Shiva Purana · Chapter 2.2.34

brahmovāca //
evaṃ pracalite cāsmin vīrabhadre gaṇānvite //
duṣṭacihnāni dakṣeṇa dṛṣṭāni vibudhairapi

utpātā vividhāścāsan vīrabhadre gaṇānvite //
trividhā api devarṣe yajñavidhvaṃsasūcakāḥ

dakṣavāmākṣibāhūruvispaṃdassamajāyata //
nānākaṣṭapradastāta sarvathā'śubhasūcakaḥ

bhūkaṃpassamabhūttatra dakṣayāgasthale tadā //
dakṣopaśyacca madhyāhne nakṣatrāṇyadbhutāni ca

diśaścāsansumalināḥ karburobhūddivākaraḥ //
pariveṣasahasreṇa saṃkrāṃtaśca bhayaṃkaraḥ

nakṣatrāṇi pataṃti sma vidyudagniprabhāṇi ca //
nakṣatrāṇāmabhūdvakrā gatiścādhomukhī tadā

gṛdhrā dakṣa śiraḥ spṛṣṭvā samudbhūtāḥ sahasraśaḥ//
āsīdgṛdhrapakṣacchāyaissacchāyo yāgamaṃḍapaḥ

vavāśire yāgabhūmau kroṣṭāro netrakastadā//
ulkāvṛṣṭirabhūttatra śvetavṛścikasaṃbhavā

kharā vātā vavustatra pāṃśuvṛṣṭisamanvitāḥ//
śalabhāśca samudbhūtā vivartānilakaṃpitāḥ

rītaiśca pavanai rūrddhvaṃ sa dakṣādhvaramaṃḍapaḥ//
daivānvitena dakṣeṇa yaḥ kṛto nūtanodbhutaḥ

vemurdakṣādayassarve tadā śoṇitamadbhutam//
vemuśca māṃsakhaṇḍāni saśalyāni muhurmuhuḥ

sakaṃpāśca babhūvuste dīpā vātahatā iva //
duḥkhitāścābhavansarve śastradhārāhatā iva

tadā ninādajātāni bāṣpavarṣāṇi tatkṣaṇe //
prātastuṣāravarṣīṇi padmānīva vanāṃtare

dakṣādyakṣīṇi jātāni hyakasmādviśadānyapi //
niśāyāṃ kamalāścaiva kumudānīva saṃgave

asṛgvavarṣa devaśca timireṇāvṛtā diśaḥ //
digdāhobhūdviśeṣeṇa trāsayan sakalāñjanān//

evaṃ vidhānyariṣṭāni dadṛśurvibudhādayaḥ //
bhayamāpedire'tyaṃtaṃ mune viṣṇvādikāstadā

bhuvi te mūrchitāḥ peturhā hatāḥ sma itīrayan //
taravastīrasaṃjātā nadīvegahatā iva

patitvā te sthitā bhūmau krūrāḥ sarpā hatā iva //
kaṃdukā iva te bhūyaḥ patitāḥ punarutthitāḥ

tataste tāpasaṃtaptā ruruduḥ kurarī iva //
rodanadhvanisaṃkrātoruktipratyuktikā iva

savaikuṃṭhāstatassarve tadā kuṃṭhitaśaktayaḥ //
svasvopakaṃṭhamākaṃṭhaṃ luluṭhuḥ kamaṭhā iva

etasminnaṃtare tatra saṃjātā cāśarīravāk //
śrāvayatyakhilān devāndakṣaṃ caiva viśeṣataḥ

ākāśavāṇyuvāca //
dhik janma tava dakṣādya mahāmūḍhosi pāpadhīḥ //
bhaviṣyati mahadduḥkhamanivāryaṃ harodbhavam

hāhāpi notra ye mūḍhāstava devādayasthitāḥ //
teṣāmapi mahāduḥkhaṃ bhaviṣyati na saṃśayaḥ

brahmovāca // tacchrutvākāśavacanaṃ dṛṣṭvāriṣṭāni tāni ca //
dakṣaḥ prāpadbhayaṃ cāti pare devādayopi ha

vepamānastadā dakṣo vikalaścāti cetasi //
agacchaccharaṇaṃ viṣṇoḥ svaprabhoriṃdirāpateḥ

supraṇamya bhayāviṣṭaḥ saṃstūya ca vicetanaḥ //
avocaddevadevaṃ taṃ viṣṇuṃ svajanavatsalam

iti śrīśivamahāpurāṇe dvitīyāyāṃ rudrasaṃhitāyāṃ dvitīye satī khaṃḍe duśśakunadarśanaṃ nāma catustriṃśo'dhyāyaḥ