Shiva Purana · Chapter 2.2.35

dakṣa uvāca //
devadeva hare viṣṇo dīnabaṃdho kṛpānidhe //
mama rakṣā vidhātavyā bhavatā sādhvarasya ca

rakṣakastvaṃ makhasyaiva makhakarmā makhātmakaḥ //
kṛpā vidheyā yajñasya bhaṃgo bhavatu na prabho

// brahmovāca //
itthaṃ bahuvidhāṃ dakṣaḥ kṛtvā vijñaptimādarāt //
papāta pādayostasya bhayavyākulamānasaḥ

utthāpya taṃ tato viṣṇurdakṣaṃ viklinnamānasam //
śrutvā ca tasya tadvākyaṃ kumaterasmaracchivam

smṛtvā śivaṃ maheśānaṃ svaprabhuṃ parameśvaram //
avadacchivatattvajño dakṣaṃ sabodhayanhariḥ

hariruvāca //
śṛṇu dakṣa pravakṣyāmi tattvataḥ śṛṇu me vacaḥ //
sarvathā te hitakaraṃ mahāmaṃtrasukhapradam

avajñā hi kṛtā dakṣa tvayā tattvamajānatā //
sakalādhīśvarasyaiva śaṃkarasya parātmanaḥ

īśvarāvajñayā sarvaṃ kāryaṃ bhavati sarvathā //
viphalaṃ kevalaṃ naiva vipattiśca padepade

apūjyā yatra pūjyaṃte pūjanīyo na pūjyate //
trīṇi tatra bhaviṣyaṃti dāridryaṃ maraṇaṃ bhayam

tasmātsarvaprayatnena mānanīyo vṛṣadhvajaḥ //
amānitānmaheśācca mahadbhayamupasthitam

adyāpi na vayaṃ sarve prabhavaḥ prabhavāmahe //
bhavato durnayenaiva mayā satyamudīryyate

brahmovāca //
viṣṇostadvacanaṃ śrutvā dakṣaściṃtāparo'bhavat //
vivarṇavadano bhūtvā tūṣṇīmāsīdbhuvi sthitaḥ

etasminnaṃtare vīrabhadraḥ sainyasamanvitaḥ //
agacchadadhvaraṃ rudraprerito gaṇanāyakaḥ

pṛṣṭhe kecitsamāyātā gagane kecidāgatāḥ//
diśaśca vidiśaḥ sarve samāvṛtya tathāpare//

śarvājñayā gaṇāḥ śūrā nirbhayā rudravikramāḥ //
asaṃkhyāḥ siṃhanādānvai kurvaṃto vīrasattamāḥ

tena nādena mahatā nāditaṃ bhuvanatrayam //
rajasā cāvṛtaṃ vyoma tamasā cāvṛtā diśaḥ

saptadvīpānvitā pṛthvī cacālāti bhayākulā //
saśailakānanā tatra cukṣubhussakalābdhayaḥ

evaṃbhūtaṃ ca tatsainyaṃ lokakṣayakaraṃ mahat //
dṛṣṭvā ca vismitāssarve babhūvuramarādayaḥ

sainyodyogamathālokya dakṣaścāsṛṅmukhākulaḥ //
daṃḍavatpatito viṣṇuṃ sakalatro'bhyabhāṣata

// dakṣa uvāca //
bhavadbalenaiva mayā yajñaḥ prāraṃbhito mahān //
satkarmasiddhaye viṣṇo pramāṇaṃ tvaṃ mahāprabho

viṣṇo tvaṃ karmaṇāṃ sākṣī yajñānāṃ pratipālakaḥ //
dharmasya vedagarbhasya brahmaṇastvaṃ mahāprabho

tasmādrakṣā vidhātavyā yajñasyāsya mama prabho //
tvadanyaḥ yassamarthosti yatastvaṃ sakalaprabhuḥ

/
// brahmovāca //
dakṣasya vacanaṃ śrutvā viṣṇurdīnataraṃ tadā //
avocadbodhayaṃstaṃ vai śivatattvaparāṅmukham

viṣṇuruvāca //
mayā rakṣā vidhātavyā tava yajñasya dakṣa vai //
khyāto mama paṇaḥ satyo dharmasya paripālanam

tatsatyaṃ tu tvayoktaṃ hi kiṃ tattasya vyatikramaḥ //
śṛṇu tvaṃ vacmyahaṃ dakṣa krūrabuddhiṃ tyajā'dhunā

naimiṣe nimiṣakṣetre yajjātaṃ vṛttamadbhutam //
tatkiṃ na smaryate dakṣa vismṛtaṃ kiṃ kubuddhinā

rudrakopācca ko hyatra samartho rakṣaṇe tava //
na yasyābhimataṃ dakṣa yastvāṃ rakṣati durmatiḥ

kiṃ karma kimakarmeti tatra paśyasi durmate //
samarthaṃ kevalaṃ karma na bhaviṣyati sarvadā

svakarmaviddhi tadyena samarthatvena jāyate //
na tvanyaḥ karmaṇo dātā śaṃ bhavedīśvaraṃ vinā

īśvarasya ca yo bhaktyā śāṃtastadgatamānasaḥ //
karmaṇo hi phalaṃ tasya prayacchati tadā śivaḥ

kevalaṃ jñānamāśritya nirīśvaraparā narāḥ //
nirayaṃ te ca gacchaṃti kalpakoṭiśatāni ca

punaḥ karmamayaiḥ pāśairvaddhā janmani janmani //
nirayeṣu prapacyaṃte kevalaṃ karmarūpiṇaḥ

ayaṃ rudragaṇādhīśo vīrabhadro'ri mardanaḥ //
rudrakopāgnisaṃbhūtaḥ samāyātodhvarāṃgaṇe

ayamasmadvināśārthamāgatosti na saṃśayaḥ //
aśakyamasya nāstyeva kimapyastu tu vastutaḥ

prajvālyāsmānayaṃ sarvān dhruvameva mahāprabhuḥ //
tataḥ praśāṃtahṛdayo bhaviṣyati na saṃśayaḥ

śrīmahādevaśapathaṃ samullaṃghya bhramānmayā //
yataḥ sthitaṃ tataḥ prāpyaṃ mayā duḥkhaṃ tvayā saha

śaktirmama tu nāstyeva dakṣādyaitannivāraṇe //
śapathollaṃghanādeva śivadrohī yatosmyaham

kālatrayepi na yato maheśadrohiṇāṃ sukham //
tato'vaśyaṃ mayā prāptaṃ duḥkhamadya tvayā saha

sudarśanābhidhaṃ cakrametasminna lagiṣyati //
śaivacakramidaṃ yasmādaśaivalayakāraṇam

vināpi vīrabhadreṇa nāmaitaccakramaiśvaram //
hatvā gamiṣyatyadhunā satvaraṃ harasannidhau

śaivaṃ śapathamullaṃghya sthitaṃ māṃ cakramīdṛśam //
asaṃhatyaiva sahasā kṛpayaiva sthiraṃ param

ataḥ paramidaṃ cakramapi na sthāsyati dhruvam
gamiṣyatyadhunā śīghraṃ jvālāmālāsamākulam

vīrabhadraḥ pūjitopi śīghramasmābhirādarāt //
mahākrodhasamākrāṃto nāsmānsaṃrakṣayiṣyati

akāṃḍapralayo'smākamāgatodya hi hā hahā //
hā hā bata tavedānīṃ nāśosmākamupasthitaḥ

śaraṇyo'smākamadhunā nāstyeva hi jagattraye //
śaṃkaradrohiṇo loke kaśśaraṇyo bhaviṣyati

tanunāśepi saṃprāpyāstaiścāpi yamayātanāḥ //
tānaiva śakyate soḍhuṃ bahuduḥkhapradāyinīḥ

śivadrohiṇamālokya daṣṭadaṃto yamaḥ svayam //
taptatailakaṭāheṣu pātayatyeva nānyathā

gantumevāhamudyuktaṃ sarvathā śapathottaram //
tathāpi na gataśśīghraṃ duṣṭasaṃsargapāpataḥ

yadadya kriyatesmābhiḥ palāyanamitastadā //
śārvo nā karṣakaśśastrairasmānākarṣayiṣyati

svarge vā bhuvi pātāle yatra kutrāpi vā yataḥ //
śrīvīrabhadraśastrāṇāṃ gamanaṃ na hi durla bham

yāvataśca gaṇāssaṃti śrīrudrasya triśūlinaḥ //
tāvatāmapi sarveṣāṃ śaktiretādṛśī dhuvam

śrīkālabhairavaḥ kāśyāṃ nakhāgreṇaiva līlayā //
purā śiraśca ciccheda paṃcamaṃ brahmaṇo dhruvam

etaduktvā sthito viṣṇuratitrastamukhāmbujaḥ //
vīrabhadropi saṃprāpa tadaivā'dhvaramaṃḍapam

evaṃ bruvati govinda āgataṃ sainyasāgaram //
vīrabhadreṇa sahitaṃ dadṛśuśca surādayā

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe satyupākhyāne viṣṇuvākyavarṇanaṃ nāma paṃcatriṃśo'dhyāyaḥ