Shiva Purana · Chapter 2.2.27

// brahmovāca //
ekadā tu mune tena yajñaḥ prāraṃbhito mahān //
tatrāhūtāstadā sarve dīkṣitena surarṣayaḥ

maharṣayo'khilāstatra nirjarāśca samāgatāḥ //
yadyajñakaraṇārthaṃ hi śivamāyāvimohitaḥ

agastyaḥ kaśyapotriśca vāmadevastathā bhṛguḥ //
dadhīcirbhagavān vyāso bhāradvājo'tha gautamaḥ

pailaḥ parāśaro gargo bhārgavaḥ kakupassitaḥ //
sumaṃtutrikakaṃkāśca vaiśaṃpāyana eva ca

ete cānye ca bahavo munayo harṣitā yayu //
mama putrasya dakṣasya sadārāssasutā makham

tathā sarve suragaṇā lokapālā mahodayāḥ //
tathopanirjarāssarve svāpakārabalānvitāḥ

satyalokātsamānīto nutohaṃ viśvakārakaḥ//
sasutassa parīvāro mūrtavedāpisaṃyutaḥ

vaikuṃṭhācca tathā viṣṇussaṃprārthya vividhādarāt //
sapārṣadaparīvārassamānīto makhaṃ prati

evamanye samāyātā dakṣayajñaṃ vimohitāḥ //
satkṛtāstena dakṣena sarve te hi durātmanā

bhavanāni mahārhāṇi suprabhāṇi mahāṃti ca //
tvaṣṭrā kṛtāni divyāni tebhyo dattāni tena vai

teṣu sarveṣu dhiṣṇyeṣu yathāyogyaṃ ca saṃsthitāḥ //
sanmānitā arājaṃste sakalā viṣṇunā mayā

varttamāne mahāyajñe tīrthe kanakhale tadā //
ṛtvijaśca kṛtāstena bhṛgvādyāśca tapodhanāḥ

adhiṣṭhātā svayaṃ viṣṇussaha sarvamarudgaṇaiḥ //
ahaṃ tatrā'bhavaṃ brahmā trayīvidhinidarśakaḥ

tathaiva sarvadikpālā dvārapālāśca rakṣakāḥ //
sāyudhāssaparīvārāḥ kutūhalakarāssadā

upatasthe svayaṃ yajñassurūpastasya cādhvare//
sarve mahāmuniśreṣṭhāḥ svayaṃ vedadharā'bhavan

tanūnapādapi nijaṃ cakre rūpaṃ sahasraśaḥ //
haviṣā grahaṇāyāśu tasmin yajñe mahotsave

aṣṭāśītisahasrāṇi juhvati saha ṛtvijaḥ //
udgātāraścatuṣaṣṭi sahasrāṇi surarṣayaḥ

adhvaryavotha hotārastāvanto nāradādayaḥ //
saptarṣayassamā gāthāḥ kurvaṃti sma pṛthakpṛthak

gaṃdharvavidyādharasiddhasaṃghānādityasaṃghān sagaṇān sayajñān //
saṃkhyāvarānnāgacarān samastān vavre sa dakṣo hi mahādhvare sve

dvijarṣirājarṣisurarṣisaṃghā nṛpāssamitrāḥ sacivāssa sainyāḥ //
vasupramukhyā gaṇadevatāśca sarve vṛtāstena makhopavettrāḥ

dīkṣāyuktastadā dakṣaḥ kṛtakautukamaṃgalaḥ //
bhāryayā sahito reje kṛtasvastyayano bhṛśam

tasmin yajñe vṛtaśśaṃbhurna dakṣeṇa durātmanā //
kapālīti viniścitya tasya yajñārhatā na hi

kapālibhāryeti satī dayitā svasutāpi ca //
nāhūtā yajñaviṣaye dakṣeṇāguṇadarśinā

evaṃ pravartamāne hi dakṣayajñe mahotsave //
svakāryalagnāstatrāsan sarve te'dhvarasaṃmatāḥ

etasminnaṃtare'dṛṣṭvā tatra vai śaṃkaraṃ prabhum //
prodvignamānasaśśaivo dadhīco vākyamabravīt

dadhīca uvāca // //
sarve śṛṇuta madvākyaṃ devarṣipramukhā mudā //
kasmānnaivāgataśśaṃbhurasmin yajñe mahotsave

ete sureśā munayo mahattarāssalokapālāśca samāgatā hi //
tathāpi yajñastu na śobhate bhṛśaṃ pinākinā tena mahātmanā vinā

yenaiva sarvāṇyapi maṃgalāni bhavaṃti śaṃsanti mahāvipaścitaḥ //
so'sau na dṛṣṭo'tra pumān purāṇo vṛṣadhvajo nīlagalaḥ pareśaḥ

amaṃgalānyeva ca maṃgalāni bhavaṃti yenādhigatāni dakṣaḥ //
tripaṃcakenāpyatha maṃgalāni bhavaṃti sadyaḥ parataḥ purāṇi

tasmāttvayaiva kartavyamāhvānaṃ parameśituḥ //
tvaritaṃ brahmaṇā vāpi viṣṇunā prabhuviṣṇunā

indreṇa lokapālaiśca dvijaissiddhaissahādhunā //
sarvathā''nayanīyosau śaṃkaro yajñapūrttaye

sarvairbhavadbhirgaṃtavyaṃ yatra devo maheśvaraḥ//
dākṣāyaṇyā samaṃ śambhumānayadhvaṃ tvarānvitāḥ

tena sarvaṃ pavitraṃ syācchambhunā paramātmanā //
atrāgatena deveśāssāṃbena paramātmanā

yasya smṛtyā ca nāmoktyā samagraṃ sukṛtaṃ bhavet //
tasmātsarvaprayatnena hyānetavyo vṛṣadhvajaḥ

samāgate śaṃkare'tra pāvano hi bhavenmakhaḥ //
bhaviṣyatyanyathā'pūrṇaḥ satyametadbravīmyaham

brahmovāca //
tasya tadvacanaṃ śrutvā dakṣo roṣasamanvitaḥ//
uvāca tvaritaṃ mūḍhaḥ prahasanniva duṣṭadhīḥ

mūlaṃ viṣṇurdevatānāṃ yatra dharmassanātanaḥ//
samānīto mayā samyak kimūnaṃ yajñakarmaṇi

yasminvedāśca yajñāśca karmāṇi vividhāni ca //
pratiṣṭhitāni sarvāṇi so'sau viṣṇurihāgataḥ

satyalokātsamāyāto brahmā lokapitāmahaḥ //
vedaissopaniṣadbhiśca vividhairāgamaissaha

tathā suragaṇaissākamāgatassurarāṭ svayam//
tathā yūyaṃ samāyātā ṛṣayo vītakalmaṣāḥ

yeye yajñocitāśśāṃtāḥ pātrabhūtāssamāgatāḥ //
vedavedārthatattvajñāssarve yūyaṃ dṛḍhavratāḥ //

atraiva ca kimasmākaṃ rudreṇāpi prayojanam //
kanyā dattā mayā vipra brahmaṇā noditena hi

haro'kulīnosau vipra pitṛmātṛvivarjitaḥ //
bhūtapretapiśācānāṃ patireko duratyayaḥ

ātmasaṃbhāvito mūḍha stabdho maunī samatsaraḥ //
karmaṇyasminna yogyosau nānīto hi mayā'dhunā

tasmāttvamīdṛśaṃ vākyaṃ punarvācyaṃ na hi kvacit //
sarverbhavadbhiḥ kartavyo yajño me saphalo mahān

brahmovāca//
etacchrutvā vacastasya dadhīco vākyamabravīt//
sarveṣāṃ śṛṇvatāṃ devamunīnāṃ sārasaṃ yutam

dadhīca uvāca //
ayajñoyaṃ mahājāto vinā tena śivena hi //
vināśopi viśeṣeṇa hyatra te hi bhaviṣyati

evamuktvā dadhīcosāveka eva vinirgataḥ //
yajñavāṭācca dakṣasya tvaritaḥ svāśramaṃ yayau

tatonye śāṃkarā ye ca mukhyāśśivamatānugāḥ //
niryayussvāśramān sadyaśśāpaṃ dattvā tathaiva ca

munau vinirgate tasmin makhādanyeṣu duṣṭadhīḥ //
śivadrohī munīn dakṣaḥ prahasannidamabravīt

// dakṣa uvāca //
gataḥ śivapriyo vipro dadhīco nāma nāmataḥ //
anye tathāvidhā ye ca gatāste mama cādhvarāt

etacchubhataraṃ jātaṃ saṃmataṃ me hi sarvathā //
satyaṃ bravīmi deveśa surāśca munayastathā

vinaṣṭacittā maṃdāśca mithyāvādaratāḥ khalāḥ //
vedabāhyā durācārāstyājyāste makhakarmaṇi

vedavādaratā yūyaṃ sarve viṣṇupurogamāḥ //
yajñaṃ me saphalaṃ viprāssurāḥ kurvaṃtu mā'ciram

// brahmovāca //
ityākarṇya vacastasya śivamāyāvimohitāḥ //
yanmakhe devayajanaṃ cakrussarve surarṣayaḥ

iti tanmakhaśāpo hi varṇito me munīśvara //
yajñavidhvaṃsayogopi procyate śṛṇu sādaram

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe yajñaprāraṃbho nāma saptaviṃśo'dhyāyaḥ