Shiva Purana · Chapter 2.2.37

// brahmovāca //
vīrabhadrotha yuddhe vai viṣṇunā sa mahābalaḥ //
saṃsmṛtya śaṃkaraṃ citte sarvāpadvinivāraṇam //

āruhya syaṃdanaṃ divyaṃ sarvavairivimardanaḥ //
gṛhītvā paramāstrāṇi siṃhanādaṃ jagarja ha

viṣṇuścāpi mahāghoṣaṃ pāṃcajanyā bhidhannijam //
dadhmau balī mahāśaṃkhaṃ svakīyān harṣayanniva

tacchrutvā śaṃkhanirhrādaṃ devā ye ca palāyitāḥ //
raṇaṃ hitvā gatāḥ pūrvaṃ te drutaṃ punarāyayuḥ

vīrabhadra gaṇaisteṣāṃ lokapālāssavāsavāḥ //
yuddhañcakrustathā siṃhanādaṃ kṛtvā balānvitāḥ

gaṇānāṃ lokapālānāṃ dvandvayuddhaṃ bhayāvaham //
abhavattatra tumulaṃ garjatāṃ siṃhanādataḥ

nandinā yuyudhe śakro'nalo vai vaiṣṇavāstathā//
kuberopi hi kūṣmāṇḍapatiśca yuyudhe balī

tadendreṇa hato nandī vajreṇa śataparvaṇā

nandinā ca hataśśakrastriśūlena stanāṃtare

balinau dvāvapi prītyā yuyudhāte parasparam //
nānāghātāṃśca kurvaṃtau nandiśakrau jigīṣayā

śaktyā jaghāna cāśmānaṃ śuciḥ paramakopanaḥ //
sopi śūlena taṃ vegācchitadhāreṇa pāvakam

yamena saha saṃgrāmaṃ mahāloko gaṇāgraṇīḥ //
cakāra tumulaṃ vīro mahādevaṃ smaranmudā

nairṛtena samāgamya caṃḍaśca balavattaraḥ //
yuyudhe paramāstraiśca nairṛtiṃ nibiḍaṃ vayan

varuṇena samaṃ vīro muṃḍaścaiva mahābalaḥ //
yuyudhe parayā śaktyā trilokīṃ vismayanniva

vāyunā ca hato bhṛṃgī svāstreṇa paramojasā //
bhṛṃgiṇā ca hato vāyustriśūlena pratāpinā

kubereṇaiva saṃgamya kūṣmāṃḍapatirādarāt //
yuyudhe balavān vīro dhyātvā hṛdi maheśvaram

yoginīcakrasaṃyukto bhairavīnāyako mahān //
vidīryya devānakhilānpapau śoṇitamadbhutam

kṣetrapālāstathā tatra bubhukṣuḥ surapuṃgavān //
kālī cāpi vidāryaiva tānpapau rudhiraṃ bahu

atha viṣṇurmahātejā yuyudhe taiśca śatruhā //
cakraṃ cikṣepa vegena dahanniva diśo daśa

kṣetrapālassamāyāṃtaṃ cakramālokya vegataḥ //
tatrāgatyāgato vīraścāgrasatsahasā balī

cakraṃ grasitamālokya viṣṇuḥ parapuraṃjayaḥ //
mukhaṃ tasya parāmṛjya tamudgālitavānarim///

svacakramādāya mahānubhāvaścukopa cātīva bhavaikabharttā //
mahābalī tairyuyudhe pravīraissakruddhanānāyudhadhārakostraiḥ

cakre mahāraṇaṃ viṣṇustaissārddhaṃ yuyudhe mudā //
nānāyudhāni saṃkṣipya tumulaṃ bhīmavikramam

atha te bhairavādyāśca yuyudhustena bhūriśaḥ //
nānāstrāṇi vimuṃcaṃtassaṃkuddhāḥ paramojasā

itthaṃ teṣāṃ raṇaṃ dṛṣṭvā hariṇātulatejasā //
vinivṛtya samāgamya tānsvayaṃ yuyudhe balī

atha viṣṇurmahātejāścakramudyamya mūrcchitaḥ //
yuyudhe bhagavāṃstena vīrabhadreṇa mādhavaḥ

tayoḥ samabhavadyuddhaṃ sughoraṃ romaharṣaṇam //
mahāvīrādhipatyostu nānāstradharayormune

viṣṇoryogabalāttasya devadeva sudāruṇāḥ//
śaṅkhacakragadāhastā asaṃkhyātāśca jajñire

te cāpi yuyudhustena vīrabhadreṇa bhāṣatā //
viṣṇuvat balavaṃto hi nānāyudhadharā gaṇāḥ

tānsarvānapi vīrosau nārāyaṇasamaprabhān //
bhasmīcakāra śūlena hatvā smṛtvā śivaṃ prabhum

tataścorasi taṃ viṣṇuṃ līlayaiva raṇājire //
jaghāna vīrabhadro hi triśūlena mahābalī

tena ghātena sahasā vihataḥ puruṣottamaḥ //
papāta ca tadā bhūmau visaṃjñobhūnmune hariḥ

tato yajñodbhutaṃ tejaḥ pralayānalasannibham //
trailokyadāhakaṃ tīvraṃ vīrāṇāmapi bhīkaram

krodharaktekṣaṇaḥ śrīmān punarutthāya sa prabhuḥ //
prahartuṃ cakramudyamya hyatiṣṭhatpuruṣarṣabhaḥ

tasya cakraṃ mahāraudraṃ kālā dityasamaprabham //
vyaṣṭaṃbhayadadīnātmā vīrabhadraśśivaḥ prabhuḥ

mune śaṃbhoḥ prabhāvāttu māyeśasya mahāprabhoḥ //
na cacāla hareścakraṃ karasthaṃ staṃbhitaṃ dhruvam

atha viṣṇurgaṇeśena vīrabhadreṇa bhāṣatā //
atiṣṭhatstaṃbhitastena śṛṃgavāniva niścalaḥ

tato viṣṇuḥ staṃbhito hi vīrabhadreṇa nārada //
yajvopamaṃtraṇamanā nīrastaṃbhanakārakam

tatasstaṃbhananirmuktaḥ śārṅgadhanvā rameśvaraḥ //
śārṅgaṃ jagrāha sa kruddhaḥ svadhanussaśaraṃ mune

tribhiśca dharṣito bāṇaistena śārṅgaṃ dhanurhareḥ //
vīrabhadreṇa tattāta tridhābhūttatkṣaṇānmune

atha viṣṇurmayā vāṇyā bodhitastaṃ mahāgaṇam //
asahyavarcasaṃ jñātvā hyaṃtardhātuṃ mano dadhe//

jñātvā ca tatsarvamidaṃ bhaviṣyaṃ satīkṛtaṃ duṣprasahaṃ pareṣām //
gatāḥ svalokaṃ svagaṇānvitāstu smṛtvā śivaṃ sarvapatiṃ svataṃtram

satyalokagataścāhaṃ putra śokena pīḍitaḥ //
aciṃtayaṃ suduḥkhārto mayā kiṃ kāryamadya vai

viṣṇau mayi gate caiva devāśca munibhissaha //
vinirjitā gaṇaissarve ye te yajñopajīvinaḥ

samupadravamālakṣya vidhvastaṃ ca mahāmakham //
mṛgasvarūpo yajño hi mahābhīto'pi dudruve

taṃ tadā mṛgarūpeṇa dhāvaṃtaṃ gaganaṃ prati//
vīrabhadrassamādāya viśiraskamathākarot

tataḥ prajāpatiṃ dharmaṃ kaśyapaṃ ca pragṛhya saḥ //
ariṣṭaneminaṃ vīro bahupatramunīśvaram

munimāṃgirasaṃ caiva kṛśāśvaṃ ca mahāgaṇaḥ //
jaghāna mūrdhni pādena dattaṃ ca munipuṃgavam

sarasvatyāśca nāsāgraṃ devamāstu tathaiva ca //
ciccheda karajāgreṇa vīra bhadraḥ pratāpavān

tatonyānapi devādīn vidārya pṛthivītale //
pātayāmāsa soyaṃ vai krodhākrāṃtātilocanaḥ

vīrabhadro vidāryyāpi devānmukhyānmunīnapi //
nābhūcchāṃto drutakrodhaḥ phaṇirāḍiva maṃḍitaḥ

vīrabhadroddhṛtārātiḥ kesarīva vanadvipān //
diśo vilokayāmāsa kaḥ kutrāstītyanukṣaṇam

vyapothayadbhṛguṃ yāvanmaṇibhadraḥ pratāpavān //
padākramyorasi tadā'kārṣīttacchmaśruluṃcanam

caṃḍaścotpāṭayāmāsa pūṣṇo daṃtān pravegataḥ //
śapyamāne hare pūrvaṃ yo'hasaddarśayandataḥ

nandī bhagasya netre hi pātitasya ruṣā bhuvi //
ujjahāra sa dakṣokṣṇā yaśśapaṃtamasūsucat

viḍaṃbitā svadhā tatra sā svāhā dakṣiṇā tathā//
maṃtrāstaṃtrāstathā cānye tatrasthā gaṇanāyakaiḥ

vavṛṣuste purīṣāṇi vitānā'gnau ruṣā gaṇāḥ//
anirvācyaṃ tadā cakrurgaṇā vīrāstamadhvaram

aṃtarvedyaṃtaragataṃ nilīnaṃ tadbhayādbalāt //
ānināya samājñāya vīrabhadreḥ svabhūścutam५८//
kapole'sya gṛhītvā tu khaḍgenopahṛtaṃ śiraḥ //
abhedyamabhavattasya tacca yogaprabhāvataḥ

abhedyaṃ tacchiro matvā śastrāstraiśca tu sarvaśaḥ //
kareṇa troṭayāmāsa padbhyāmākramya corasi

tacchirastasya duṣṭasya dakṣasya haravairiṇaḥ //
agnikuṃḍe pracikṣepa vīrabhadro gaṇāgraṇīḥ

reje tadā vīrabhadrastriśūlaṃ bhrāmayankare //
kruddhā raṇākṣasaṃvartāḥ prajvālya parvatopamāḥ (?) //

anāyāsena hatvaitān vīrabhadrastato'gninā //
jvālayāmāsa sakrodho dīptāgniśśalabhāniva

vīrabhadrastato dagdhāndṛṣṭvā dakṣapurogamān //
aṭṭāṭṭahāsamakarotpūrayaṃśca jagattrayam

vīraśriyā vṛtastatra tato nandanasaṃbhavā //
puṣpavṛṣṭirabhūddivyā vīrabhadre gaṇānvite

vavurgaṃdhavahāśśītāssugandhāssukhadāḥ śanaiḥ //
devaduṃdubhayo nedussamameva tataḥ param

kailāsaṃ sa yayau vīraḥ kṛtakāryyastataḥ param //
vināśitadṛḍhadhvāṃto bhānumāniva satvaram

kṛtakāryaṃ vīrabhadraṃ dṛṣṭvā saṃtuṣṭamā nasaḥ //
śaṃbhurvīragaṇādhyakṣaṃ cakāra parameśvaraḥ

iti śrīśivamahāpurāṇe dvitīyāyāṃ rudrasahitāyāṃ dvitīye satīkhaṃḍe yajñavidhvaṃ savarṇano nāma saptatriṃśo'dhyāyaḥ