શિવ પુરાણ · અધ્યાય 2.2.34

બ્રહ્મોવાચ ॥
એવં પ્રચલિતે ચાસ્મિન્ વીરભદ્રે ગણાન્વિતે ॥
દુષ્ટચિહ્નાનિ દક્ષેણ દૃષ્ટાનિ વિબુધૈરપિ

ઉત્પાતા વિવિધાશ્ચાસન્ વીરભદ્રે ગણાન્વિતે ॥
ત્રિવિધા અપિ દેવર્ષે યજ્ઞવિધ્વંસસૂચકાઃ

દક્ષવામાક્ષિબાહૂરુવિસ્પંદસ્સમજાયત ॥
નાનાકષ્ટપ્રદસ્તાત સર્વથાઽશુભસૂચકઃ

ભૂકંપસ્સમભૂત્તત્ર દક્ષયાગસ્થલે તદા ॥
દક્ષોપશ્યચ્ચ મધ્યાહ્ને નક્ષત્રાણ્યદ્ભુતાનિ ચ

દિશશ્ચાસન્સુમલિનાઃ કર્બુરોભૂદ્દિવાકરઃ ॥
પરિવેષસહસ્રેણ સંક્રાંતશ્ચ ભયંકરઃ

નક્ષત્રાણિ પતંતિ સ્મ વિદ્યુદગ્નિપ્રભાણિ ચ ॥
નક્ષત્રાણામભૂદ્વક્રા ગતિશ્ચાધોમુખી તદા

ગૃધ્રા દક્ષ શિરઃ સ્પૃષ્ટ્વા સમુદ્ભૂતાઃ સહસ્રશઃ॥
આસીદ્ગૃધ્રપક્ષચ્છાયૈસ્સચ્છાયો યાગમંડપઃ

વવાશિરે યાગભૂમૌ ક્રોષ્ટારો નેત્રકસ્તદા॥
ઉલ્કાવૃષ્ટિરભૂત્તત્ર શ્વેતવૃશ્ચિકસંભવા

ખરા વાતા વવુસ્તત્ર પાંશુવૃષ્ટિસમન્વિતાઃ॥
શલભાશ્ચ સમુદ્ભૂતા વિવર્તાનિલકંપિતાઃ

રીતૈશ્ચ પવનૈ રૂર્દ્ધ્વં સ દક્ષાધ્વરમંડપઃ॥
દૈવાન્વિતેન દક્ષેણ યઃ કૃતો નૂતનોદ્ભુતઃ

વેમુર્દક્ષાદયસ્સર્વે તદા શોણિતમદ્ભુતમ્॥
વેમુશ્ચ માંસખણ્ડાનિ સશલ્યાનિ મુહુર્મુહુઃ

સકંપાશ્ચ બભૂવુસ્તે દીપા વાતહતા ઇવ ॥
દુઃખિતાશ્ચાભવન્સર્વે શસ્ત્રધારાહતા ઇવ

તદા નિનાદજાતાનિ બાષ્પવર્ષાણિ તત્ક્ષણે ॥
પ્રાતસ્તુષારવર્ષીણિ પદ્માનીવ વનાંતરે

દક્ષાદ્યક્ષીણિ જાતાનિ હ્યકસ્માદ્વિશદાન્યપિ ॥
નિશાયાં કમલાશ્ચૈવ કુમુદાનીવ સંગવે

અસૃગ્વવર્ષ દેવશ્ચ તિમિરેણાવૃતા દિશઃ ॥
દિગ્દાહોભૂદ્વિશેષેણ ત્રાસયન્ સકલાઞ્જનાન્॥

એવં વિધાન્યરિષ્ટાનિ દદૃશુર્વિબુધાદયઃ ॥
ભયમાપેદિરેઽત્યંતં મુને વિષ્ણ્વાદિકાસ્તદા

ભુવિ તે મૂર્છિતાઃ પેતુર્હા હતાઃ સ્મ ઇતીરયન્ ॥
તરવસ્તીરસંજાતા નદીવેગહતા ઇવ

પતિત્વા તે સ્થિતા ભૂમૌ ક્રૂરાઃ સર્પા હતા ઇવ ॥
કંદુકા ઇવ તે ભૂયઃ પતિતાઃ પુનરુત્થિતાઃ

તતસ્તે તાપસંતપ્તા રુરુદુઃ કુરરી ઇવ ॥
રોદનધ્વનિસંક્રાતોરુક્તિપ્રત્યુક્તિકા ઇવ

સવૈકુંઠાસ્તતસ્સર્વે તદા કુંઠિતશક્તયઃ ॥
સ્વસ્વોપકંઠમાકંઠં લુલુઠુઃ કમઠા ઇવ

એતસ્મિન્નંતરે તત્ર સંજાતા ચાશરીરવાક્ ॥
શ્રાવયત્યખિલાન્ દેવાન્દક્ષં ચૈવ વિશેષતઃ

આકાશવાણ્યુવાચ ॥
ધિક્ જન્મ તવ દક્ષાદ્ય મહામૂઢોસિ પાપધીઃ ॥
ભવિષ્યતિ મહદ્દુઃખમનિવાર્યં હરોદ્ભવમ્

હાહાપિ નોત્ર યે મૂઢાસ્તવ દેવાદયસ્થિતાઃ ॥
તેષામપિ મહાદુઃખં ભવિષ્યતિ ન સંશયઃ

બ્રહ્મોવાચ ॥ તચ્છ્રુત્વાકાશવચનં દૃષ્ટ્વારિષ્ટાનિ તાનિ ચ ॥
દક્ષઃ પ્રાપદ્ભયં ચાતિ પરે દેવાદયોપિ હ

વેપમાનસ્તદા દક્ષો વિકલશ્ચાતિ ચેતસિ ॥
અગચ્છચ્છરણં વિષ્ણોઃ સ્વપ્રભોરિંદિરાપતેઃ

સુપ્રણમ્ય ભયાવિષ્ટઃ સંસ્તૂય ચ વિચેતનઃ ॥
અવોચદ્દેવદેવં તં વિષ્ણું સ્વજનવત્સલમ્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં દ્વિતીયે સતી ખંડે દુશ્શકુનદર્શનં નામ ચતુસ્ત્રિંશોઽધ્યાયઃ