Shiva Purana · Chapter 2.2.39

brahmovāca //
kṣuvasya hitakṛtyena dadhīcasyāśramaṃ yayau//
viprarūpamathāsthāya bhagavān bhaktavatsalaḥ १//
dadhīcaṃ prāha viprarṣimabhivaṃdya jagadguruḥ//
kṣuvakāryyārthamudyuktaśśaivendraṃ chalamāśritaḥ

viṣṇuruvāca //
bho bho dadhīca viprarṣe bhavārcanaratāvyaya //
varamekaṃ vṛṇe tvattastadbhavān dātumarhati

brahmovāca //
yācito devadevena dadhīcaśśaivasattamaḥ //
kṣuvakāryārthinā śīghraṃ jagāda vacanaṃ harim

dadhīca uvāca //
jñātaṃ tavepsitaṃ vipra kṣuvakāryārthamāgataḥ //
bhagavān viprarūpeṇa māyī tvamasi vai hariḥ

bhūtaṃ bhaviṣyaṃ deveśa vartamānaṃ janārdana //
jñānaṃ prasādādrudrasya sadā traikālikaṃ mama

tvāṃ jānehaṃ hariṃ viṣṇuṃ dvijatvaṃ tyaja suvrata //
ārādhito'si bhūpena kṣuveṇa khalabuddhinā

jāne tavaiva bhagavan bhaktavatsalatāṃ hare //
chalaṃ tyaja svarūpaṃ hi svīkuru smara śaṃkaram

asti cetkasyacidbhītirbhavārcanaratasya me //
vaktumarhasi yatnena satyadhāraṇapūrvakam

vadāmi na mṛṣā kvāpi śivasmaraṇasaktadhīḥ //
na bibhemi jagatyasmindevadaityādikādapi

viṣṇuruvāca // //
bhayaṃ dadhīca sarvatra naṣṭaṃ ca tava suvrata //
bhavārcanarato yasmādbhavānsarvajña eva ca

bibhemīti sakṛdvaktumarhasi tvaṃ namastava //
niyogānmama rājendra kṣuvāt pratisahasya ca

brahmovāca //
evaṃ śrutvāpi tadvākyaṃ viṣṇossa tu mahāmuniḥ //
vihasya nirbhayaḥ prāha dadhīcaśśaivasattamaḥ

dadhīca uvāca ///
na bibhemi sadā kvāpi kutaścidapi kiṃcana //
prabhāvāddevadevasya śaṃbhossākṣātpinākinaḥ

brahmovāca //
tatastasya muneḥ śrutvā vacanaṃ kupito hariḥ //
cakramudyamya saṃtasthau didhakṣumunisattamam

abhavatkuṃṭhitaṃ tatra vipre cakraṃ sudāruṇam //
prabhāvācca tadīśasya nṛpatessaṃnidhāvapi

dṛṣṭvā taṃ kuṃṭhitāsyaṃ taccakraṃ viṣṇuṃ jagāda ha //
dadhīcassasmitaṃ sākṣātsadasadvyakti kāraṇam

dadhīca uvāca // //
bhagavan bhavatā labdhaṃ purātīva sudāruṇam //
sudarśanamiti khyātaṃ cakraṃ viṣṇoḥ prayatnataḥ //
bhavasya tacchubhaṃ cakraṃ na jighāṃsati māmiha

bhagavānatha kruddho'smai sarvāstrāṇi kramāddhariḥ //
brahmāstrādyaiḥ śaraiścāstraiḥ prayatnaṃ kartumarhasi

brahmovāca //
sa tasya vacanaṃ śrutvā dṛṣṭvā nirvīryyamānuṣam //
sasarjātha krudhā tasmai sarvāstrāṇi kramāddhariḥ

cakrurdevāstatastasya viṣṇossāhāyyamādarāt //
dvijenaikena saṃyoddhuṃ prasṛtasya vibuddhayaḥ

cikṣipuḥ svāni svānyāśu śastrāṇyastrāṇi sarvataḥ //
dadhīcopari vegena śakrādyā haripākṣikāḥ

kuśamuṣṭimathādāya dadhīcassaṃsmaran śivam //
sasarja sarvadevebhyo vajrāsthi sarvato vaśī

śaṃkarasya prabhāvāttu kuśamuṣṭirmunerhi sā //
divyaṃ triśūlamabhavat kālāgnisadṛśaṃ mune

dagdhuṃ devān matiṃ cakre sāyudhaṃ saśikhaṃ ca tat //
prajvalatsarvataśśaivaṃ yugāṃtāgryadhikaprabham

nārāyaṇendumukhyaistu devaiḥ kṣiptāni yāni ca //
āyudhāni samastāni praṇemustriśikhaṃ ca tat // २६ /
devāśca dudruvussarve dhvastavīryā divaukasaḥ //
tasthau tatra harirbhītaḥ kevalaṃ māyināṃ varaḥ

sasarja bhagavān viṣṇuḥ svadehātpuruṣottamaḥ //
ātmanassadṛśān divyān lakṣalakṣāyutān gaṇān

te cāpi yuyudhustatra vīrā viṣṇugaṇāstataḥ //
muninaikena devarṣe dadhīcena śivātmanā

tato viṣṇugaṇān tānvai niyudhya bahuśo raṇe //
dadāha sahasā sarvān dadhī caśśaiva sattamaḥ

tatastadvismayāthāya dadhīcesya munerhariḥ //
viśvamūrtirabhūcchīghraṃ mahāmāyāviśāradaḥ

tasya dehe hareḥ sākṣādapaśyaddvijasattamaḥ //
dadhīco devatādīnāṃ jīvānāṃ ca sahasrakam

bhūtānāṃ koṭayaścaiva gaṇānāṃ koṭayastathā //
aṃḍānāṃ koṭayaścaiva viśvamūtastanau tadā

dṛṣṭvaitadakhilaṃ tatra cyāvanissatataṃ tadā //
viṣṇumāha jagannāthaṃ jagatstu vamajaṃ vibhum

dadhīca uvāca //
māyāṃ tyaja mahābāho pratibhāso vicārataḥ //
vijñātāni sahasrāṇi durvijñeyāni mādhava

mayi paśya jagatsarvaṃ tvayā yuktamataṃdritaḥ //
brahmāṇaṃ ca tathā rudraṃ divyāṃ dṛṣṭiṃ dadāmi te

// brahmovāca //
ityuktvā darśayāmāsa svatanau nikhilaṃ muniḥ //
brahmāṃḍaṃ cyāvaniśśaṃbhutejasā pūrṇadehakaḥ

dadāha viṣṇuṃ deveśaṃ dadhīcaśśaivasattamaḥ //
saṃsmarañ śaṃkaraṃ citte vihasan vibhayassudhīḥ

dadhīca uvāca //
māyayā tvanayā kiṃ vā maṃtraśaktyātha vā hare //
satkāmāyāmimāṃ tasmādyoddhumarhasi yatnataḥ

brahmovāca //
etacchutvā munestasya vacanaṃ nirbhayastadā//
śaṃbhutejomayaṃ viṣṇuścukopātīva taṃ munim

devāśca dudruvurbhūyo devaṃ nārāyaṇaṃ ca tam //
yoddhukāmāśca muninā dadhīcena pratāpinā

etasminnaṃtare tatrāgamanmatsaṃgataḥ kṣuvaḥ //
avārayaṃtaṃ niśceṣṭaṃ padmayoniṃ hariṃ surān

niśamya vacanaṃ me hi brāhmaṇo na vinirjitaḥ //
jagāma nikaṭaṃ tasya praṇanāma muniṃ hariḥ

kṣuvo dīnataro bhūtvā gatvā tatra munīśvaram //
dadhīcamabhivādyaiva prārthayāmāsa viklavaḥ

kṣuva uvāca //
prasīda muniśārdūla śivabhaktaśiromaṇe //
prasīda parameśāna durlakṣye durjanaissaha

brahmovāca//
ityākarṇya vacastasya rājñassuragaṇasya hi //
anujagrāha taṃ vipro dadhīcastapasāṃ nidhiḥ

atha dṛṣṭvā rameśādīn krodhavihvalito muniḥ //
hṛdi smṛtvā śivaṃ viṣṇuṃ śaśāpa ca surānapi

dadhīca uvāca //
rudrakopāgninā devāssadeveṃdrā munīśvarāḥ //
dhvastā bhavaṃtu devena viṣṇunā ca samaṃ gaṇaiḥ

// brahmovāca // //
evaṃ śaptvā surān prekṣya kṣuvamāha tato muniḥ //
devaiśca pūjyo rājendra nṛpaiścaiva dvijottamaḥ

brāhmaṇā eva rājendra balinaḥ prabhaviṣṇavaḥ //
ityuktvā sa sphuṭa vipraḥ praviveśa nijāśramam

dadhīcamabhivaṃdyaiva kṣuvo nijagṛhaṃ gataḥ //
viṣṇurjagāma svaṃ lokaṃ suraissaha yathāgatam

tadevaṃ tīrthamabhavat sthāneśvara iti smṛtam //
sthāneśvaramanuprāpya śivasāyujyamāpnuyāt

kathitastava saṃkṣepādvādaḥ kṣuvadadhīcayoḥ //
nṛpāptaśāpayostāta brahmaviṣṇvoḥ śivaṃ vinā

ya idaṃ kīttayennityaṃ vādaṃ kṣuvadadhīcayoḥ //
jitvāpamṛtyuṃ dehānte brahmalokaṃ prayāti saḥ //

raṇe yaḥ kīrtayitvedaṃ praviśettasya sarvadā //
mṛtyubhītibhavennaiva vijayī ca bhaviṣyati

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe viṣṇudadhīcayuddhavarṇano nāma navatriṃśo'dhyāyaḥ