Shiva Purana · Chapter 2.2.28

// brahmovāca //
yadā yayurdakṣamakhamutsavena surarṣayaḥ //
tasminnaivāṃtare devo parvate gaṃdhamādane

dhārāgṛhe vitānena sakhībhiḥ parivāritā //
dākṣāyaṇī mahākrīḍāścakāra vividhāssatī

krīḍāsaktā tadā devī dadarśātha mudā satī//
dakṣayajñe prayāṃtaṃ ca rohiṇyā pṛcchya satvaram

dṛṣṭvā sīmaṃtayā bhūtāṃ vijayāṃ prāha sā satī //
svasakhīṃ pravarāṃ prāṇapriyāṃ sā hi hitāvahām //

// satyuvāca //
he sakhīpravare prāṇapriye tvaṃ vijaye mama //
kva gamiṣyati candroyaṃ rohiṇyāpṛcchya satvaram

brahmovāca //
tathoktā vijayā satyā gatvā tatsannidhau drutam//
kva gacchasīti papraccha śaśinaṃ taṃ yathocitam

vijayoktamathākarṇya svayātrāṃ pūrvamādarāt //
kathitaṃ tena tatsarvaṃ dakṣayajñotsavādikam

tacchrutvā vijayā devīṃ tvaritā jātasaṃbhramā//
kathayāmāsa tatsarvaṃ yaduktaṃ śaśinā satīm

tacchrutvā kālikā devī vismitābhūtsatī tadā//
vimṛśya kāraṇaṃ tatrājñātvā cetasyaciṃtayat

dakṣaḥ pitā me mātā ca vīriṇī nau kutassatī //
āhvānaṃ na karoti sma vismṛtā māṃ priyāṃ sutām

pṛccheyaṃ śaṃkaraṃ tatra kāraṇaṃ sarvamādarāt //
ciṃtayitveti sāsīdvai tatra gaṃtuṃ suniścayā

atha dākṣāyaṇī devī vijayāṃ pravarāṃ sakhīm //
sthāpayitvā drutaṃ tatra samagacchacchivāṃtikam

dadarśa taṃ sabhāmadhye saṃsthitaṃ bahubhirgaṇaiḥ //
naṃdyādibhirmahāvīraiḥ pravarairyūthayūthapai

dṛṣṭvā taṃ prabhumīśānaṃ svapatiṃ sātha dakṣajā //
praṣṭuṃ tatkāraṇaṃ śīghraṃ prāpa śaṃkarasaṃnidhim

śivena sthāpitā svāṃke prītiyuktena svapriyā //
pramoditā vacobhissā bahumānapurassaram

atha śaṃbhurmahālīlassarveśassukhadassatām //
satīmuvāca tvaritaṃ gaṇamadhyastha ādarāt

śaṃbhuruvāca //
kimarthamāgatātra tvaṃ sabhāmadhye savismayā //
kāraṇaṃ tasya suprītyā śīghraṃ vada sumadhyame

brahmovāca //
evamuktā tadā tena maheśena munīśvara //
sāṃjalissupraṇamyāśu satyuvāca prabhuṃ śivā

satyuvāca //
piturmama mahān yajño bhavatīti mayā śrutam //
tatrotsavo mahānasti samavetāssurarṣayaḥ

piturmama mahāyajñe kasmāttava na rocate //
gamanaṃ devadeveśa tatsarvaṃ kathaya prabho

suhṛdāmeṣa vai dharmassuhṛdbhissaha saṃgatiḥ //
kurvaṃti yanmahādeva suhṛdaḥ prītivarddhinīm

tasmātsarvaprayatnena mayāgaccha saha prabho //
yajñavāṭaṃ piturmedya svāmin prārthanayā mama

brahmovāca //
tasyāstadvacanaṃ śrutvā satyā devo maheśvaraḥ //
dakṣa vāgiṣuhṛdviddho babhāṣe sūnṛtaṃ vacaḥ

maheśvara uvāca //
dakṣastava pitā devī mama drohī viśeṣataḥ

yasya ye māninassarve sasurarṣimukhāḥ pare //
te mūḍhā yajanaṃ prāptāḥ pituste jñānavarjitāḥ

anāhūtāśca ye devī gacchaṃti paramaṃdiram //
avamānaṃ prāpnuvaṃti maraṇādadhikaṃ tathā

parālayaṃ gatopīṃdro laghurbhavati tadvidhaḥ //
kā kathā ca pareṣāṃ vai rīḍhā yātrā hi tadvidhā

tasmāttvayā mayā cāpi dakṣasya yajanaṃ prati //
na gaṃtavyaṃ viśeṣeṇa satyamuktaṃ mayā priyaṃ

tathāribhirna vyathate hyarditopi śarairjanaḥ //
svānāṃduruktibhirmarmatāḍitassa yathā mataḥ

vidyādibhirguṇaiḥ ṣaḍbhirasadanyaissatāṃ smṛtau //
hatāyāṃ bhūyasāṃ dhāma na paśyaṃti khalāḥ priye

brahmovāca //
evamuktā satī tena maheśena mahātmanā //
uvāca roṣasaṃyuktā śivaṃ vākyavidāṃ varam

satyuvāca //
yajñassyātsaphalo yena sa tvaṃ śaṃbhokhileśvara //
anāhūtosi tenādya pitrā me duṣṭakāriṇā

tatsarvaṃ jñātumicchāmi bhava bhāvaṃ durātmanaḥ //
surarṣīṇāṃ ca sarveṣāmāgatānāṃ durātmanām

tasmāccādyaiva gacchāmi svapituryajanaṃ prabho //
anujñāṃ dehi me nātha tatra gaṃtuṃ maheśvara

// brahmovāca //
ityuktau bhagavān rudrastayā devyā śivassvayam //
vijñātākhiladṛk draṣṭā satīṃ sūtikaro'bravīt

// śiva uvāca //
yadyevaṃ te rucirdevi tatra gaṃtumavaśyakam //
suvrate vacanānme tvaṃ gaccha śīghraṃ piturmakham

etaṃ naṃdinamāruhya vṛṣabhaṃ sajjamādarāt //
mahārājopacārāṇi kṛtvā bahuguṇānvitā

bhūṣitaṃ vṛṣamārohetyuktā rudreṇa sā satī //
subhūṣitā satī yuktā hyagamatpitumaṃdiram

mahārājopacārāṇi dattāni paramātmanā //
succhatracāmarādīni sadvastrābharaṇāni ca

gaṇāḥ ṣaṣṭisahasrāṇi raudrā jagmuśśivājñayā //
kutūhalayutāḥ prītā mahotsavasamanvitāḥ

tadotsavo mahānāsīdyajane tatra sarvataḥ //
satyāśśivapriyāyāstu vāmadevagaṇaiḥ kṛtaḥ

kutūhalaṃ gaṇāścakruśśivayoryaśa ujjaguḥ //
bālāṃtaḥ pupluvuḥ prītyā mahāvīrāśśivapriyāḥ

sarvathāsīnmahāśobhā gamane jāgadambike //
sukhārāvassaṃbabhūva pūritaṃ bhuvanatrayam

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe satīyātrāvarṇanaṃ nāmāṣṭaviṃśodhyāyaḥ