Shiva Purana · Chapter 2.2.30

// nārada uvāca //
maunībhūtā yadā sāsītsatī śaṃkaravallabhā //
caritraṃ kimabhūttatra vidhe tadvada cādarāt

// brahmovāca //
maunībhūtā satī devī smṛtvā svapatimādarāta //
kṣitāvudīcyāṃ sahasā niṣasāda praśāṃtadhīḥ

jalamācamya vidhivat saṃvṛtā vāsasā śuciḥ //
dṛṅnimīlya patiṃ smṛtvā yogamārgaṃ samāviśat

kṛtvāsamānāvanilau prāṇāpānau sitānanā//
utthāpyodānamatha ca yatnātsā nābhicakrataḥ

hṛdi sthāpyorasi dhiyā sthitaṃ kaṃṭhādbhruvossatī //
aniṃditānayanmadhyaṃ śaṃkaraprāṇavallabhā

evaṃ svadehaṃ sahasā dakṣakopājjihāsatī //
dagdhe gātre vāyuśucirdhāraṇaṃ yogamārgataḥ

tatassvabhartuścaraṇaṃ ciṃtayaṃtī na cāparam //
apaśyatsā satī tatra yogamārganiviṣṭadhīḥ

hatakalmaṣataddehaḥ prāpatacca tadagninā //
bhasmasādabhavatsadyo muniśreṣṭha tadicchayā

/
tatpaśyatāṃ ca khe bhūmau vādo'bhūtsumahāṃstadā //
hāheti sodbhutaścitrassurādīnāṃ bhayāvahaḥ

haṃ priyā parā śaṃbhordevī daivatamasya hi //
ahādasūn satī kena suduṣṭena prakopitā

aho tvanātmyaṃ sumahadasya dakṣasya paśyata //
carācaraṃ prajā yasya yatputrasya prajāpateḥ

ahodya dvimanā'bhūtsā satī devī manasvinī //
vṛṣadhvajapriyā'bhīkṣṇaṃ mānayogyā satāṃ sadā

soyaṃ durmarṣahṛdayo brahmadhṛk sa prajāpatiḥ //
mahatīmapakīrtiṃ hi prāpsyati tvakhile bhave

yatsvāṃgajāṃ sutāṃ śaṃbhudviṭ nyaṣe dhatsamudyatām //
mahānarakabhogī sa mṛtaye no'parādhataḥ

vadatyevaṃ jane satyā dṛṣṭvā'sutyāgamadbhutam //
drutaṃ tatpārṣadāḥ krodhādudatiṣṭhannudāyudhāḥ

dvāri sthitā gaṇāssarve rasāyutamitā ruṣā //
śaṃkarasya prabhoste vā'kudhyannatimahābalāḥ

hāhākāramakurvaṃste dhikdhik na iti vādinaḥ //
uccaissarve'sakṛdvīraḥśśaṃkarasya gaṇādhipāḥ

hāhākāreṇa mahatā vyāpta māsīddigantaram //
sarve prāpan bhayaṃ devā munayonyepi te sthitāḥ

gaṇāssaṃmaṃtrya te sarve'bhūvan kruddhā udāyudhāḥ //
kurvantaḥ pralayaṃ vādyaśastrairvyāptaṃ digaṃtaram

śastrairaghnannijāṃgāni kecittatra śucākulāḥ //
śiromukhāni devarṣe sutīkṣṇaiḥ prāṇanāśibhiḥ

itthaṃ te vilayaṃ prāptā dākṣāyaṇyā samaṃ tadā //
gaṇāyute dve ca tadā tadadbhutamivābhavat //

gaṇā nāśā'vaśiṣṭā ye śaṃkarasya mahātmanaḥ //
dakṣaṃ taṃ krodhitaṃ hantuṃ mudā tiṣṭhannudāyudhāḥ

teṣāmāpatatāṃ vegaṃ niśamya bhagavān bhṛguḥ //
yajñaghnaghnena yajuṣā dakṣiṇāgnau juhonmune

hūyamāne ca bhṛguṇā samutpeturmahāsurāḥ //
ṛbhavo nāma prabalavīrāstatra sahasraśaḥ

tairalātāyudhaistatra pramathānāṃ munīśvara //
abhūdyuddhaṃ suvikaṭaṃ śṛṇvatāṃ romaharṣaṇam

ṛbhubhistairmahāvīrairhanyamānāssamantataḥ //
ayatnayānāḥ pramathā uśadbhirbrahmatejasā

evaṃ śivagaṇāste vai hatā vidrāvitā drutam //
śivecchayā mahāśaktyā tadadbhutamivā'bhavat

taddṛṣṭvā ṛṣayo devāśśakrādyāssamarudgaṇāḥ //
viśveśvinau lokapālāstūṣṇīṃ bhūtāstadā'bhavan

kecidviṣṇuṃ prabhuṃ tatra prārthayantassamantataḥ //
udvignā mantrayaṃtaśca viprābhāvaṃ muhurmuhuḥ

suvicāryodarkaphalaṃ mahodvignāssubuddhayaḥ //
suraviṣṇvādayobhūvan tannāśādrāvaṇānmuhuḥ

evaṃbhūtastadā yajño vighno jāto durātmanaḥ //
brahmabaṃdhośca dakṣasya śaṃkaradrohiṇo mune

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe satyupākhyāne satīdehatyāgopadravavarṇanaṃ nāma triṃśo'dhyāyaḥ