Shiva Purana · Chapter 2.2.38

// sūta uvāca // //
ityākarṇya vacastasya vidheramitadhīmataḥ //
papraccha nāradaḥ prītyā vismitastaṃ dvijottamaḥ

// nārada uvāca // //
śivaṃ vihāya dakṣasya surairyajñaṃ harirgataḥ //
hetunā kena tad brūhi yatrāvajñā' bhavattataḥ

jānāti kiṃ sa śaṃbhuṃ no hariḥ pralayavikramam //
raṇaṃ kathaṃ ca kṛtavān tadgaṇairabudho yathā

eṣa me saṃśayo bhūyāṃstaṃ chiṃdhi karuṇānidhe //
caritaṃ brūhi śaṃbhostu cittotsāhakaraṃ prabho

brahmovāca //
dvijavarya śṛṇu prītyā caritaṃ śaśimaulinaḥ //
yatpṛcchate kurvataśca sarvasaṃśayahārakam

dadhīcasya muneḥ śāpādbhraṣṭajñāno hariḥ purā //
sāmaro dakṣayajñaṃ vai gataḥ kṣuvasahāyakṛt

// nārada uvāca //
kimarthaṃ śaptavānviṣṇuṃ dadhīco munisattamaḥ //
kopākāraḥ kṛtastasya hariṇā tatsahāyinā

brahmovāca //
samutpanno mahātejā rājā kṣuva iti smṛtaḥ//
abhūnmitraṃ dadhīcasya munīndrasya mahāprabhoḥ

cirāttapaḥprasaṃgādvai vādaḥ kṣuvadadhīcayoḥ//
mahānarthakaraḥ khyātastrilokeṣvabhavatpurā

tatra trivarṇataḥ śreṣṭho vipra eva na saṃśayaḥ //
iti prāha dadhīco hi śivabhaktastu vedavit

tacchrutvā vacanaṃ tasya dadhīcasya mahāmune//
kṣuvaḥ prāheti nṛpatiḥ śrīmadena vimohitaḥ

kṣuva uvāca //
aṣṭānāṃ lokapālānāṃ vapurdhārayate nṛpaḥ //
tasmānnṛpo variṣṭho hi varṇāśramapatiḥ prabhuḥ

sarvadevamayo- rājā śruti prāheti tatparā//
mahatī devatā yā sā sohameva tato mune

tasmādviprādvaro rājā cyavaneya vicāryatām//
nāvamaṃtavya evātaḥ pūjyo'haṃ sarvathā tvayā

brahmovāca //
śrutvā tathā mataṃ tasya kṣuvasya munisattamaḥ //
śrutismṛtiviruddhaṃ taṃ cukopātīva bhārgavaḥ

atha kruddho mahātejā gauravāccātmano mune //
atāḍayatkṣuvaṃ mūrdhni dadhīco vāmamuṣṭitaḥ

vajreṇa taṃ ca ciccheda dadhīcaṃ tāḍitaḥ kṣuvaḥ//
jagarjātīva saṃkruddho brahmāṃḍādhipatiḥ kudhīḥ

papāta bhūmau nihato tena vajreṇa bhārgavaḥ//
śukraṃ sasmāra kṣuvakṛdbhārgavasya kulaṃdharaḥ

śukrotha saṃdhayāmāsa tāḍitaṃ ca kṣuvena tu//
yogī dadhīcasya tadā dehamāgatya sadrutam

saṃdhāya pūrvavaddehaṃ dadhīcasyāha bhārgavaḥ //
śivabhaktāgraṇīrbhṛtyaṃ jayavidyāpravartakaḥ

śukra uvāca //
dadhīca tāta saṃpūjya śivaṃ sarveśvaraṃ prabhum //
mahāmṛtyuṃjayaṃ maṃtraṃ śrautamagryaṃ vadāmi te

tryambakaṃ yajāmahe trailokyaṃ pitaraṃ prabhum //
trimaṃḍalasya pitaraṃ triguṇasya maheśvaram

tritattvasya trivahneśca tridhābhūtasya sarvataḥ //
tridivasya tribāhośca tridhābhūtasya sarvataḥ//

tridevasya mahādevassugaṃdhi puṣṭivarddhanam//
sarvabhūteṣu sarvatra triguṇeṣu kṛtau yathā

indriyeṣu tathānyeṣu deveṣu ca gaṇeṣu ca//
puṣpe sugaṃdhivatsūrassugaṃdhimamareśvaraḥ

puṣṭiśca prakṛteryasmātpuruṣādvai dvijottama //
mahadādiviśeṣāṃtavikalpaścāpi suvrata//

viṣṇoḥ pitāmahasyāpi munīnāṃ ca mahāmune //
indriyasya ca devānāṃ tasmādvai puṣṭivarddhanaḥ

taṃ devamamṛtaṃ rudraṃ karmaṇā tapasāpi vā //
svādhyāyena ca yogena dhyānena ca prajāpate

satyenānyena sūkṣmāgrānmṛtyupāśādbhavaḥ svayam //
vaṃdhamokṣakaro yasmādurvārukamiva prabhuḥ

mṛtasaṃjīvanīmantro mama sarvottamaḥ smṛtaḥ //
evaṃ japaparaḥ prītyā niyamena śivaṃ smaran

japtvā hutvābhimaṃtryaiva jalaṃ piba divāniśam//
śivasya sannidhau dhyātvā nāsti mṛtyubhayaṃ kvacit

kṛtvā nyāsādikaṃ sarvaṃ saṃpūjya vidhivacchivam//
saṃvidhāyedaṃ nirvyagraśśaṃkaraṃ bhaktavatsalam

dhyānamasya pravakṣyāmi yathā dhyātvā japanmanum //
siddha mantro bhaveddhīmān yāvacchaṃbhuprabhāvataḥ

hastāṃbhojayugasthakuṃbhayugalāduddhṛtyatoyaṃ śirassiṃcaṃtaṃ karayoryugena dadhataṃ svāṃkebhakuṃbhau karau //
akṣasraṅmṛgahastamaṃbujagataṃ mūrddhasthacandrasravatpīyūṣārdratanuṃ bhaje sagirijaṃ tryakṣaṃ ca mṛtyuṃjayam

brahmovāca //
upadiśyeti śukraḥ svaṃ dadhīciṃ munisattamam //
svasthānamagamattāta saṃsmarañ śaṃkaraṃ prabhum

tasya tadvacanaṃ śrutvā dadhīco hi mahāmuniḥ //
vanaṃ jagāma tapase mahāprītyā śivaṃ smaran

tatra gatvā vidhānena mahāmṛtyuṃjayābhidham //
taṃ manuṃ prajapan prītyā tapastepe śivaṃ smaran

tanmanuṃ suciraṃ japtvā tapasārādhya śaṃkaram //
śivaṃ saṃtoṣayāmāsa mahāmṛtyuṃjayaṃ hi saḥ

atha śaṃbhuḥ prasannātmā tajjapādbhaktavatsalaḥ//
āvirbabhūva puratastasya prītyā mahāmune

taṃ dṛṣṭvā svaprabhuṃ śaṃbhuṃ sa mumoda munīśvaraḥ//
praṇamya vidhivadbhaktyā tuṣṭāva sukṛtāṃjaliḥ

atha prītyā śivastāta prasannaścyāvaniṃ mune //
varaṃ brūhīti sa prāha suprasannena cetasā

tacchutvā śaṃbhuvacanaṃ dadhīco bhaktasattamaḥ //
sāṃjalirnatakaḥ prāha śaṃkaraṃ bhaktavatsalam

dadhīca uvāca// //
devadeva mahādeva mahyaṃ dehi varatrayam //
vajrāsthitvādavadhyatvamadīnatvaṃ hi sarvataḥ

brahmovāca //
taduktavacanaṃ śrutvā prasannaḥ parameśvaraḥ //
varatrayaṃ dadau tasmai dadhīcāya tathāstviti

varatrayaṃ śivātprāpya sānaṃdaśca mahāmuniḥ //
kṣuvasthānaṃ jagāmāśu vedamārge pratiṣṭhitaḥ

brahmovāca //
prāpyāvadhyatvamugrātsa vajrāsthitvamadīnatām //
atāḍayacca rājendraṃ pādamūlena mūrddhani

kṣuvo dadhīcaṃ vajreṇa jaghānorasyatho nṛpaḥ //
krodhaṃ kṛtvā viśeṣeṇa viṣṇugauravagarvitaḥ

nābhūnnāśāya tadvajraṃ dadhīcasya mahātmanaḥ//
prabhāvātparameśasya dhātṛputro visismiye

dṛṣṭvāpyavadhyatvamadīnatāṃ ca vajrasya cātyaṃtaparaprabhāvam//
kṣuvo dadhīcasya munīśvarasya visismiye cetasi dhātṛputraḥ

ārādhayāmāsa hariṃ mukundamindrānujaṃ kānanamāśu gatvā //
prapannapālaśca parājito hi dadhīcamṛtyuṃjayasevakena

pūjayā tasya santuṣṭo bhagavān madhusūdanaḥ //
pradadau darśanaṃ tasmai divyaṃ vai garuḍadhvajaḥ

divyena darśanenaiva dṛṣṭvā devaṃ janārdanam //
tuṣṭāva vāgbhiriṣṭābhiḥ praṇamya garuḍadhvajam

sampūjya caivaṃ tridaśeśvarādyaiḥ stutaṃ devamajeyamīśam //
vijñāpayāmāsa nirīkṣya bhaktyā janārdanāya praṇipatya mūrdhnā

rājovāca// //
bhagavan brāhmaṇaḥ kaściddadhīca iti viśrutaḥ //
dharmavettā vinītātmā sakhā mama purābhavat

avadhyassarvadā sarvaiśśaṃkarasya prabhāvataḥ //
tamārādhya mahādevaṃ mṛtyuṃjayamanāmayam

sāvajñaṃ vāmapādena mama mūrdhni sadasyapi //
tāḍayāmāsa vegena sa dadhīco mahātapāḥ

uvāca taṃ ca garveṇa na bibhemīti sarvataḥ //
mṛtyuṃjayāpta suvaro garvito hyatulaṃ hariḥ

// brahmovāca //
atha jñātvā dadhīcasya hyavadhyatvaṃ mahātmanaḥ //
sasmārāsya maheśasya prabhāvamatulaṃ hariḥ

evaṃ smṛtvā hariḥ prāha kṣuvaṃ vidhisutaṃ drutam //
viprāṇāṃ nāsti rājendra bhayamaṇvapi kutracit

viśeṣādrudrabhaktānāṃ bhayaṃ nāsti ca bhūpate //
duḥkhaṃ karoti viprasya śāpārthaṃ sasurasya me

bhavitā tasya śāpena dakṣayajñe sureśvarāt //
vināśo mama rājendra punarutthānameva ca

tasmātsametya rājendra sarvayajño na bhūyate //
karomi yatnaṃ rājendra dadhīcavijayāya te

śrutvā vākyaṃ kṣuvaḥ prāha tathāstviti harernṛpaḥ //
tasthau tatraiva tatprītyā tatkāmotsukamānasaḥ

iti śrīśivamahāpurāṇe dvitīyāyāṃ rudrasaṃhitāyāṃ dvitīyasatīkhaṃḍe kṣuvadadhīcavādavarṇanaṃ nāmāṣṭatriṃśo'dhyāyaḥ