Shiva Purana · Chapter 2.2.33

brahmovāca //
ityuktaṃ śrīmaheśasya śrutvā vacanamādarāt//
vīrabhadrotisaṃtuṣṭaḥ praṇanāma maheśvarama

śāsanaṃ śirasā dhṛtvā devadevasya śūlinaḥ/
pracacāla tataḥ śīghraṃ vīrabhadro makhaṃ prati

śivotha preṣayāmāsa śobhārthaṃ koṭiśo gaṇān//
tena sārddhaṃ mahāvīrānmalayānalasannibhān//

atha te vīrabhadrasya purataḥ prabalā gaṇāḥ//
paścādapi yayurvīrāḥ kutūhalakarā gaṇāḥ

vīrabhadrasametā yegaṇāśśatasahasraśaḥ //
pārṣadāḥ kālakālasya sarve rudrasvarūpiṇaḥ //५/]
gaṇaissametaḥ kilatairmahātmā sa vīrabhadro haraveṣabhūṣaṇaḥ //
sahasrabāhurbhujagādhipāḍhyo yayau rathasthaḥ prabalotibhīkaraḥ

nalvānaṃ ca sahasre dve pramāṇaṃ syaṃdanasya hi //
ayutenaiva siṃhānāṃ vāhanānāṃ prayatnataḥ

tathaiva prabalāḥ siṃhā bahavaḥ pārśvarakṣakāḥ //
śārdūlā makarā matsyā gajāstatra sahasraśaḥ

vīrabhadre pracalite dakṣanāśāya satvaram //
kalpavṛkṣasamutsṛṣṭā puṣpavṛṣṭirabhūttadā

tuṣṭuvuśca gaṇā vīra śipiviṣṭe praceṣṭitam //
cakruḥ kutūhalaṃ sarve tasmiṃśca gamanotsavaiḥ

kālī kātyāyinīśānī cāmuṃḍā muṃḍamardinī //
bhadrakālī tathā bhadrā tvaritā vaiṣṇavī tathā

etābhirnavadurgābhirmahākālī samanvitā /
yayau dakṣavināśāya sarvabhūtagaṇaissaha

ḍākinī śākinī caiva bhūtapramathaguhyakāḥ //
kūṣmāṃḍāḥ parpaṭā ścaiva caṭakā brahmarākṣasāḥ

bhairavāḥ kṣetrapālāśca dakṣayajñavināśakāḥ //
niryayustvaritaṃ vīrāśśivājñāpratipālakāḥ

tathaiva yoginīcakraṃ catuḥṣaṣṭigaṇānvitam //
niryayau sahasā kruddhaṃ dakṣayajñaṃ vināśitum

teṣāṃ gaṇānāṃ sarveṣāṃ saṃkhyānaṃ śṛṇu nārada //
mahābalavatāṃ saṃghomukhyānāṃ dhairyaśālinām

abhyayācchaṃkukarṇaśca daśakoṭyā gaṇeśvaraḥ//
daśabhiḥ kekarākṣaśca vikṛto ṣṭābhireva

catuḥṣaṣṭyā viśākhaśca navabhiḥ pāriyātrikaḥ //
ṣaḍbhissarvāṅgako vīrastathaiva vikṛtānanaḥ

jvālakeśo dvādaśabhiḥ koṭibhirgaṇapuṃgavaḥ //
saptabhiḥ samadajjīmān dudrabhoṣṭābhireva ca

paṃcabhiśca kapālīśaḥ ṣaḍbhissaṃdārako gaṇaḥ //
koṭikoṭibhireveha koṭikuṇḍastathaiva ca

viṣṭaṃbho'ṣṭābhirvīraiḥ koṭibhirgaṇasaptamaḥ //
sahasrakoṭibhistāta saṃnādaḥ pippalastathā

āveśanastathāṣṭābhiraṣṭābhiścaṃdratāpanaḥ //
mahāveśaḥ sahasreṇa koṭinā gaṇapo vṛtaḥ

kuṇḍī dvādaśakoṭībhistathā parvatako mune //
vināśituṃ dakṣayajñaṃ niryayau gaṇasattama

kālaśca kālakaścaiva mahākālastathaiva ca //
koṭīnāṃ śatakenaiva dakṣayajñaṃ yayau prati

agnikṛcchatakoṭyā ca koṭyāgnimukha eva ca //
ādityamūrddhā koṭyā ca tathā caiva ghanāvahaḥ

sannāhaśśatakoṭyā ca koṭyā ca kumudo gaṇaḥ //
amoghaḥ kokilaścaiva koṭikoṭyā gaṇādhipaḥ

kāṣṭhāgūḍhaścatuḥṣaṣṭyā sukeśī vṛṣabhastathā //
sumantrako gaṇādhīśastathā tāta suniryayau

kākapādodaraḥ ṣaṣṭikoṭibhirgaṇasattamaḥ //
tathā santānakaḥ ṣaṣṭikoṭibhirgaṇapuṃgavaḥ

mahābalaśca navabhiḥ koṭibhiḥ puṃgavastathā

madhupiṃgastathā tāta gaṇādhīśo hi niryayau //
nīlo navatyā koṭīnāṃ pūrṇabhadrastathaiva ca

niryayau śatakoṭībhiścaturvaktro gaṇādhipaḥ //
kāṣṭhāgūḍheścatuṣṣaṣṭyā sukeśo vṛṣabhastathā

virūpākṣaśca koṭīnāṃ catuḥṣaṣṭyā gaṇeśvaraḥ //
tālaketuḥ ṣaḍāsyaśca paṃcāsyaśca gaṇādhipaḥ

saṃvartakastathā caiva kulīśaśca svayaṃ prabhuḥ //
lokāṃtakaśca dīptātmā tathā daityāntako mune

gaṇo bhṛṃgīriṭiḥ śrīmān devadevapriyastathā //
aśanirbhālakaścaiva catuḥṣaṣṭyā sahsrakaḥ

koṭikoṭisahasrāṇāṃ śatairviṃśa tibhirvṛtaḥ //
vīreśo hyabhyayādvīraḥ vīrabhadra śivājñayā

bhūtakoṭisahasraistu prayayau koṭibhistribhiḥ //
romajaiḥ śvagaṇai ścaiva tathā vīro yayau drutam

tadā bherīmahānādaḥ śaṃkhāśca vividhasvanāḥ //
jaṭāharomukhāścaiva śṛṃgāṇi vividhāni ca

te tāni vitatānyeva baṃdhanāni sukhāni ca //
vāditrāṇi vineduśca vividhāni mahotsave

vīrabhadrasya yātrāyāṃ sabalasya mahāmune //
śakunānyabhavaṃstatra bhūrīṇi sukhadāni ca

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe vīrabhadrayātrāvarṇanaṃ nāma trayastriṃśo'dhyāyaḥ