Shiva Purana · Chapter 2.2.36

brahmovāca //
indro'pi prahasan viṣṇumātmavādarataṃ tadā //
vajrapāṇissuraissārddhaṃ yoddhukāmo'bhavattadā

tadendro gajamārūḍho bastārūḍho'nalastathā //
yamo mahiṣamārūḍho nirṛtiḥ pretameva ca

pāśī ca makarārūḍho mṛgārūḍho ssadāgatiḥ //
kuberaḥ puṣpakārūḍhassaṃnaddhobhūdataṃdritaḥ

tathānye surasaṃghāśca yakṣacāraṇaguhyakāḥ //
āruhya vāhanānyeva svāni svāni pratāpinaḥ

teṣāmudyogamālokya dakṣaścāsṛṅmukhastathā //
tadaṃtikaṃ samāgatya sakalatro'bhyabhāṣata

dakṣauvāca //
yuṣmadbalenaiva mayā yajñaḥ prāraṃbhito mahān //
satkarmasiddhaye yūyaṃ pramāṇāssyurmahāprabhāḥ

brahmovāca //
tacchrutvā dakṣavacanaṃ sarve devāssavāsavāḥ //
niryayustvaritaṃ tatra yuddhaṃ kartuṃ samudyatāḥ

atha devagaṇāḥ sarve yuyudhuste balānvitāḥ//
śakrādayo lokapālā mohitāḥ śivamāyayā

devānāṃ ca gaṇānāṃ ca tadāsītsamaro mahān //
tīkṣṇatomaranārācairyuyudhuste parasparam

neduśśaṃkhāśca bheryyaśca tasmin raṇamahotsave //
mahāduṃdubhayo neduḥ paṭahā ḍiṃḍimādayaḥ

tena śabdena mahatā ślāghmānāstadā surāḥ //
lokapālaiśca sahitā jaghnustāñchivakiṃkarān

indrādyairlokapālaiśca gaṇāśśaṃbho parāṅmukhāḥ //
kṛttāśca muniśārdūla bhṛgormaṃtrabalena ca

uccāṭanaṃ kṛtaṃ teṣāṃ bhṛguṇā yajvanā tadā //
yajanārthaṃ ca devānāṃ tuṣṭyarthaṃ dīkṣitasya ca

parājitānsvakāndṛṣṭvā vīrabhadro ruṣānvitaḥ //
bhūtapretapiśācāṃśca kṛtvā tāneva pṛṣṭhataḥ

vṛṣabhasthān puraskṛtya svayaṃ caiva mahābalaḥ //
mahātriśūlamādāya pātayāmāsa nirjarān

devānyakṣān sādhyagaṇān guhyakān cāraṇānapi //
śūlaghātaiśca sarve gaṇā vegāt prajaghnire

keciddvidhā kṛtāḥ khaḍgairmudgaraiśca vipothitāḥ//
anyaiśśastrairapi surā gaṇairbhinnāstadā'bhavan

evaṃ parājitāssarve palāyanaparāyaṇāḥ//
parasparaṃ parityajya gatā devāstriviṣṭapam

kevalaṃ lokapālāste śakrādyāstasthurutsukāḥ //
saṃgrāme dāruṇe tasmin dhṛtvā dhairyaṃ mahābalāḥ

sarve militvā śakrādyā devāstatra raṇājire //
bṛhaspatiṃ ca papracchurvinayāvanatāstadā

lokapālā ūcuḥ //
guro bṛhaspate tāta mahāprājña dayānidhe //
śīghraṃ vada pṛcchato naḥ kuto' smākaṃ jayo bhavet

brahmovāca //
ityākarṇya vacasteṣāṃ smṛtvā śaṃbhuṃ prayatnavān //
bṛhaspatiruvācedaṃ mahendraṃ jñānadurbalam

bṛhaspatiruvāca //
yaduktaṃ viṣṇunā pūrvaṃ tatsarvaṃ jātamadya vai //
tadeva vivṛṇomīndra sāvadhānatayā śṛṇu

asti yakṣeśvaraḥ kaścit phaladaḥ sarvakarmaṇām //
kartāraṃ bhajate sopi na svakarttuḥ prabhurhi saḥ

amaṃtrauṣadhayassarve nābhicārā na laukikāḥ //
na karmāṇi na vedāśca na mīmāṃsādvayaṃ tathā

anyānyapi ca śāstrāṇi nānāvedayutāni ca //
jñātuṃ neśaṃ saṃbhavaṃti vadaṃtyevaṃ purātanāḥ

na svajñeyo maheśānassarvavedāyutena saḥ //
bhakterananyaśaraṇairnānyatheti mahāśrutiḥ

śāṃtyā ca parayā dṛṣṭyā sarvathā nirvikārayā //
tadanugrahato nūnaṃ jñātavyo hi sadāśivaḥ

paraṃ tu saṃvadiṣyāmi kāryākārya vivakṣitau //
sidhyaṃśaṃ ca sureśāna taṃ śṛṇu tvaṃ hitāya vai

tvamiṃdra bāliśo bhūtvā lokapālaiḥ sadādya vai //
āgato dakṣa yajñaṃ hi kiṃ kariṣyasi vikramam

ete rudrasahāyāśca gaṇāḥ paramakopanāḥ //
āgatā yajñavighnārthaṃ taṃ kariṣyaṃtyasaṃśayama

sarvathā na hyupāyotra keṣāṃcidapi tattvataḥ //
yajñavighnavināśārtha satyaṃ satyaṃ bravīmyaham

brahmovāca //
evaṃ bṛhaspatervākyaṃ śrutvā te hi divaukasaḥ //
ciṃtāmāpedire sarve lokapālāssavāsavāḥ

tatobravīdvīrabhadro mahāvīragaṇairvṛtaḥ //
indrādīn lokapālāṃstān smṛtvā manasi śaṃkaram

vīrabhadra uvāca //
sarve yūyaṃ bāliśatvādavadānārthamāgatāḥ ///
avadānaṃ prayacchāmi āgacchata mamāṃtikam

he śakra he śuce bhāno he śaśin he dhanādhipa//
he pāśapāṇe he vāyo nirṛte yama śeṣa he

he surāsurasaṃghāhīhaita yūyaṃ he vicakṣaṇāḥ //
avadānāni dāsyāmi ātṛptyādyāsatāṃ varāḥ

// brahmovāca //
evamuktvā sitairbāṇairjaghānātha ruṣānvitaḥ //
nikhilāṃstān surān sadyo vīrabhadro gaṇāgraṇīḥ //
tairbāṇairnihatāssarve vāsavādyāḥ sureśvarāḥ

palāyanaparā bhūtvā jagmuste ca diśo daśa //
gateṣu lokapāleṣu vidruteṣu sureṣu ca //
yajñavāṭopakaṃṭhaṃ hi vīrabhadrogamadgaṇaiḥ

tadā te ṛṣayassarve subhītā hi rameśvaram //
vijñaptukāmāssahasā śīghramūcurnatā bhṛśam

ṛṣaya ūcuḥ //
devadeva ramānātha sarveśvara mahāprabho //
rakṣa yajñaṃ hi dakṣasya yajñosi tvaṃ na saṃśayaḥ

/
yajñakarmā yajñarūpo yajñāṃgo yajñarakṣakaḥ //
rakṣa yajñamato rakṣa tvattonyo na hi rakṣakaḥ

// brahmovāca //
ityākarṇya vacasteṣāmṛṣīṇāṃ vacanaṃ hariḥ //
yoddhukāmo bhayādviṣṇurvīrabhadreṇa tena vai

caturbhujassusanaddho cakrāyudhadharaḥ karaiḥ //
mahābalomaragaṇairyajñavāṭātsa niryayau

vīrabhadraḥ śūlapāṇirnānāgaṇasamanvitaḥ //
dadarśa viṣṇuṃ saṃnaddhaṃ yoddhukāmaṃ mahāprabhum//

taṃ dṛṣṭvā vīrabhadrobhūdbhrukuṭīkuṭilānanaḥ //
kṛtāṃta iva pāpiṣṭhaṃ mṛgendra iva vāraṇam

tathāvidhaṃ hariṃ dṛṣṭvā vīrabhadro rimardanaḥ //
avadattvaritaḥ kruddho gaṇairvīraissamāvṛtaḥ

vīrabhadra uvāca //
rere hare mahādeva śapathollaṃghanaṃ tvayā //
kathamadya kṛtaṃ citte garvaḥ kimabhavattava

tava śrīrudraśapathollaṃghane śaktirasti kim //
ko vā tvamasiko vā te rakṣa kosti jagattraye/

atra tvamāgataḥ kasmādvayaṃ tannaiva vidmahe //
dakṣasya yajñapātāttvaṃ kathaṃ jātosi tadvada

dākṣāyaṇyākṛtaṃ yacca tanna dṛṣṭaṃ kimu tvayā //
proktaṃ yacca dadhīcena śrutaṃ tanna kimu tvayā

tvañcāpi dakṣayajñesminnavadānārthamāgataḥ //
avadānaṃ prayacchāmi tava cāpi mahābhuja

vakṣo vidārayiṣyāmi triśūlena hare tava //
kastavāsti samāyāto rakṣakodya mamāṃtikam

pātayiṣyāmi bhūpṛṣṭhe jvālayiṣyāmi vahninā //
dagdhaṃ bhavaṃtamadhunā peṣayiṣyāmi satvaram

rere hare durācāra maheśa vimukhādhama //
śrīmahārudramāhātmyaṃ kinna jānāsi pāvanam

tathāpi tvaṃ mahābāho yoddhukāmogrataḥ sthitaḥ //
neṣyāmi punarāvṛttiṃ yadi tiṣṭhestvamātmanā

brahmovāca // //
tasya tadvacanaṃ śrutvā vīrabhadrasya buddhimān //
uvāca vihasan prītyā viṣṇustra sureśvaraḥ

viṣṇuruvāca //
śṛṇu tvaṃ vīrabhadrādya pravakṣyāmi tvadagrataḥ //
na rudravimukhaṃ māṃ tvaṃ vada śaṃkarasevakam

anena prārthitaḥ pūrvaṃ yajñārthaṃ ca punaḥ punaḥ //
dakṣeṇāviditārthena karmaniṣṭhena mauḍhyataḥ

ahaṃ bhaktaparādhīnastathā sopi maheśvaraḥ //
dakṣo bhakto hi me tāta tasmādatrāgato makhe

śṛṇu pratijñāṃ me vīra rudrakopasamudbhava //
rudratejassvarūpo hi supratāpālayaṃprabho

ahaṃ nivārayāmi tvāṃ tvaṃ ca māṃ vinivāraya //
tadbhaviṣyati yadbhāvi kariṣye'haṃ parākramam

// brahmovāca //
ityuktavati govinde prahasya sa mahābhujaḥ //
avadatsuprasannosmi tvāṃ jñātvāsmatprabhoḥ priyam

tato vihasya suprīto vīrabhadro gaṇāgraṇīḥ //
praśrayāvanatovādīdviṣṇuṃ devaṃ hi tattvataḥ

// vīrabhadra uvāca //
tava bhāvaparīkṣārthamityuktaṃ me mahāprabho //
idānīṃ tattvato vacmi śṛṇu tvaṃ sāvadhānataḥ

yathā śivastathā tvaṃ hi yathā tvaṃ ca tathā śivaḥ //
iti vedā varṇayaṃti śivaśāsanato hare

śivājñayā vayaṃ sarve sevakāḥ śaṃkarasya vai //
tathāpi ca ramānātha pravādocitamādarāt

// brahmovāca //
tacchrutvā vacanaṃ tasya vīrabhadrasya so'cyutaḥ //
prahasya cedaṃ provāca vīrabhadramidaṃ vacaḥ

// viṣṇuruvāca //
yuddhaṃ kuru mahāvīra mayā sārddhamaśaṃkitaḥ //
tavāstraiḥ pūryamāṇohaṃ gamiṣyāmi svamāśramam

// brahmovāca //
ityuktvā hi viramyāsau sannaddhobhūdraṇāya ca //
svagaṇairvīrabhadropi sannaddhotha mahābalaḥ

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe viṣṇuvīrabhadrasamvādo nāma ṣaṭtriṃśo'dhyāyaḥ