasya vaśiṣṭhasya mahātmanaḥ //
dṛṣṭvā ca taṃ mahātmānaṃ jvalaṃtamiva pāvakam

śarīradhṛgbrahmacaryaṃ vilasaṃtaṃ jaṭādharam //
sādaraṃ praṇipatyātha saṃdhyovāca tapodhanam

saṃdhyovāca //
yadarthamāgatā śailaṃ siddhaṃ tanme nibodha ha //
tava darśanamātreṇa yanme setsyati vā vibho

tapaścartumahaṃ brahmannirjanaṃ śailamāgatā //
brahmaṇohaṃ sutā jātā nāmnā saṃdhyeti viśrutā

yadi te yujyate sahyaṃ māṃ tvaṃ samupadeśaya //
etaccikīrṣitaṃ guhyaṃ nānyaiḥ kiṃcana vidyate

ajñātvā tapaso bhāvaṃ tapovanamupāśritā //
ciṃtayā pariśuṣyehaṃ vepate hi mano mama

brahmovāca //
ākarṇya tasyā vacanaṃ vasiṣṭho brahmavittamaḥ //
svayaṃ ca sarvakṛtyajño nānyatkiṃcana pṛṣṭavān

atha tāṃ niyatātmānaṃ tapaseti dhṛtodyamām //
provāca manasā smṛtvā śaṃkaraṃ bhaktavatsalam

vasiṣṭha uvāca //
paramaṃ yo mahattejaḥ paramaṃ yo mahattapaḥ //
paramaḥ paramārādhyaḥ śambhurmanasi dhāryatām

dharmārthakāmamokṣāṇāṃ ya ekastvādikāraṇam //
tamekaṃ jagatāmādyaṃ bhajasva puruṣottamam

maṃtreṇānena deveśaṃ śambhuṃ bhaja śubhānane //
tena te sakalā vāptirbhaviṣyati na saṃśayaḥ

ॐ namaśśaṃkarāyeti ॐmityaṃtena santatam //
maunatapasyāprāraṃmbhaṃ tanme nigadataḥ śṛṇu

snānaṃ maunena kartavyaṃ maunena harapūjanam //
dvayoḥ pūrṇajalāhāraṃ prathamaṃ ṣaṣṭhakālayoḥ

tṛtīye ṣaṣṭhakāle tu hyupavāsaparo bhavet //
evaṃ tapassamāptau vā ṣaṣṭhe kāle kriyā bhavet

evaṃ maunatapasyākhyā brahmacaryaphalapradā //
sarvābhīṣṭapradā devi satyaṃsatyaṃ na saṃśayaḥ

evaṃ citte samuddiśya kāmaṃ ciṃtaya śaṃkaram //
sa te prasanna iṣṭārthamacirādeva dāsyati

brahmovāca //
upaviśya vasiṣṭhotha saṃdhyāyai tapasaḥ kriyām //
tāmābhāṣya yathānyāyaṃ tatraivāṃtardadhe muniḥ

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe saṃdhyācaritravarṇano nāma paṃcamo'dhyāyaḥ

//
[http://purushottama.yolasite.com/Saptami-uttara.php
sandhyayopari ṭippaṇī
]