Shiva Purana · Chapter 2.2.40

// nārada ucāca //
vidhe vidhe mahāprājñā śaivatattvapradarśaka //
śrāvitā ramaṇīprāyā śivalīlā mahādbhutā

vīreṇa vīrabhadreṇa dakṣayajñaṃ vināśya vai //
kailāsādrau gate tāta kimabhūttadvadādhunā

// brahmovāca //
atha devagaṇāssarve munayaśca parājitāḥ //
rudrānīkairvibhinnāṃgā mama lokaṃ yayustadā

svayaṃbhuve namaskṛtya mahyaṃ saṃstūya bhūriśaḥ //
tatsvakleśaṃ viśeṣeṇa kārtsyenaiva nyavedayan

tadākarṇya tatohaṃ vai putraśokena pīḍitaḥ //
acintayamativyagro dūyamānena cetasā

kiṃ kāryyaṃ kāryamadyāśu mayā devasukhāvaham //
yena jīvatu dakṣāsau makhaḥ pūrṇo bhavetsuraḥ

evaṃ vicārya bahudhā nālabhaṃ śamahaṃ mune //
viṣṇuṃ tadā smaran bhaktyā jñānamāptaṃ tadocitam

atha devaiśca munibhirviṣṇorlokamahaṃ gataḥ //
natvā nutvā ca vividhaisstavairduḥkhaṃ nyavedayam

yathādhvaraḥ prapūrṇaḥ syāddeva yajñakaraśca saḥ //
sukhinassyussurāssarve munayaśca tathā kuru

deva deva ramānātha viṣṇo devasukhāvaha //
vayaṃ tvaccharaṇaṃ prāptāssadevamunayo dhruvam

// brahmovāca //
ityākarṇya vaco me hi brahmaṇassa rameśvaraḥ //
pratyuvāca śivaṃ smṛtvā śivātmā dīnamānasaḥ

// viṣṇuruvāca //
tejīyasi na sā bhūtā kṛtāgasi bubhūṣatām //
tatra kṣemāya bahudhā bubhūṣā hi kṛtāgasām

kṛtapāpāssurā sarve śive hi parameśvare //
parādaduryajñabhāgaṃ tasya śaṃbhorvidhe yataḥ

prasādayadhyaṃ sarve hi yūyaṃ śuddhena cetasā //
athāparaprasādaṃ taṃ gṛhītāṃghriyugaṃ śivam

yasmin prakupite deve vinaśyatyakhilaṃ jagat //
salokapālayajñasya śāsanājjīvitaṃ drutam

tamāśu devaṃ priyayā vihīnaṃ ca duruktibhiḥ //
kṣamāpayadhvaṃ hṛdviddhaṃ dakṣeṇa sudurātmanā

ayameva mahopāyastacchāṃtyai kevalaṃ vidhe //
śaṃbhossaṃtuṣṭaye manye satyamevoditaṃ mayā

nāhaṃ na tvaṃ surāścānye munayopi tanūbhṛtaḥ //
yasya tattvaṃ pramāṇaṃ ca na vidurbalavīryayoḥ

ātmataṃtrasya tasyāpi parasya paramātmanaḥ //
ka upāyaṃ vidhitsedvai paraṃ mūḍhaṃ virodhinam

caliṣyehamapi brahman sarvaiḥ sārddha śivālayam //
kṣamāpayāmi giriśaṃ kṛtāgāśca śive dhuvam

// brahmovāca //
itthamādiśya viṣṇurmāṃ brahmāṇaṃ sāmarādikam //
sārddhaṃ devermatiṃ cakre tadgirau gamanāya saḥ

yayau svadhiṣṇya nilayaṃ śivasyādrivaraṃ śubham //
kailāsaṃ sāmaramuniprajeśādimayo hariḥ

atipriyaṃ prabhornityaṃ sujuṣṭaṃ kinnarādibhiḥ //
naretarairapsarobhiryogasiddhaimahonnatam

nānāmaṇimayaiśśṛṃgaiḥ śobhamānaṃ samaṃtataḥ //
nānādhātuvicitraṃ vai nānādrumalatākulam //

nānāmṛgagaṇākīrṇaṃ nānāpakṣisamanvitam //
nānājalaprasravaṇairamaraissiddhayoṣitām

ramaṇaivāharaṃtīnāṃ nānākaṃdara sānubhiḥ //
drumajātibhiranyābhī rājitaṃ rājataprabham

vyāghrādibhirmahāsattvairnirghuṣṭaṃ krūratojjhitam //
sarvaśobhānvitaṃ divyaṃ mahāvismayakārakam

paryastaṃ gaṃgayā satyā sthānapuṇyatarodayā //
sarvapāvanasaṃkartryā viṣṇupadyā sunirmalam ///

evaṃvidhaṃ giriṃ dṛṣṭvā kailāsākhyaṃ śivapriyam //
yayuste vismayaṃ devā viṣṇvādyāssamunīśvarāḥ

tassamīpe'lakāṃ ramyāṃ dadṛśurnāma te purīm //
kuberasya mahādivyāṃ rudramitrasya nirjarāḥ

vanaṃ saugaṃdhikaṃ cāpi dadṛśustatsamīpataḥ //
sarvadrumānvitaṃ divyaṃ yatra tannādamadrutam

tadbāhyatastasya divye saritāvatipāvane //
naṃdā cālakanaṃdā ca darśanātpāpahārike//

papuḥ surastriyo nityamavagūhya svalokataḥ //
vigāhya puṃbhistāstatra krīḍaṃti ratikarśitāḥ

hitvā yakṣeśvarapurīṃ vanaṃ saugaṃdhikaṃ ca yat//
gacchaṃtaste surā ārāddadṛśuśśāṃkaraṃ vaṭam

paryak kṛtācalacchāyaṃ pādona viṭapāya tam //
śatayojana kotsedhaṃ nirnīḍaṃ tāpavarjjitam

mahāpuṇyavatāṃ dṛśyaṃ suramyaṃ cātipāvanam //
śaṃbhuyogasthalaṃ divyaṃ yogisevyaṃ mahottamam ///

mumukṣuśaraṇe tasmin mahāyogamaye vaṭe //
āsīnaṃ dadṛśussarve śivaṃ viṣṇvādayassurāḥ

vidhiputrairmahāsiddhaiśśiva bhaktirataissadā //
upāsyamānaṃ sumudā śāṃtaissaṃśāṃtavigrahaiḥ

tathā sakhyā kubereṇa bhartrā guhyakarakṣasām //
sevyamānaṃ viśeṣeṇa svagaṇairjñātibhissadā

tāpasābhīṣṭasadrūpaṃ bibhrataṃ parameśvaram //
vātsalyādviśvasuhṛdaṃ bhasmādisuvirājitam

mune tubhyaṃ pravocaṃtaṃ pṛcchate jñānamuttamam //
kuśāsane sūpaviṣṭaṃ sarveṣāṃ śṛṇvatāṃ satām

kṛtvorau dakṣiṇe savyaṃ caraṇaṃ caiva jānuni //
bāhuprakoṣṭhākṣamālaṃ sthitaṃ sattarkamudrayā

evaṃvidhaṃ śivaṃ dṛṣṭvā tadā viṣṇvādayassurāḥ //
praṇemustvaritaṃ sarve karau badhvā vinamrakāḥ

upalabhyāgataṃ rudro mayā viṣṇuṃ satāṃ gatiḥ //
utthāya cakre śirasābhivaṃdanamapi prabhuḥ

vaṃditāṃghristadā sarvairdivyairviṣṇvādibhiśśivaḥ //
nanāmātha yathā viṣṇuṃ kaśyapaṃ lokasadgatiḥ

surasiddhagaṇādhīśamaharṣisu namaskṛtam//
samuvāca surairviṣṇuṃ kṛtasannatimādarāt

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe śivadarśanavarṇanaṃ nāma catvāriṃśodhyāyaḥ