શિવ પુરાણ · અધ્યાય 2.2.28

॥ બ્રહ્મોવાચ ॥
યદા યયુર્દક્ષમખમુત્સવેન સુરર્ષયઃ ॥
તસ્મિન્નૈવાંતરે દેવો પર્વતે ગંધમાદને

ધારાગૃહે વિતાનેન સખીભિઃ પરિવારિતા ॥
દાક્ષાયણી મહાક્રીડાશ્ચકાર વિવિધાસ્સતી

ક્રીડાસક્તા તદા દેવી દદર્શાથ મુદા સતી॥
દક્ષયજ્ઞે પ્રયાંતં ચ રોહિણ્યા પૃચ્છ્ય સત્વરમ્

દૃષ્ટ્વા સીમંતયા ભૂતાં વિજયાં પ્રાહ સા સતી ॥
સ્વસખીં પ્રવરાં પ્રાણપ્રિયાં સા હિ હિતાવહામ્ ॥

॥ સત્યુવાચ ॥
હે સખીપ્રવરે પ્રાણપ્રિયે ત્વં વિજયે મમ ॥
ક્વ ગમિષ્યતિ ચન્દ્રોયં રોહિણ્યાપૃચ્છ્ય સત્વરમ્

બ્રહ્મોવાચ ॥
તથોક્તા વિજયા સત્યા ગત્વા તત્સન્નિધૌ દ્રુતમ્॥
ક્વ ગચ્છસીતિ પપ્રચ્છ શશિનં તં યથોચિતમ્

વિજયોક્તમથાકર્ણ્ય સ્વયાત્રાં પૂર્વમાદરાત્ ॥
કથિતં તેન તત્સર્વં દક્ષયજ્ઞોત્સવાદિકમ્

તચ્છ્રુત્વા વિજયા દેવીં ત્વરિતા જાતસંભ્રમા॥
કથયામાસ તત્સર્વં યદુક્તં શશિના સતીમ્

તચ્છ્રુત્વા કાલિકા દેવી વિસ્મિતાભૂત્સતી તદા॥
વિમૃશ્ય કારણં તત્રાજ્ઞાત્વા ચેતસ્યચિંતયત્

દક્ષઃ પિતા મે માતા ચ વીરિણી નૌ કુતસ્સતી ॥
આહ્વાનં ન કરોતિ સ્મ વિસ્મૃતા માં પ્રિયાં સુતામ્

પૃચ્છેયં શંકરં તત્ર કારણં સર્વમાદરાત્ ॥
ચિંતયિત્વેતિ સાસીદ્વૈ તત્ર ગંતું સુનિશ્ચયા

અથ દાક્ષાયણી દેવી વિજયાં પ્રવરાં સખીમ્ ॥
સ્થાપયિત્વા દ્રુતં તત્ર સમગચ્છચ્છિવાંતિકમ્

દદર્શ તં સભામધ્યે સંસ્થિતં બહુભિર્ગણૈઃ ॥
નંદ્યાદિભિર્મહાવીરૈઃ પ્રવરૈર્યૂથયૂથપૈ

દૃષ્ટ્વા તં પ્રભુમીશાનં સ્વપતિં સાથ દક્ષજા ॥
પ્રષ્ટું તત્કારણં શીઘ્રં પ્રાપ શંકરસંનિધિમ્

શિવેન સ્થાપિતા સ્વાંકે પ્રીતિયુક્તેન સ્વપ્રિયા ॥
પ્રમોદિતા વચોભિસ્સા બહુમાનપુરસ્સરમ્

અથ શંભુર્મહાલીલસ્સર્વેશસ્સુખદસ્સતામ્ ॥
સતીમુવાચ ત્વરિતં ગણમધ્યસ્થ આદરાત્

શંભુરુવાચ ॥
કિમર્થમાગતાત્ર ત્વં સભામધ્યે સવિસ્મયા ॥
કારણં તસ્ય સુપ્રીત્યા શીઘ્રં વદ સુમધ્યમે

બ્રહ્મોવાચ ॥
એવમુક્તા તદા તેન મહેશેન મુનીશ્વર ॥
સાંજલિસ્સુપ્રણમ્યાશુ સત્યુવાચ પ્રભું શિવા

સત્યુવાચ ॥
પિતુર્મમ મહાન્ યજ્ઞો ભવતીતિ મયા શ્રુતમ્ ॥
તત્રોત્સવો મહાનસ્તિ સમવેતાસ્સુરર્ષયઃ

પિતુર્મમ મહાયજ્ઞે કસ્માત્તવ ન રોચતે ॥
ગમનં દેવદેવેશ તત્સર્વં કથય પ્રભો

સુહૃદામેષ વૈ ધર્મસ્સુહૃદ્ભિસ્સહ સંગતિઃ ॥
કુર્વંતિ યન્મહાદેવ સુહૃદઃ પ્રીતિવર્દ્ધિનીમ્

તસ્માત્સર્વપ્રયત્નેન મયાગચ્છ સહ પ્રભો ॥
યજ્ઞવાટં પિતુર્મેદ્ય સ્વામિન્ પ્રાર્થનયા મમ

બ્રહ્મોવાચ ॥
તસ્યાસ્તદ્વચનં શ્રુત્વા સત્યા દેવો મહેશ્વરઃ ॥
દક્ષ વાગિષુહૃદ્વિદ્ધો બભાષે સૂનૃતં વચઃ

મહેશ્વર ઉવાચ ॥
દક્ષસ્તવ પિતા દેવી મમ દ્રોહી વિશેષતઃ

યસ્ય યે માનિનસ્સર્વે સસુરર્ષિમુખાઃ પરે ॥
તે મૂઢા યજનં પ્રાપ્તાઃ પિતુસ્તે જ્ઞાનવર્જિતાઃ

અનાહૂતાશ્ચ યે દેવી ગચ્છંતિ પરમંદિરમ્ ॥
અવમાનં પ્રાપ્નુવંતિ મરણાદધિકં તથા

પરાલયં ગતોપીંદ્રો લઘુર્ભવતિ તદ્વિધઃ ॥
કા કથા ચ પરેષાં વૈ રીઢા યાત્રા હિ તદ્વિધા

તસ્માત્ત્વયા મયા ચાપિ દક્ષસ્ય યજનં પ્રતિ ॥
ન ગંતવ્યં વિશેષેણ સત્યમુક્તં મયા પ્રિયં

તથારિભિર્ન વ્યથતે હ્યર્દિતોપિ શરૈર્જનઃ ॥
સ્વાનાંદુરુક્તિભિર્મર્મતાડિતસ્સ યથા મતઃ

વિદ્યાદિભિર્ગુણૈઃ ષડ્ભિરસદન્યૈસ્સતાં સ્મૃતૌ ॥
હતાયાં ભૂયસાં ધામ ન પશ્યંતિ ખલાઃ પ્રિયે

બ્રહ્મોવાચ ॥
એવમુક્તા સતી તેન મહેશેન મહાત્મના ॥
ઉવાચ રોષસંયુક્તા શિવં વાક્યવિદાં વરમ્

સત્યુવાચ ॥
યજ્ઞસ્સ્યાત્સફલો યેન સ ત્વં શંભોખિલેશ્વર ॥
અનાહૂતોસિ તેનાદ્ય પિત્રા મે દુષ્ટકારિણા

તત્સર્વં જ્ઞાતુમિચ્છામિ ભવ ભાવં દુરાત્મનઃ ॥
સુરર્ષીણાં ચ સર્વેષામાગતાનાં દુરાત્મનામ્

તસ્માચ્ચાદ્યૈવ ગચ્છામિ સ્વપિતુર્યજનં પ્રભો ॥
અનુજ્ઞાં દેહિ મે નાથ તત્ર ગંતું મહેશ્વર

॥ બ્રહ્મોવાચ ॥
ઇત્યુક્તૌ ભગવાન્ રુદ્રસ્તયા દેવ્યા શિવસ્સ્વયમ્ ॥
વિજ્ઞાતાખિલદૃક્ દ્રષ્ટા સતીં સૂતિકરોઽબ્રવીત્

॥ શિવ ઉવાચ ॥
યદ્યેવં તે રુચિર્દેવિ તત્ર ગંતુમવશ્યકમ્ ॥
સુવ્રતે વચનાન્મે ત્વં ગચ્છ શીઘ્રં પિતુર્મખમ્

એતં નંદિનમારુહ્ય વૃષભં સજ્જમાદરાત્ ॥
મહારાજોપચારાણિ કૃત્વા બહુગુણાન્વિતા

ભૂષિતં વૃષમારોહેત્યુક્તા રુદ્રેણ સા સતી ॥
સુભૂષિતા સતી યુક્તા હ્યગમત્પિતુમંદિરમ્

મહારાજોપચારાણિ દત્તાનિ પરમાત્મના ॥
સુચ્છત્રચામરાદીનિ સદ્વસ્ત્રાભરણાનિ ચ

ગણાઃ ષષ્ટિસહસ્રાણિ રૌદ્રા જગ્મુશ્શિવાજ્ઞયા ॥
કુતૂહલયુતાઃ પ્રીતા મહોત્સવસમન્વિતાઃ

તદોત્સવો મહાનાસીદ્યજને તત્ર સર્વતઃ ॥
સત્યાશ્શિવપ્રિયાયાસ્તુ વામદેવગણૈઃ કૃતઃ

કુતૂહલં ગણાશ્ચક્રુશ્શિવયોર્યશ ઉજ્જગુઃ ॥
બાલાંતઃ પુપ્લુવુઃ પ્રીત્યા મહાવીરાશ્શિવપ્રિયાઃ

સર્વથાસીન્મહાશોભા ગમને જાગદમ્બિકે ॥
સુખારાવસ્સંબભૂવ પૂરિતં ભુવનત્રયમ્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં દ્વિતીયે સતીખંડે સતીયાત્રાવર્ણનં નામાષ્ટવિંશોધ્યાયઃ