Shiva Purana · Chapter 2.2.31

brahmovāca //
etasminnantare tatra nabhovāṇī munīśvara //
avocacchṛṇvatāṃ dakṣasurādīnāṃ yathārthataḥ

vyomavāṇyuvāca //
re re dakṣa durācāra daṃbhācāraparāyaṇa //
kiṃ kṛtaṃ te mahāmūḍha karma cānarthakārakam

na kṛtaṃ śaivarājasya dadhīcervacanasya hi //
pramāṇaṃ tatkṛte mūḍha sarvānaṃdakaraṃ śubham

nirgataste makhādvipraḥ śāpaṃ dattvā sudussaham //
tatopi buddhaṃ kiṃcinno tvayā mūḍhena cetasi

tataḥ kṛtaḥ kathaṃ no vai svaputryāstvādaraḥ paraḥ //
samāgatāyāssatyāśca maṃgalāyā gṛhaṃ svataḥ

satībhavau nārcitau hi kimidaṃ jñānadurbala //
brahmaputra iti vṛthā garvitosi vimohitaḥ//

sā satyeva sadārādhyā sarvā pāpaphalapradā //
trilokamātā kalyāṇī śaṃkarārddhāṃgabhāginī

sā satyevārcitā nityaṃ sarvasaubhāgyadāyinī //
māheśvarī svabhaktānāṃ sarvamaṃgaladāyinī

sā satyevārcitā nityaṃ saṃsārabhayanāśinī//
manobhīṣṭapradā daivī sarvopadravahāriṇī

sā satyevārcitā nityaṃ kīrtisaṃpatpradāyinī //
paramā parameśānī bhuktimuktipradāyinī

sā satyeva jagaddhātrī jagadrakṣaṇakāriṇī //
anādiśaktiḥ kalpānte jagatsaṃhārakāriṇī

sā satyeva jaganmātā viṣṇu mātāvilāsinī //
brahmendracandravahnyarkadevādijananī smṛtā

sā satyeva tapodharmadātādiphaladāyinī //
śaṃbhuśaktirmahādevī duṣṭahaṃtrī parātparā

īdṛgvidhā satī devī yasya patnī sadā priyā //
tasyai bhāgo na dattaste mūḍhena kuvicāriṇā

śaṃbhurhi parameśānassarvasvāmī parātparaḥ//
viṣṇubrahmādisaṃsevyaḥ sarvakalyāṇakārakaḥ //१५/
tapyate hi tapaḥ siddhairetaddarśanakāṃkṣibhiḥ //
yujyate yogibhiryogairetaddarśanakāṃkṣibhiḥ

anaṃtadhanadhānyānāṃ yāgādīnāṃ tathaiva ca //
darśanaṃ śaṃkarasyaiva mahatphalamudāhṛtam

śiva eva jagaddhātā sarvavidyāpatiḥ prabhuḥ //
ādividyāvarasvāmī sarvamaṃgalamaṃgalaḥ

tacchakterna kṛto yasmātsatkarodya tvayā khala //
ataevā'dhvarasyāsya vināśo hi bhaviṣyati

amaṃgalaṃ bhavatyeva pūjārhāṇāmapūjayā //
pūjyamānā ca nāsau hi yataḥ pūjyatamā śivā

sahasreṇāpi śirasāṃ śeṣo yatpādajaṃ rajaḥ //
vahatyaharahaḥ prītyā tasya śaktiḥ śivā satī

yatpādapadmamaniśaṃ dhyātvā saṃpūjya sādaram //
viṣṇuviṣṇutvamāpannastasya śaṃbhoḥ priyā satī

yatpādapadmamaniśaṃ dhyātvā saṃpūjya sādaram //
brahmā brahmatvamāpannastasya śaṃbhoḥ priyā satī

yatpādapadmamaniśaṃ dhyātvā saṃpūjya sādaram //
indrādayo lokapālāḥ prāpussvaṃ svaṃ paraṃ padam

jagatpitā śivaśśaktirjaganmātā ca sā satī //
satkṛtau na tvayā mūḍha kathaṃ śreyo bhaviṣyati

daurbhāgyaṃ tvayi saṃkrāṃtaṃ saṃkrāṃtāstvayi cāpadaḥ //
yau cānārādhitau bhaktyā bhavānīśaṃkarau ca tau

anabhyarcya śivaṃ śaṃbhuṃ kalyāṇaṃ prāpnuyāmiti //
kimasti garvo durvārassa garvodya vinaśyati

sarveśavimukho bhūtvā deveṣveteṣu kastava //
kariṣyati sahāyaṃ taṃ na te paśyāmi sarvathā

yadi devāḥ kariṣyaṃti sāhāyyamadhunā tava //
tadā nāśaṃ samāpsyaṃti śalabhā iva vahninā

jvalatvadya mukhaṃ te vai yajñadhvaṃso bhavatvati //
sahāyāstava yāvaṃtaste jvalaṃtvadya satvaram

amarāṇāṃ ca sarveṣāṃ śapatho'maṃgalāya te //
kariṣyaṃtyadya sāhāyyaṃ yadetasya durātmanaḥ

nirgacchaṃtvamarāssvokametadadhvaramaṃḍapāt //
anyathā bhavato nāśo bhaviṣyatyadya sarvathā

nirgacchaṃtvapare sarve munināgādayo makhāt //
anyathā bhavatāṃ nāśo bhaviṣyatyadya sarvathā

nirgaccha tvaṃ hare śīghrametadadhvaramaṃḍapāt //
anyathā bhavato nāśo bhaviṣyatyadya sarvathā

nirgaccha tvaṃ vidhe śīghrametadadhvaramaṃḍapāt //
anyathā bhavato nāśo bhaviṣyatyadya sarvathā

brahmovāca //
ityuktvādhvaraśālāyāmakhilāyāṃ susaṃsthitān //
vyaramatsā nabhovāṇī sarvakalyāṇakāriṇī

tacchrutvā vyomavacanaṃ sarve haryādayassurāḥ //
akārṣurvismayaṃ tāta munayaśca tathā pare

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe satyupākhyāne nabhovāṇīvarṇanaṃ nāmaikatriṃśo'dhyāyaḥ