Shiva Purana · Chapter 2.2.32

//
nārada uvāca
//
śrutvā vyomagiraṃ dakṣaḥ kimakārṣīttadā'budhaḥ //
anye ca kṛtavaṃtaḥ kiṃ tataśca kimabhūdvada

parājitāḥ śivagaṇā bhṛgumaṃtrabalena vai //
kimakārṣuḥ kutra gatāstattvaṃ vada mahāmate

brahmovāca
//
śrutvā vyomagiraṃ sarve vismitāśca surādayaḥ //
nāvocatkiṃcidapi te tiṣṭhantastu vimohitāḥ

palāyamānā ye vīrā bhṛgumaṃtrabalena te //
avaśiṣṭā śśivagaṇāśśivaṃ śaraṇamāyayuḥ

sarvaṃ nivedayāmāsū rudrāyāmitatejase //
caritraṃ ca tathābhūtaṃ supraṇamyādarācca te

gaṇā ūcuḥ
//
devadeva mahādeva pāhi naśśaraṇāgatān//
saṃśṛṇvādarato nātha satī vārtāṃ ca vistarāt

garvitena maheśānadakṣena sudurātmanā //
avamānaḥ kṛtassatyā'nādaro nirjaraistathā

tubhyaṃ bhāgamadātro sa devebhyaśca pradattavān //
durvacāṃsyavadatproccairduṣṭo dakṣassugarvitaḥ

tato dṛṣṭvā na te bhāgaṃ yajñe'kupyatsatī prabho //
viniṃdya bahuśastātamadhākṣītsvatanuṃ tadā

gaṇāstvayutasaṃkhyākā mṛtāstatra vilajjayā //
svāṃgānyāchidya śastraiśca krudhyāma hyapare vayam

tadyajñe dhvaṃsituṃ vegātsannaddhāstu bhayāvahāḥ //
tiraskṛtā hi bhṛguṇā svaprabhāvādvirodhinā

te vayaṃ śaraṇaṃ prāptāstava viśvaṃbhara prabho //
nirbhayān kuru nastasmāddayamānabhavādbhayāt

apamānaṃ viśeṣeṇa tasmin yajñe mahāprabho //
dakṣādyāste'khilā duṣṭā akurvan garvitā ati

ityuktaṃ nikhilaṃ vṛttaṃ sveṣāṃ satyāśca nārada //
teṣāṃ ca mūḍhabuddhīnāṃ yathecchasi tathā kuru

//
brahmovāca
//
ityākarṇyavacastasya svagaṇānāṃ vacaḥ prabhuḥ //
sasmāra nāradaṃ sarvaṃ jñātuṃ taccaritaṃ laghu

āgatastvaṃ drutaṃ tatra devarṣe divyadarśana //
praṇamya śaṃkaraṃ bhaktyā sāṃjalistatra tasthivān

tvāṃ praśasyātha sa svāmī satyā vārttāṃ ca pṛṣṭavān //
dakṣayajñagatāyā vai paraṃ ca caritaṃ tathā

pṛṣṭena śaṃbhunā tāta tvayāśveva śivātmanā//
tatsarvaṃ kathitaṃ vṛtaṃ jātaṃ dakṣādhvare hi yat

tadākarṇyeśvaro vākyaṃ mune tattvanmukhoditam //
cukopātidrutaṃ rudro mahāraudraparākramaḥ

utpāṭyaikāṃ jaṭāṃ rudro lokasaṃhārakārakaḥ //
āsphālayāmāsa ruṣā parvatasya tadopari

todanācca dvidhā bhūtā sā jaṭā ca mune prabhoḥ //
saṃbabhūva mahārāvo mahāpralayabhīṣaṇaḥ //

tajjaṭāyāssamudbhūto vīrabhadro mahābalaḥ //
pūrvabhāgena devarṣe mahābhīmo gaṇāgraṇīḥ

sa bhūmiṃ viśvato vṛttvātyatiṣṭhaddaśāṃgulam //
pralayānalasaṃkāśaḥ pronnato dossahasravān

kopaniśvāsatastatra mahārudrasya ceśituḥ //
jātaṃ jvarāṇāṃ śatakaṃ saṃnipātāstrayodaśa

mahākālī samutpannā tajjaṭāparabhā gataḥ //
mahābhayaṃkarā tāta bhūtakoṭibhirāvṛtā

sarve mūrttidharāḥ krūrāḥ svara lokabhayaṃkarāḥ //
svatejasā prajvalaṃto dahaṃta iva sarvataḥ

atha vīro vīrabhadraḥ praṇamya parameśvaram//
kṛtāṃjalipuṭaḥ prāha vākyaṃ vākyaviśāradaḥ

//
vīrabhadra uvāca
//
mahārudra mahāraudra somasūryāgnilocana //
kiṃ kartavyaṃ mayā kāryaṃ śīghramājñāpaya prabho

śoṣaṇīyāḥ kimīśāna kṣaṇārddhenaiva siṃdhavaḥ //
peṣaṇīyāḥ kimīśāna kṣaṇārddhenaiva parvatāḥ

kṣaṇena bhasmasātkuryāṃ brahmāṃḍamuta kiṃ hara //
kṣaṇena bhasmasātkuryāmsurānvā kiṃ munīśvarān

vyāśvāsaḥ sarvalokānāṃ kimu cāryo hi śaṃkara //
kartavya kimuteśāna sarvaprāṇivihiṃsanam

mamāśakyaṃ na kutrāpi tvatprasādānmaheśvara //
parākrameṇa mattulyo na bhūto na bhaviṣyati

yatra yatkāryamuddiśya preṣayiṣyasi māṃ prabho //
tatkāryaṃ sādhayāmyeva satvaraṃ tvatprasādataḥ

kṣudrāstaraṃti lokābdhiṃ śāsanācchaṃkarasya te //
harātohaṃ na kiṃ tartuṃ mahāpatsāgaraṃ kṣamaḥ

tvatpreṣitatṛṇenāpi mahatkāryaṃ mayatnataḥ //
kṣaṇena śakyate kartuṃ śaṃkarātra na saṃśayaḥ

līlāmātreṇa te śaṃbho kāryaṃ yadyapi siddhyati //
tathāpyahaṃ preṣaṇīyo tavaivānugraho hyayam

śaktiretādṛśī śaṃbho mamāpi tvadanugrahāt //
vinā śaktirna kasyāpi śaṃkara tvadanugrahāt

tvadājñayā vinā kopi tṛṇādīnapi vastutaḥ //
naiva cālayituṃ śaktassatyametanna saṃśayaḥ

śaṃbho niyamyāssarvepi devādyāste maheśvara //
tathaivāhaṃ niyamyaste niyaṃtussarvadehinām

praṇatosmi mahādeva bhūyopi praṇatosmyaham //
preṣaya sveṣṭa siddhyarthaṃ māmadya hara satvaram

spaṃdopi jāyate śaṃbho sakhyāṃgānāṃ muhurmuhuḥ //
bhaviṣyatyadya vijayo māmataḥ preṣaya prabho

harṣotsāhaviśeṣopi jāyate mama kaścana //
śaṃbho tvatpādakamale saṃsaktaśca mano mama

bhaviṣyati pratipadaṃ śubhasaṃtānasaṃtatiḥ

tasyaiva vijayo nityaṃ tasyaiva śubhamanvaham //
yasya śaṃbhau dṛḍhā bhaktistvayi śobhanasaṃśraye

//
brahmovāca
//
ityuktaṃ tadvacaḥ śrutvā saṃtuṣṭo maṃgalāpatiḥ //
vīrabhadra jayeti tvaṃ proktāśīḥ prāha taṃ punaḥ

//
maheśvara uvāca
//
śṛṇu madvacanaṃ tāta vīrabhadra sucetasā //
karaṇīyaṃ prayatnena taddrutaṃ me pratoṣakam

yāgaṃ kartuṃ samudyukto dakṣo vidhisutaḥ khalaḥ //
madvirodhī viśeṣeṇa mahāgarvo'budho'dhunā

tanmakhaṃ bhasmasātkṛtvā sayāgaparivārakam //
punarāyāhi matsthānaṃ satvaraṃ gaṇasattama

surā bhavaṃtu gaṃdharvā yakṣā vānye ca kecana //
tānapyadyaiva sahasā bhasmasātkuru satvaram

tatrāstu viṣṇurbrahmā vā śacīśo vā yamopi vā //
api cādyaiva tānsarvānpātayasva prayatnataḥ

surā bhavaṃtu gaṃdharvā yakṣā vānye ca kecana //
tānapyadyaiva sahasā bhasmasātkuru satvaram

dadhīcikṛtamullaṃghya śapathaṃ mayi tatra ye //
tiṣṭhaṃti te prayatnena jvālanīyāstvayā dhruvam

pramathāścāgamiṣyaṃti yadi viṣṇvādayo bhramāt //
nānākarṣaṇamaṃtreṇa jvālayānīya satvaram

ye tatrollaṃghya śapathaṃ madīyaṃ garvitāḥ sthitāḥ //
te hi maddrohiṇo'tastān jvālayānalamālayā

sapatnīkānsasārāṃśca dakṣayāgasthalasthitān //
prajvālya bhasmasātkṛtvā punarāyāhi satvaram

tatra tvayi gate devā viśvādya api sādaram //
stoṣyaṃti tvāṃ tadāpyāśu jvālayā jvālayaiva tān

devānapi kṛtadrohān jvālāmālāsamākulaḥ //
jvālaya jvalanaiśśīghraṃ mādhyāyādhyāyapālakam

dakṣādīnsakalāṃstatra sapatnīkānsabāṃdhavān //
prajvālya vīra dakṣaṃ nu salīlaṃ salilaṃ piba

//
brahmovāca
//
ityukto roṣatāmrākṣo vedamaryādapālakaḥ //
virarāma mahāvīraṃ kālārissakaleśvaraḥ

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe vīrabhadrotpattiśivopadeśavarṇanaṃ nāma dvātriṃśo'dhyāyaḥ