Shiva Purana · Chapter 2.2.26

brahmovāca //
purābhavacca sarveṣāmadhvaro vidhinā mahān //
prayāge samavetānāṃ munīnāṃ ca mahā tmanām

tatra siddhāssamāyātāssanakādyāssurarṣayaḥ //
saprajāpatayo devā jñānino brahmadarśinaḥ

ahaṃ samāgatastatra parivārasamanvitaḥ //
nigamairāgamairyukto mūrtimadbhirmahāprabhaiḥ

samājobhūdvicitro hi teṣāmutsavasaṃyuḥ //
jñānavādo'bhavattatra nānāśāstrasa mudbhavaḥ

tasminnavasare rudrassabhavānīgaṇaḥ prabhuḥ //
trilokahitakṛtsvāmī tatrāgātsūktikṛnmune

dṛṣṭvā śivaṃ surāssarve siddhāśca munayastathā //
anamaṃstaṃ prabhuṃ bhaktyā tuṣṭuvuśca tathā hyaham

tasthuśśivājñayā sarve yathāsthānaṃ mudānvitāḥ //
prabhudarśanasaṃtuṣṭāḥ varṇayanto nijaṃ vidhim

tasminnavasare dakṣaḥ prajāpatipatiḥ prabhuḥ //
āgamattatra suprītassuvarcasvī yadṛcchayā

māṃ praṇamya sa dakṣo hi nyuṣṭastatra madājñayā //
brahmāṇḍādhipatirmānyo mānī tattvabahirmukhaḥ

stutibhiḥ praṇipātaiśca dakṣassarvaissurarṣibhiḥ //
pūjito varatejasvī karau badhvā vinamrakaiḥ

nānāvihārakṛnnāthassvataṃtra paramotikṛt //
nānāmattaṃ tadā dakṣaṃ svāsanastho maheśvaraḥ

dṛṣṭā'nataṃ haraṃ tatra sa me putro'prasannadhīḥ //
akupatsahasā rudre tadā dakṣaḥ prajāpatiḥ

krūradṛṣṭyā mahāgarvo dṛṣṭvā rudraṃ mahāprabhum //
sarvānsaṃśrāvayannuccairavocajjñānavarjitaḥ

ete hi sarve ca surāsurā bhṛśaṃ namaṃti māṃ vipravarāstatharṣayaḥ //
kathaṃ hyasau durjanavanmahāmanāstvabhūttu yaḥ pretapiśācasaṃvṛtaḥ

śmaśānavāsī nirapatrapo hyayaṃ kathaṃ praṇāmaṃ na karoti me'dhunā //
luptakriyo bhūtapiśācasevito matto'vidho nītividūṣakassadā

pākhaṃḍino durjanapāpa śīlā dṛṣṭvā dvijaṃ proddhataniṃdakāśca //
vadhvāṃ sadāsaktaratipravīṇastasmādamuṃ śaptumahaṃ pravṛttaḥ

brahmovāca //
ityevamuktvā sa mahākhalastadā ruṣānvito rudramidaṃ hyavocat //
śṛṇvaṃtvamī vipravarāstathā surā vadhyaṃ hi me cārhatha kartumetam

//
dakṣa uvāca // //
rudro hyayaṃ yajñabahiṣkṛto me varṇeṣvatītotha vivarṇarūpaḥ //
devairna bhāgaṃ labhatāṃ sahaiva śmaśānavāsī kulajanma hīnaḥ

// brahmovāca // //
iti dakṣoktamākarṇya bhṛgvādyā bahavo janāḥ //
agarhayan duṣṭasattvaṃ rudraṃ mattvāmaraissamam/ १९//
nandī niśamya tadvākyaṃ lālākṣotiruṣānvitaḥ //
abravīttvaritaṃ dakṣaṃ śāpaṃ dātumanā gaṇaḥ

nandīśvara uvāca //
rere śaṭha mahā mūḍha dakṣa duṣṭamate tvayā //
yajñabāhyo hi me svāmī maheśo hi kṛtaḥ katham

yasya smaraṇamātreṇa bhavaṃti saphalā makhāḥ //
tīrthāni ca pavitrāṇi soyaṃ śapto haraḥ katham

vṛthā te brahmacāpalyācchaptoyaṃ dakṣa durmate //
vṛthopahasitaścaivāduṣṭo rudro mahā prabhuḥ

yenedaṃ pālyate viśvaṃ sṛṣṭamaṃte vināśitam //
śaptoyaṃ sa kathaṃ rudro maheśo brāhmaṇādhama

evaṃ nirbhatsitastena nandinā hi prajāpatiḥ //
nandinaṃ ca śaśāpātha dakṣo roṣasamanvitaḥ

dakṣa uvāca //
yūyaṃ sarve rudragaṇā vedabāhyā bhavaṃtu vai //
vedamārgaparityaktāstathā tyaktā maharṣibhiḥ

pākhaṃḍavādaniratāḥ śiṣṭācārabahiṣkṛtāḥ //
madirāpānaniratā jaṭā bhasmāsthidhāriṇaḥ

brahmovāca //
iti śaptāstathā tena dakṣeṇa śivakiṃkarāḥ //
tacchrutvātiruṣāviṣṭobhavannaṃdī śivapriyaḥ///

pratyuvāca drutaṃ pakṣaṃ garvitaṃ taṃ mahākhalam //
śilādatanayo naṃdī tejasvī śivavallabhaḥ

nandīśvara uvāca//
re dakṣa śaṭha durbuddhe vṛthaiva śivakiṃkarāḥ //
śaptāste brahmacāpalyācchivatattvamajānatā

bhṛgvādyairduṣṭacittaiśca mūḍhaissa upahāsitaḥ//
mahā prabhurmaheśāno brāhmaṇatvādahaṃmate

ye rudravimukhāścātra brāhmaṇāstvādṛśāḥ khalāḥ//
rudratejaḥprabhāvatvātteṣāṃ śāpaṃ dadāmyaham

vedavādaratā yūyaṃ vedatattvabahirmukhāḥ //
bhavaṃtu satataṃ viprā nānyadastīti vādinaḥ

kāmātmānarssvargaparāḥ krodhalobhamadānvitāḥ//
bhavaṃtu satataṃ viprā bhikṣukā nirapatrapāḥ

vedamārgaṃ puraskṛtya brāhmaṇāśśūdrayājinaḥ //
daridrā vai bhaviṣyaṃti pratigraharatā ssadā

asatpratigrahāścaiva sarve nirayagāminaḥ //
bhaviṣyaṃti sadā dakṣa kecidvai brahmarākṣasāḥ

yaśśivaṃ surasāmānyamuddiśya parameśvaram //
druhyatyajo duṣṭamatistattvato vimukho bhavet

kūṭadharmeṣu geheṣu sadā grāmyasukhecchayā //
karmataṃtraṃ vitanutā vedavādaṃ ca śāśvatam

vinaṣṭānaṃdakamukho vismṛtātmagatiḥ paśuḥ //
bhraṣṭakarmānayasadā dakṣo bastamukho'cirāt

śaptāste kopinā tatra naṃdinā brāhmaṇā yadā//
hāhākāro mahānāsīcchapto dakṣeṇa ceśvaraḥ

tadākarṇyāmahatyaṃtamaniṃdaṃtaṃ muhurmuhuḥ//
bhṛgvādīnapi viprāṃśca vedasṛṭ śiva tattvavit

īśvaropi vacaḥ śrutvā naṃdinaḥ prahasanniva //
uvāca madhuraṃ vākyaṃ bodhayaṃstaṃ sadāśivaḥ

sadāśiva uvāca //
śṛṇu naṃdin mahāprājña na kartuṃ krodhamarhasi//
vṛthā śapto brahmakulo matvā śaptaṃ ca māṃ bhramāt

vedo maṃtrākṣaramayassākṣātsūktamayo bhṛśam //
sūkte pratiṣṭhito hyātmā sarveṣāmapi dehinām

tasmādātmavido nityaṃ tvaṃ mā śapa ruṣānvitaḥ //
śapyā na vedāḥ kenāpi durddhiyāpi kadācana

ahaṃ śapto na cedānīṃ tattvato boddhumarhasi//
śānto bhava mahādhīmansanakādivibodhakaḥ

yajñohaṃ yajñakarmāhaṃ yajñāṃgāni ca sarvaśaḥ //
yatātmā yajñanirato yajñabāhyohameva vai

koyaṃ kastvamime ke hi sarvohamapi tattvataḥ //
iti buddhyā hi vimṛśa vṛthā śaptāstvayā dvijāḥ

tattvajñānena nirhṛtya prapaṃcaracano bhava //
budhassvastho mahābuddhe nandin krodhādivarjitaḥ

// brahmovāca //
evaṃ prabodhitastena śambhunā nandikeśvaraḥ //
vivekaparamo bhūtvā śāṃto'bhūtkrodhavarjitaḥ

śivopi taṃ prabodhyāśu svagaṇaṃ prāṇavallabham //
sagaṇassa yayau tasmātsvasthānaṃ pramudānvitaḥ

dakṣopi sa ruṣāviṣṭastairddhijaiḥ parivāritaḥ //
svasthānaṃ ca yayau citte śivadro haparāyaṇaḥ

rudraṃ tadānīṃ pariśapyamānaṃ saṃsmṛtya dakṣaḥ parayā ruṣānvitaḥ //
śraddhāṃ vihāyaiva sa mūḍhabuddhirniṃdāparobhūcchivapūjakānām

ityukto dakṣadurbuddhiśśaṃbhunā paramātmanā //
parāṃ durdhiṣaṇāṃ tasya śṛṇu tāta vadāmyaham

//
iti śrīśivamahāpurāṇe dvitīyāyāṃ rudrasaṃhitāyāṃ dvitīyakhaṇḍe satyupākhyāne śivena dakṣavirodho nāma ṣaḍviṃśo'dhyāyaḥ