શિવ પુરાણ · અધ્યાય 2.2.31

બ્રહ્મોવાચ ॥
એતસ્મિન્નન્તરે તત્ર નભોવાણી મુનીશ્વર ॥
અવોચચ્છૃણ્વતાં દક્ષસુરાદીનાં યથાર્થતઃ

વ્યોમવાણ્યુવાચ ॥
રે રે દક્ષ દુરાચાર દંભાચારપરાયણ ॥
કિં કૃતં તે મહામૂઢ કર્મ ચાનર્થકારકમ્

ન કૃતં શૈવરાજસ્ય દધીચેર્વચનસ્ય હિ ॥
પ્રમાણં તત્કૃતે મૂઢ સર્વાનંદકરં શુભમ્

નિર્ગતસ્તે મખાદ્વિપ્રઃ શાપં દત્ત્વા સુદુસ્સહમ્ ॥
તતોપિ બુદ્ધં કિંચિન્નો ત્વયા મૂઢેન ચેતસિ

તતઃ કૃતઃ કથં નો વૈ સ્વપુત્ર્યાસ્ત્વાદરઃ પરઃ ॥
સમાગતાયાસ્સત્યાશ્ચ મંગલાયા ગૃહં સ્વતઃ

સતીભવૌ નાર્ચિતૌ હિ કિમિદં જ્ઞાનદુર્બલ ॥
બ્રહ્મપુત્ર ઇતિ વૃથા ગર્વિતોસિ વિમોહિતઃ॥

સા સત્યેવ સદારાધ્યા સર્વા પાપફલપ્રદા ॥
ત્રિલોકમાતા કલ્યાણી શંકરાર્દ્ધાંગભાગિની

સા સત્યેવાર્ચિતા નિત્યં સર્વસૌભાગ્યદાયિની ॥
માહેશ્વરી સ્વભક્તાનાં સર્વમંગલદાયિની

સા સત્યેવાર્ચિતા નિત્યં સંસારભયનાશિની॥
મનોભીષ્ટપ્રદા દૈવી સર્વોપદ્રવહારિણી

સા સત્યેવાર્ચિતા નિત્યં કીર્તિસંપત્પ્રદાયિની ॥
પરમા પરમેશાની ભુક્તિમુક્તિપ્રદાયિની

સા સત્યેવ જગદ્ધાત્રી જગદ્રક્ષણકારિણી ॥
અનાદિશક્તિઃ કલ્પાન્તે જગત્સંહારકારિણી

સા સત્યેવ જગન્માતા વિષ્ણુ માતાવિલાસિની ॥
બ્રહ્મેન્દ્રચન્દ્રવહ્ન્યર્કદેવાદિજનની સ્મૃતા

સા સત્યેવ તપોધર્મદાતાદિફલદાયિની ॥
શંભુશક્તિર્મહાદેવી દુષ્ટહંત્રી પરાત્પરા

ઈદૃગ્વિધા સતી દેવી યસ્ય પત્ની સદા પ્રિયા ॥
તસ્યૈ ભાગો ન દત્તસ્તે મૂઢેન કુવિચારિણા

શંભુર્હિ પરમેશાનસ્સર્વસ્વામી પરાત્પરઃ॥
વિષ્ણુબ્રહ્માદિસંસેવ્યઃ સર્વકલ્યાણકારકઃ ॥૧૫।
તપ્યતે હિ તપઃ સિદ્ધૈરેતદ્દર્શનકાંક્ષિભિઃ ॥
યુજ્યતે યોગિભિર્યોગૈરેતદ્દર્શનકાંક્ષિભિઃ

અનંતધનધાન્યાનાં યાગાદીનાં તથૈવ ચ ॥
દર્શનં શંકરસ્યૈવ મહત્ફલમુદાહૃતમ્

શિવ એવ જગદ્ધાતા સર્વવિદ્યાપતિઃ પ્રભુઃ ॥
આદિવિદ્યાવરસ્વામી સર્વમંગલમંગલઃ

તચ્છક્તેર્ન કૃતો યસ્માત્સત્કરોદ્ય ત્વયા ખલ ॥
અતએવાઽધ્વરસ્યાસ્ય વિનાશો હિ ભવિષ્યતિ

અમંગલં ભવત્યેવ પૂજાર્હાણામપૂજયા ॥
પૂજ્યમાના ચ નાસૌ હિ યતઃ પૂજ્યતમા શિવા

સહસ્રેણાપિ શિરસાં શેષો યત્પાદજં રજઃ ॥
વહત્યહરહઃ પ્રીત્યા તસ્ય શક્તિઃ શિવા સતી

યત્પાદપદ્મમનિશં ધ્યાત્વા સંપૂજ્ય સાદરમ્ ॥
વિષ્ણુવિષ્ણુત્વમાપન્નસ્તસ્ય શંભોઃ પ્રિયા સતી

યત્પાદપદ્મમનિશં ધ્યાત્વા સંપૂજ્ય સાદરમ્ ॥
બ્રહ્મા બ્રહ્મત્વમાપન્નસ્તસ્ય શંભોઃ પ્રિયા સતી

યત્પાદપદ્મમનિશં ધ્યાત્વા સંપૂજ્ય સાદરમ્ ॥
ઇન્દ્રાદયો લોકપાલાઃ પ્રાપુસ્સ્વં સ્વં પરં પદમ્

જગત્પિતા શિવશ્શક્તિર્જગન્માતા ચ સા સતી ॥
સત્કૃતૌ ન ત્વયા મૂઢ કથં શ્રેયો ભવિષ્યતિ

દૌર્ભાગ્યં ત્વયિ સંક્રાંતં સંક્રાંતાસ્ત્વયિ ચાપદઃ ॥
યૌ ચાનારાધિતૌ ભક્ત્યા ભવાનીશંકરૌ ચ તૌ

અનભ્યર્ચ્ય શિવં શંભું કલ્યાણં પ્રાપ્નુયામિતિ ॥
કિમસ્તિ ગર્વો દુર્વારસ્સ ગર્વોદ્ય વિનશ્યતિ

સર્વેશવિમુખો ભૂત્વા દેવેષ્વેતેષુ કસ્તવ ॥
કરિષ્યતિ સહાયં તં ન તે પશ્યામિ સર્વથા

યદિ દેવાઃ કરિષ્યંતિ સાહાય્યમધુના તવ ॥
તદા નાશં સમાપ્સ્યંતિ શલભા ઇવ વહ્નિના

જ્વલત્વદ્ય મુખં તે વૈ યજ્ઞધ્વંસો ભવત્વતિ ॥
સહાયાસ્તવ યાવંતસ્તે જ્વલંત્વદ્ય સત્વરમ્

અમરાણાં ચ સર્વેષાં શપથોઽમંગલાય તે ॥
કરિષ્યંત્યદ્ય સાહાય્યં યદેતસ્ય દુરાત્મનઃ

નિર્ગચ્છંત્વમરાસ્સ્વોકમેતદધ્વરમંડપાત્ ॥
અન્યથા ભવતો નાશો ભવિષ્યત્યદ્ય સર્વથા

નિર્ગચ્છંત્વપરે સર્વે મુનિનાગાદયો મખાત્ ॥
અન્યથા ભવતાં નાશો ભવિષ્યત્યદ્ય સર્વથા

નિર્ગચ્છ ત્વં હરે શીઘ્રમેતદધ્વરમંડપાત્ ॥
અન્યથા ભવતો નાશો ભવિષ્યત્યદ્ય સર્વથા

નિર્ગચ્છ ત્વં વિધે શીઘ્રમેતદધ્વરમંડપાત્ ॥
અન્યથા ભવતો નાશો ભવિષ્યત્યદ્ય સર્વથા

બ્રહ્મોવાચ ॥
ઇત્યુક્ત્વાધ્વરશાલાયામખિલાયાં સુસંસ્થિતાન્ ॥
વ્યરમત્સા નભોવાણી સર્વકલ્યાણકારિણી

તચ્છ્રુત્વા વ્યોમવચનં સર્વે હર્યાદયસ્સુરાઃ ॥
અકાર્ષુર્વિસ્મયં તાત મુનયશ્ચ તથા પરે

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં દ્વિતીયે સતીખંડે સત્યુપાખ્યાને નભોવાણીવર્ણનં નામૈકત્રિંશોઽધ્યાયઃ