Shiva Purana · Chapter 2.2.29

brahmovāca //
dākṣāyaṇī gatā tatra tatra yajño mahāprabhaḥ //
surāsuramunīndrādikutūhalasamanvitaḥ

svapiturbhavanaṃ tatra nānāścaryasamanvitam //
dadarśa suprabhaṃ cāru surarṣigaṇa saṃyutam

dvāri sthitā tadā devī hyavaruhya nijāsanāt //
nandino'bhyaṃtaraṃ śīghramekaivāgacchadadhvaram

āgatāṃ ca satīṃ dṛṣṭvā'siknī mātā yaśasvinī //
akarodādaraṃ tasyā bhaginyaśca yathocitam

nākarodādaraṃ dakṣo dṛṣṭvā tāmapi kiṃcana //
nānyopi tadbhayāttatra śivamāyāvimohitaḥ

atha sā mātaraṃ devī pitaraṃ ca satī mune //
anamadvismitātyaṃtaṃ sarvaloka parābhavāt

bhāgānapaśyaddevānāṃ haryādīnāṃ tadadhvare //
na śaṃbhubhāgamakarot krodhaṃ durviṣahaṃ satī

satyuvāca //
tadā dakṣaṃ dahantīva ruṣā pūrṇā satī bhṛśam //
krūradṛṣṭyā vilokyaiva sarvānapyapamānitā

satyuvāca //
anāhūtastvayā kasmācchaṃbhuḥ paramaśobhanaḥ //
yena pūtamidaṃ viśvaṃ samagraṃ sacarācaram

yajño yajñavidāṃ śreṣṭho yajñāṃgo yajñadakṣiṇaḥ //
yajñakartā ca yaśśaṃbhustaṃ vinā ca kathaṃ makhaḥ

yasya smaraṇamātreṇa sarvaṃ pūtaṃ bhavatyaho //
vinā tena kṛtaṃ sarvamapavitraṃ bhaviṣyati

dravyamaṃtrādikaṃ sarvaṃ havyaṃ kavyaṃ ca yanmayam //
śaṃbhunā hi vinā tena kathaṃ yajñaḥ pravartitaḥ

kiṃ śivaṃ surasāmānyaṃ matyākārṣīranādaram //
bhraṣṭabuddhirbhavānadya jātosi janakādhama

viṣṇubrahmādayo devā yaṃ saṃsevya maheśvaram //
prāptāḥ svapadavīṃ sarve taṃ na jānāsi re haram

ete kathaṃ samāyātā viṣṇubrahmādayassurāḥ //
tava yajñe vinā śaṃbhuṃ svaprabhuṃ munayastathā

// brahmovāca //
ityuktvā parameśānī viṣṇvādīnsakalān prati //
pṛthakpṛthagavocatsā bhartsayaṃtī bhavātmikā

satyuvāca //
he viṣṇo tvaṃ mahādevaṃ kiṃ na jānāsi tattvataḥ //
saguṇaṃ nirguṇaṃ cāpi śrutayo yaṃ vadaṃti ha

yadyapi tvāṃ karaṃ dattvā bahuvāraṃ maheśvaraḥ //
aśikṣayatpurā śālvapramukhākṛtibhirhare

tadapi jñānamāyātaṃ na te cetasi durmate //
bhāgārthī dakṣayajñesmin śivaṃ svasvāminaṃ vinā

purā paṃcamukho bhūtvā garvito'si sadāśivam //
kṛtaścaturmukhastena vismṛtosi tadadbhutam

indra tvaṃ kiṃ na jānāsi mahādevasya vikramam //
bhasmī kṛtaḥ paviste hi hareṇa krūrakarmaṇā

he surāḥ kinna jānītha mahādevasya vikramam //
atre vasiṣṭha munayo yuṣmābhiḥ kiṃ kṛtaṃ tviha

bhikṣāṭanaṃ ca kṛtavān purā dāruvane vibhuḥ //
śapto yadbhikṣuko rudro bhavadbhirmunibhistadā

śaptenāpi ca rudreṇa yatkṛtaṃ vismṛtaṃ katham //
talliṃgenākhilaṃ dagdhaṃ bhuvanaṃ sacarācaram

sarve mūḍhāśca saṃjātā viṣṇubrahmādayassurāḥ //
munayo'nye vinā śaṃbhumāgatā yadihādhvare

sarve vedāśca saṃbhūtāḥ sāṃgāśśāstrāṇi vāgyataḥ //
yosau vedāṃtagaśśambhuḥ kaiścijjñātuṃ na pāryate

// brahmovāca //
ityanekavidhā vāṇīragadajjagadambikā //
kopānvitā satī tatra hṛdayena vidūyatā

viṣṇvādayokhilā devā munayo ye ca tadvacaḥ //
maunībhūtāstadākarṇya bhayavyākulamānasāḥ

atha dakṣassamākarṇya svaputryāstādṛśaṃ vacaḥ//
vilokya krūradṛṣṭyā tāṃ satīṃ kuddho'bravīdvacaḥ

dakṣa uvāca //
tava kiṃ bahunoktena kāryaṃ nāstīha sāṃpratam //
gaccha vā tiṣṭha vā bhadre kasmāttvaṃ hi samāgatā

amaṃgalastu te bhartā śivosau gamyate budhaiḥ //
akulīko vedabāhyo bhūtapretapiśācarāṭ

tasmānnāhvārito rudro yajñārthaṃ sukuveṣabhṛt //
devarṣisaṃsadi mayā jñātvā putri vipaścitā

vidhinā preritena tvaṃ dattā maṃdena pāpinā//
rudrāyāviditārthāya coddhatāya durātmane

tasmātkopaṃ parityajya svasthā bhava śucismite //
yadyāgatāsi yajñesmin dāyaṃ gṛhṇīṣva cātmanā

brahmovāca//
dakṣeṇokteti sā putrī satī trailokyapū jitā //
niṃdāyuktaṃ svapitaraṃ dṛṣṭvāsīdruṣitā bhṛśam

arcitayattadā seti kathaṃ yāsyāmi śaṃkaram //
śaṃkaraṃ draṣṭukāmāhaṃ pṛṣṭā vakṣye kimuttaram

atha provāca pitaraṃ dakṣaṃ taṃ duṣṭamānasam //
niśśvasaṃtī ruṣāviṣṭā sā satī trijagatprasūḥ

satyuvāca //
yo niṃdati mahādevaṃ niṃdyamānaṃ śṛṇoti vā //
tāvubhau narakaṃ yātau yāvaccandradivākarau

tasmāttyakṣyāmyahaṃ devaṃ pravekṣyāmi hutāśanam //
kiṃ jīvitena me tāta śṛṇvaṃtyānādaraṃ prabhoḥ

yadi śaktassvayaṃ śaṃbhorniṃdakasya viśeṣataḥ //
chiṃdyāt prasahya rasanāṃ tadā śuddhyenna saṃśayaḥ

yadyaśakto janastatra nirayātsupidhāya vai //
karṇau dhīmān tataśśuddhyedvadaṃtīdaṃ budhānvarān

brahmovāca //
itthamuktvā dharmanītiṃ paścāttāpamavāpa sā //
asmaracchāṃkaraṃ vākyaṃ dūyamānena cetasā

tatassaṃkuddhya sā dakṣaṃ niśśaṃkaṃ prāha tānapi //
sarvānviṣṇvādikāndevānmunīnapi satī dhruvam

satyuvāca //
tāta tvaṃ niṃdakaśśaṃbhoḥ paścāttāpaṃ gamiṣyasi //
iha bhuktvā mahāduḥkhamaṃte yāsyasi yātanām

yasya loke'priyo nāsti priyaścaiva parātmanaḥ //
tasminnavaire śarvesmin tvāṃ vinā kaḥ pratīpakaḥ

mahadviniṃdā nāścaryaṃ sarvadā'satsu serṣyakam //
mahadaṃghrirajo dhvastatamassu saiva śobhanā

śiveti dvyakṣaraṃ yasya nṛṇāṃ nāma gireritam //
sakṛtprasaṃgātsakalamaghamāśu vihaṃti tat

pavitrakīrtitamalaṃ bhavān dveṣṭi śivetaraḥ //
alaṃghyaśāsanaṃ śaṃbhumaho sarveśvaraṃ khalaḥ

yatpādapadmaṃ mahatāṃ mano'lisuniṣevitam //
sarvārthadaṃ brahmarasaiḥ sarvārthibhirathādarāt

yadvarṣatyarthinaśśīghraṃ lokasya śivaādarāt //
bhavān druhyati mūrkhatvāttasmai cāśeṣabaṃdhave

kiṃvā śivākhyamaśivaṃ tvadanye na vidurbudhāḥ //
brahmādayastaṃ munayassanakādyāstathāpare

avakīrya jaṭābhūtaiśśmaśāne sa kapāladhṛk //
tanmālyabhasma vā jñātvā prītyāvasadudāradhīḥ

ye mūrddhabhirdadhati taccaraṇotsṛṣṭamārād //
nirmālyaṃ munayo devāssa śivaḥ parameśvaraḥ

pravṛttaṃ ca nivṛttaṃ ca dvividhaṃ karmacodi tam //
vede vivicya vṛttaṃ ca tadvicāryaṃ manīṣibhiḥ

virodhiyaugapadyaikakartṛke ca tathā dvayam //
parabrahmaṇi śaṃbho tu karmarcchaṃti na kiṃcana

mā vaḥ padavyassma pitaryā asmadāsthitāssadā //
yajñaśālāsu vo dhūmravartmabhuktojjhitāḥ param

no'vyaktaliṃgassatatamavadhūtasusevitaḥ//
abhimānamato na tvaṃ kuru tāta kubuddhidhṛk

kiṃbahūktena vacasā duṣṭastvaṃ sarvathā kudhīḥ/
tvadudbhavena dehena na me kiṃcitprayojanam

tajjanma dhigyo mahatāṃ sarvathāvadyakṛtkhalaḥ //
parityājyo viśeṣeṇa tatsaṃbaṃdho vipaścitā

gotraṃ tvadīyaṃ bhagavān yadāha vṛṣabhadhvajaḥ //
dākṣāyaṇīti sahasāhaṃ bhavāmi sudurmanāḥ

tasmāttvadaṃgajaṃ dehaṃ kuṇapaṃ garhitaṃ sadā //
vyutsṛjya nūnamadhunā bhaviṣyāmi sukhāvahā

he surā munayassarve yūyaṃ śṛṇuta madvacaḥ //
sarvathānucitaṃ karma yuṣmākaṃ duṣṭacetasām

sarve yūyaṃ vimūḍhā hi śivaniṃdāḥ kalipriyāḥ //
prāpsyaṃti daṇḍaṃ niyatamakhilaṃ ca harāddhruvam

// brahmovāca //
dakṣamuktvādhvare tāṃśca vyaramatsā satī tadā //
anūdya cetasā śambhumasmaratprāṇavallabham

itiśrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe satīvākyavarṇanaṃ nāmaikonatriṃśo'dhyāyaḥ