Shiva Purana · Chapter 2.2.21

// nārada uvāca //
samīcīnaṃ vacastāta sarvajñasya tavā'nagha //
mahādbhutaṃ śrutaṃ no vai caritaṃ śivayośśubham

vivāhaśca śrutassamyak sarvamohāpahārakaḥ //
paramajñānasaṃpanno maṃgalālaya uttamaḥ

bhūya eva vivitsā me caritaṃ śivayośśubham //
tadvarṇaya mahāprājña kṛpāṃ kṛtvā'tulāmaram

// brahmovāca //
samyakkāruṇikasyaiva mune te vicikitsitam //
yadahaṃ noditassaumya śivalīlānuvarṇane

vivāhya dakṣajāṃ devīṃ satīṃ trailokyamātaram //
gatvā svadhāma suprītyā yadakārṣīnnibodha me

tato harassa svagaṇassvasthānaṃ prāpya modanama //
devarṣe tatra vṛṣabhādavātaradatipriyāt

yathāyogyaṃ nijasthānaṃ praviśya sa satīsakhaḥ //
mumude'tīva devarṣe bhavācārakaraśśivaḥ

tato virūpākṣa imāṃ prāpya dākṣāyaṇīṃ gaṇān //
svīyāniryāpayāmāsa nadyādīn girikaṃdarāt

uvāca caitāstān sarvānnaṃdyādīnatisūnṛtam //
laukikīṃ rītimāśritya karuṇāsāgaraḥ prabhuḥ

maheśa uvāca //
yadāhaṃ ca smarāmyatra smaraṇādaramānasāḥ //
samāgamiṣyatha tadā matpārśvaṃ me gaṇā drutam

ityukte vāmadevena nadyādyāssvagaṇāśca te //
mahāvegā mahāvīrā nānāsthāneṣu saṃyayuḥ

īśvaropi tayā sārddhaṃ teṣu yāteṣu vibhramī //
dākṣāyaṇyā samaṃ reme rahasye mudito bhṛśam

kadācidvanya puṣpāṇi samāhṛtya manoharām //
mālāṃ vidhāya satyāstu hārasthāne sa yojayat

kadāciddarpaṇe caiva vīkṣatīmātmanassatīm //
anugamya haro vaktram svīyamapyavalokayata

kadācitkuṃḍalaṃ tasyā ullāsyollāsya saṃgataḥ//
badhnāti mocayatyeva sā svayaṃ mārjayatyapi

sarāgau caraṇāvasyāḥ pāvakenojjvalena ca //
nisargaraktau kurute pūrṇarāgau vṛṣadhvajaḥ

uccairapi yadākhyeyamanyeṣāṃ purato bahu //
tata karṇe kathayattyasyāharo draṣṭuṃ tadānanam

na dūramapi gantāsau samāgatya prayatnataḥ//
anubadhnāti nāmākṣī pṛṣṭhadeśenyamānasām

aṃtarhitastu tatraiva māyayā vṛṣabhadhvajaḥ //
tāmāliliṃga bhītyā svaṃ cakitā vyākulā'bhavat

sauvarṇapadmakalikātulye tasyā kucadvaye //
cakāra bhramarākāraṃ mṛganābhiviśeṣakam

hāramasyāḥ kucayugādviyojya sahasā haraḥ //
nyayojayacca tatraiva svakarasparśanaṃ muhuḥ

aṃgadānvalayānūrmānviśleṣya ca punaḥ punaḥ//
tatsthānātpunarevāsau tatsthāne pratyayojayat

kāliketi samāyāti savarṇā te sakhī tvimām //
yāsyatvasyāstathekṣaṃtyāḥ prottuṃgau sāhasaṃ kucau

kadācinmadanonmādacetanaḥ pramathādhipaḥ //
cakāra narma śarmāṇi tathākṛtpriyayā mudā

āhṛtya padmapuṣpāṇi ramyapuṣpāṇi śaṃkaraḥ //
sarvāṃgeṣu karoti sma puṣpābharaṇamādarāt

girikuṃjeṣu ramyeṣu satyā saha maheśvaraḥ //
vijahāra samasteṣu priyayā bhaktavatsalaḥ

tayā vinā sma no yāti nāsthito na sma ceṣṭate //
tayā vinā kṣamamapi śarma lebhe na śaṃkaraḥ

vihṛtya suciraṃ kālaṃ kailāsagirikuṃjare //
agamaddhimavatprasthaṃ sasmāra svecchayā smaran

tasminpraviṣṭe kāme tu vasaṃtaśśaṃkarāṃtike //
vitastāra nijaṃ bhāvaṃ hārdaṃ vijñāya yatprabho

sarve ca puṣpitā vṛkṣā latāścānyāśca puṣpitāḥ/
aṃbhāṃsi phullapadmāni padmāssabhramarāstathā

praviṣṭe tatra sadṛtau vavau sa malayo marut //
sugaṃdhigaṃdhapuṣpeṇa modakaśca sugaṃdhiyuk

saṃdhyārdracandrasaṃkāśāḥ palāśāśca virejire //
kāmāstravatsumanasaḥ pramodātpādapādharaḥ

babhuḥ paṃkajapuṣpāṇi sarassu saṃkalāñjanān //
saṃmohayitumudyuktā sumukhī vāyudevatā

nāgakeśaravṛkṣāśca svarṇavarṇaiḥ prasūnakaiḥ //
babhurmadanaketvābhā manojñāśśaṃkarāṃtike

lavaṃgavallīsurabhigaṃdhenodvāsya mārutam //
mohayāmāsa cetāṃsi bhṛśaṃ kāmijane purā

cāru pāvakacarcitsu susvarāścūtaśālinaḥ //
babhurmadanabāṇaughaparyaṃkamadanāvṛtāḥ

aṃbhāṃsi malahīnāni rejuḥ phullakuśāśayāḥ //
munīnāmiva cetāṃsi pravyaktajyotirudgamam

tuṣārāssūryaraśmīnāṃ saṃgamādagaman bahiḥ //
pramatvānīkṣyatekṣāśca salilīhṛdayāstadā

prasannāssaha candreṇa naniṣārāstadā'bhavan //
vibhāvaryaḥ priyeṇaivaṃ kāminyastu manoharāḥ

tasminkāle mahādevassaha satyā dharottame //
reme sa suciraṃ chandaṃ nikuṃjeṣu nadīṣu ca

tathā tena samaṃ reje tadā dākṣāyiṇi mune //
yathā haraḥ kṣaṇamapi śāṃtimāpa tayā vinā

saṃbhogaviṣaye devī satī tasya manaḥ priyā //
viśatīva harasyāṃge pāyayanniva tadrasam

tasyā kusumamālābhirbhūṣayansakalāṃ tanum //
svahastaracitābhistu navaśarmākarocca saḥ

ālāpairvīkṣitairhāsyaistathā saṃbhāṣaṇairharaḥ //
tasyādideśa girijāṃ sapatīvātmasaṃvidam

tadvaktracaṃdra pīyūṣapānasthiratanurharaḥ //
nānāvaiśeṣikīṃ tanvīmavasthāṃ sa kadācana

tadvaktrāmbujavāsena tatsaundaryyaiśca narmabhiḥ //
guṇairiva mahādaṃtī baddho nānyaviceṣṭitaḥ

iti himagirikuṃjaprasthabhāge darīṣu pratidinamabhireme dakṣaputryā maheśaḥ //
kratubhujaparimāṇaiḥ krīḍatastasya jātā daśa daśa ca surarṣe vatsarāḥ paṃca cānye

iti śrīśivamahāpurāṇe dvitīyāyāṃ rudrasaṃhi tāyāṃ dvitīye satīkhaṃḍe satīśivakrīḍāvarṇanaṃ nāmaikaviṃśodhyāyaḥ