Shiva Purana · Chapter 2.2.25

rāma uvāca //
ekadā hi purā devi śaṃbhuḥ paramasūtikṛt //
viśvakarmāṇamāhūya svaloke parataḥ pare

svadhenuśālāyāṃ ramyaṃ kārayāmāsa tena ca //
bhavanaṃ vistṛtaṃ samyak tatra siṃhāsanaṃ varam

tatracchatraṃ mahādivyaṃ sarvadādbhuta muttamam //
kārayāmāsa vighnārthaṃ śaṃkaro viśvakarmaṇā

śakrādīnāṃ juhāvāśu samastāndevatāgaṇān //
siddhagaṃdharvanāgānupade śāṃśca kṛtsnaśaḥ

devān sarvānāgamāṃśca vidhiṃ putrairmunīnapi //
devīḥ sarvā apsarobhirnānāvastusamanvitāḥ

devānāṃ ca tatharṣīṇāṃ siddhānāṃ phaṇināmapi//
ānayanmaṃgalakarāḥ kanyāḥ ṣoḍaśaṣoḍaśa

vīṇāmṛdaṃgapramukhavādyānnānāvidhānmune//
utsavaṃ kārayāmāsa vādayitvā sugāyanaiḥ

rājābhiṣekayogyāni dravyāṇi sakalauṣadhaiḥ
pratyakṣatīrthapāthobhiḥ paṃcakubhāṃśca pūritān

tathānyāssaṃvidhā divyā ānayatsvagaṇaistadā //
brahmaghoṣaṃ mahārāvaṃ kārayāmāsa śaṃkaraḥ

atho hariṃ samāhūya vaikuṃṭhātprītamānasaḥ//
tadbhaktyā pūrṇayā devi modatisma maheśvaraḥ

sumuhūrte mahādevastatra siṃhāsane vare //
upaveśya hariṃ prītyā bhūṣayāmāsa sarvaśaḥ

ābaddharamyamukuṭaṃ kṛtakautukamaṃgalam //
abhyaṣiṃcanmaheśastu svayaṃ brahmāṃḍamaṃḍape

dattavānnikhilaiśvaryaṃ yannaijaṃ nānyagāmi yat //
tatastuṣṭāva taṃ śaṃbhussvataṃtro bhaktavatsalaḥ

brahmāṇaṃ lokakartāramavocadvacanaṃ tvidam //
vyāpayansvaṃ varādhīnaṃ svataṃtraṃ bhaktavatsalaḥ

maheśa uvāca //
ataḥ prabhṛti lokeśa mannideśādayaṃ hariḥ //
mama vaṃdya svayaṃ viṣṇurjātassarvaśśṛṇoti hi

sarvairdevādibhistāta praṇamatvamamuṃ harim //
varṇayaṃtu hariṃ vedā mamaite māmivājñayā // १६ /
rāma uvāca //
ityuktvātha svayaṃ rudro'namadvai garuḍadhvajam //
viṣṇubhaktiprasannātmā varado bhaktavatsalaḥ

tato brahmādibhirdevaiḥ sarvarūpasuraistathā //
munisiddhādibhiścaivaṃ vaṃditobhūddharistadā

tato maheśo harayeśaṃsaddiviṣadāṃ tadā //
mahāvarān suprasanno dhṛtavānbhaktavatsalaḥ

maheśa uvāca //
tvaṃ kartā sarvalokānāṃ bhartā hartā madājñayā //
dātā dharmārthakāmānāṃ śāstā durnayakāriṇām

jagadīśo jagatpūjyo mahābalaparākramaḥ //
ajeyastvaṃ raṇe kvāpi mamāpi hi bhaviṣyasi

śaktitrayaṃ gṛhāṇa tvamicchādi prāpitaṃ mayā //
nānālīlāprabhāvatvaṃ svataṃtratvaṃ bhavatraye

tvaddveṣṭāro hare nūnaṃ mayā śāsyāḥ prayatnataḥ //
tvadbhaktānāṃ mayā viṣṇo deyaṃ nirvāṇamuttamam

māyāṃ cāpi gṛhāṇemāṃ duḥpraṇodyāṃ surādibhiḥ //
yayā saṃmohitaṃ viśvamacidrūpaṃ bhaviṣyati

mama bāhurmadīyastaṃ dakṣiṇo'sau vidhirhare //
asyāpi hi vidheḥ pātā janitāpi bhaviṣyasi

hṛdayaṃ mama yo rudrassa evāhaṃ na saṃśayaḥ //
pūjyastava sadā sopi brahmādīnāmapi dhruvam

atra sthitvā jagatsarvaṃ pālaya tvaṃ viśeṣataḥ //
nānāvatārabhedaiśca sadā nānoti kartṛbhiḥ

mama loke tavedaṃ va sthānaṃ ca paramarddhimat //
goloka iti vikhyātaṃ bhaviṣyati mahojjvalam

bhaviṣyaṃti hare ye te'vatārā bhuvi rakṣakāḥ //
madbhaktāstān dhruvaṃ drakṣye prītānatha nijādvarāta

rāma uvāca //
akhaṃḍaiśvaryamāsādya hareritthaṃ harassvayam //
kailāse svagaṇaistasmin svairaṃ krīḍatyumāpatiḥ

tadāprabhṛti lakṣmīśo gopaveṣobhavattathā //
ayāsīttatra suprītyā gopagopogavāṃ patiḥ

sopi viṣṇuḥ prasannātmā jugopa nikhilaṃ jagat //
nānāvatārassaṃdhartā vanakartā śivājñayā

idānīṃ sa caturddhātrāvātaracchaṃkarājñayā //
rāmohaṃ tatra bharato lakṣmaṇaśśatruheti ca

atha pitrājñayā devi sasītālakṣmaṇassati //
āgatohaṃ vane cādya duḥkhitau daivato 'bhavam

niśācareṇa me jāyā hṛtā sīteti kenacit //
anveṣyāmi priyāṃ cātra virahī baṃdhunā vane

darśanaṃ te yadi prāptaṃ sarvathā kuśalaṃ mama //
bhaviṣyati na saṃdeho mātaste kṛpayā sati

sītāprāptivaro devi bhaviṣyati na saṃśayaḥ //
taṃ hatvā duḥkhadaṃ pāpaṃ rākṣasaṃ tvadanugrahāt

mahadbhāgyaṃ mamādyaiva yadyakārṣṭāṃ kṛpāṃ yuvām //
yasmin sakaruṇau syātāṃ sa dhanyaḥ puruṣo varaḥ

itthamābhāṣya bahudhā supraṇamya satīṃ śivām //
tadājñayā vane tasmin vicacāra raghūdvahaḥ

athākarṇya satī vākyaṃ rāmasya prayatātmanaḥ //
hṛṣṭābhūtsā praśaṃsantī śivabhaktirataṃ hṛdi

smṛtvā svakarma manasākārṣīcchokaṃ suvistaram //
pratyāgacchadudāsīnā vivarṇā śivasannidhau

aciṃtayatpathi sā devī saṃcalaṃtī punaḥ punaḥ //
nāṃgīkṛtaṃ śivoktaṃ me rāmaṃ prati kudhīḥ kṛtā

kimuttaramahaṃ dāsye gatvā śaṃkarasannidhau //
iti saṃciṃtya bahudhā paścāttāpo'bhavattadā

gatvā śaṃbhusamīpaṃ ca praṇanāma śivaṃ hṛdā //
viṣaṇṇavadanā śokavyākulā vigataprabhā

atha tāṃ duḥkhitāṃ dṛṣṭvā papraccha kuśalaṃ haraḥ //
provāca vacanaṃ prītyā tatparīkṣā kṛtā katham

śrutvā śivavaco nāhaṃ kimapi praṇatānanā //
satī śokaviṣaṇṇā sā tasthau tatra samīpataḥ

atha dhyātvā maheśastu bubodha caritaṃ hṛdā //
dakṣajāyā mahāyogī nānālīlā viśāradaḥ

sasmāra svapaṇaṃ pūrvaṃ yatkṛtaṃ harikopataḥ //
tatprārthitotha rudrosau maryādā pratipālakaḥ

viṣādobhūtprabhostatra manasyevamuvāca ha //
dharmavaktā dharmakarttā dharmāvanakarassadā

śiva uvāca //
kuryāṃ ceddakṣajāyāṃ hi snehaṃ pūrvaṃ yathā mahān //
naśyenmama paṇaḥ śuddho lokalīlānusāriṇaḥ

brahmovāca //
itthaṃ vicārya bahudhā hṛdā tāmatyajatsatīm //
paṇaṃ na nāśayāmāsa vedadharmaprapālakaḥ

tato vihāya manasā satīṃ tāṃ parameśvaraḥ //
jagāma svagiri bhedaṃ jagāvaddhā sa hi prabhuḥ

calaṃtaṃ pathi taṃ vyomavāṇyuvāca maheśvaram //
sarvān saṃśrāvayan tatra dakṣajāṃ ca viśeṣataḥ

vyomavāṇyuvāca //
dhanyastvaṃ parameśāna tvattsamodya tathā paṇaḥ //
na kopyanyastrilokesmin mahāyogī mahāprabhuḥ

brahmovāca //
śrutvā vyomavaco devī śivaṃ papraccha viprabhā//
kaṃ paṇaṃ kṛtavānnātha brūhi me parameśvara

iti pṛṣṭopi giriśassatyā hitakaraḥ prabhuḥ //
nodvāhe svapaṇaṃ tasyai kaharyagre'karotpurā

tadā satī śivaṃ dhyātvā svapatiṃ prāṇavallabham//
sarvaṃ bubodha hetuṃ taṃ priyatyāgamayaṃ mune

tato'tīva śuśocāśu budhvā sā tyāgamātmanaḥ //
śaṃbhunā dakṣajā tasmānniśvasaṃtī muhurmuhuḥ

śivastasyāḥ samājñāya guptaṃ cakre manobhavam //
satye paṇaṃ svakīyaṃ hi kathā bahvīrvadanprabhuḥ

satyā prāpa sa kailāsaṃ kathayan vividhāḥ kathā //
vare sthitvā nijaṃ rūpaṃ dadhau yogī samādhibhṛt

tatra tasthau satī dhāmni mahāviṣaṇṇamānasā //
na bubodha caritraṃ tatkaścicca śivayormune

mahānkālo vyatīyāya tayoritthaṃ mahāmune //
svopāttadehayoḥ prabhvorlokalīlānusāriṇoḥ

dhyānaṃ tatyāja giriśastatassa paramārtihṛt //
tajjñātvā jagadaṃbā hi satī tatrājagāma sā

nanāmātha śivaṃ devī hṛdayena vidūyatā //
āsanaṃ dattavāñśaṃbhuḥ svasanmukha udāradhīḥ

kathayāmāsa suprītyā kathā bahvīrmanoramāḥ //
niśśokā kṛtavānsadyo līlāṃ kṛtvā ca tādṛśīm

pūrvavatsā sukhaṃ lebhe tatyāja svapaṇaṃ na saḥ //
netyāścaryaṃ śive tāta maṃtavyaṃ parameśvare

itthaṃ śivāśivakathāṃ vadanti munayo mune //
kila kecidavidvāṃso viyogaśca kathaṃ tayoḥ

śivāśivacaritraṃ ko jānāti paramārthataḥ //
svecchayā krīḍatasto hi caritaṃ kurutassadā

vāgarthāviva saṃpṛktau sadā khalu satīśivau//
tayorviyogassaṃbhāvyassaṃbhavedicchayā tayoḥ

iti śrīśivamahāpurāṇe ddvitīyāyāṃ rudrasaṃhitāyāṃ dvitīye satīkhaṃḍe satīviyogo nāma paṃcaviṃśo'dhyāyaḥ