Shiva Purana · Chapter 2.2.22

brahmovāca //
kadācidatha dakṣasya tanayā jaladāgame //
kailāsakṣmābhṛtaḥ prāha prasthasthaṃ vṛṣabhadhvajam

satyuvāca //
deva deva mahādeva śaṃbho matprāṇavallabha //
śṛṇu me vacanaṃ nātha śrutvā tatkuru mānada

ghanāgamoyaṃ saṃprāptaḥ kālaḥ paramadussahaḥ //
anekavarṇameghaughāssaṃgītāṃbaradikcayāḥ

vivāṃti vātā hṛdayaṃ hārayaṃtīta veginaḥ //
kadaṃbarajasā dhautāḥ pāthobinduvikarṣaṇāḥ

meghānāṃ garjitairuccairdhārāsāraṃ vimuṃcatām //
vidyutpatākināṃ tīvraḥ kṣubdhaṃ syātkasya no manaḥ

na sūryo dṛśyate nāpi meghacchanno niśāpatiḥ //
divāpi rātrivadbhāti virahi vyasanākaraḥ

meghānaikatra tiṣṭhaṃto dhvananta pavaneritāḥ //
pataṃta iva lokānāṃ dṛśyaṃte mūrdhni śaṃkara

vātāhatā mahāvṛkṣā nartaṃta iva cāṃbare //
dṛśyaṃte hara bhīrūṇāṃ trāsadāḥ kāmukepsitā

snigdhanīlāṃjanasyāśu sadivaughasya pṛṣṭhataḥ //
balākarājī vātyuccairyamunāpṛṣṭhaphenavat

kṣapākṣayeṣavalayaṃ dṛśyate kālikāgatā //
aṃbudhāviva saṃdīptapāvako vaḍavāmukhaḥ

prārohaṃtīha sasyāni maṃdiraṃ prāṅgaṇeṣvapi //
kimanyatra virūpākṣa sasyaudbhūtiṃ vadāmyaham

śyāmalai rājatairaktairviśadoyaṃ himācalaḥ //
maṃdarāśrayameghaughaḥ patrairdugdhāṃbudhiryathā

asamaśrīśca kuṭilaṃ bheje yasyātha kiṃśukān //
uccāvacān kalau lakṣmīrgantā saṃtyajya sajjanān

maṃdārastana pīlūnāṃ śabdena hṛṣitā muhuḥ //
kekāyaṃte prativane satataṃ pṛṣṭhasūcakam

meghotsukānāṃ madhuraścātakānāṃ manoharaḥ //
dhārāsāraśaraistāpaṃ petuḥ pratipathodgatam

meghānāṃ paśya maddehe durnayaṃ karakotkaraiḥ //
ye chādayaṃtyanugate mayūrāṃścātakāṃstathā

śikhasāraṃgayordṛṣṭvā mitrādapi parābhavam //
harṣaṃ gacchaṃti giriśaṃ vidūramapi mānasam

etasminviṣame kāle nīlaṃ kākāścakorakāḥ //
kurvaṃti tvāṃ vinā gehān kathaṃ śāṃtimavāpsyasi //

mahatīvādya no bhītirmā meghotthā pinākadhṛk //
yatasva yasmādvāsāya māciraṃ vacanānmama

kailāse vā himādrau vā mahākāśyāmatha kṣitau //
tatropayogyaṃ saṃvāsaṃ kuru tvaṃ vṛṣabhadhvaja

// brahmovāca //
evamuktastayā śaṃbhurdākṣāyaṇyā tathā'sakṛta //
saṃjahāsa ca śīrṣasthacandraraśmismitālayam

athovāca satīṃ devīṃ smitabhinnauṣṭhasaṃpuṭaḥ ///
mahātmā sarvatattvajñastoṣayanparameśvaraḥ

īśvaraḥ uvāca //
yatra prītyai mayā kāryo vāsastava manohare //
meghāstatra na gaṃtāraḥ kadācidapi matpriye

meghā nitaṃbaparyaṃtaṃ saṃcaraṃti mahībhṛtaḥ //
sadā prāleyasānostu varṣāsvapi manohare /

kailāsasya tathā devi pādagāḥ prāyaśo ghanāḥ //
saṃcaraṃti na gacchaṃti tata ūrddhvaṃ kadācana

sumerorvā girerūrddhvaṃ na gacchaṃti balāhakāḥ //
jambūmūlaṃ samāsādya puṣkarāvartakādayaḥ

ityukteṣu girīndreṣu yasyopari bhaveddhi te //
manorucirnivāsāya tamācakṣva drutaṃ hi me

svecchāvihāraistava kautukāni suvarṇapakṣānilavṛndavṛndaiḥ //
śabdottaraṃgairmadhurasvanaistairmudopageyāni girau himotthe

siddhāṅganāste racitāsanā bhuvamicchaṃti caivopahṛtaṃ sakautukam //
svecchāvihāre maṇikuṭṭime girau kurvanti ceṣyaṃti phalādidānakaiḥ

phaṇīndrakanyā girikanyakāśca yā nāgakanyāśca turaṃgamukhyāḥ //
sarvāstu tāste satataṃ sahāyatāṃ samācariṣyaṃtyanumodavibhramaiḥ

rūpaṃ tadevamatulaṃ vadanaṃ sucāru dṛṣṭvāṃganā nijavapurnijakāṃtisahyam //
helā nije vapuṣi rūpagaṇeṣu nityaṃ kartāra ityanimiṣekṣaṇacārurūpāḥ

yā menakā parvatarāja jāyā rūpairguṇaiḥ khyātavatī triloke //
sā cāpi te tatra manonumodaṃ nityaṃ kariṣyatyanunāthanādyaiḥ

puraṃ hi vargairgiṃrirājavaṃdyaiḥ prītiṃ vicinvadbhirudārarūpā //
śikṣā sadā te khalu śocitāpi kāryā'nvahaṃ prītiyutā guṇādyaiḥ

vicitraiḥ kokilālāpamodaiḥ kuṃjagaṇāvṛtam //
sadā vasaṃtaprabhavaṃ gaṃtumicchasi kiṃ priye

nānābahujalāpūrṇasaraśśīta samāvṛtam //
padminīśataśoyuktamacalendraṃ himālayam

sarvakāmapradairvṛkṣaiśśādvalaiḥ kalpasaṃjñakaiḥ //
sakṣaṇaṃ paśya kusumānyathāśvakari govraje

praśāṃtaśvāpadagaṇaṃ munibhiryatibhirvṛtam //
devālayaṃ mahāmāye nānāmṛgagaṇairyutam

sphaṭika svarṇavaprādyai rājataiśca virājitam //
mānasādisaroraṃgairabhitaḥ pariśobhitam

hiraṇmayai ratnanālaiḥ paṃkajairmukulairvṛtam //
śiśumāraistathāsaṃkhyaiḥ kacchapairmakaraiḥ karaiḥ

niṣevitaṃ maṃjulaiśca tathā nīlotpalādibhiḥ //
deveśi tasmānmuktaiśca sarvagaṃdhaiśca kuṃkumaiḥ

lasadgaṃdhajalaiḥ śubhrairāpūrṇaiḥ svacchakāṃtibhiḥ //
śādvalaistaruṇaistuṃgaistīrasthairupaśobhitam

nṛtyadbhiriva śākhoṭairvarjayaṃtaṃ svasaṃbhavam //
kāmadevaissārasaiśca mattacakrāṃgaśobhitaiḥ

madhurārāvibhirmodakāribhirbhramarādibhiḥ //
śabdāyamānaṃ ca mudā kāmoddīpanakārakam

vāsavasya kuberasya yamasya varuṇasya ca //
agneḥ koṇaparājasya mārutasya parasya ca

purībhiśśobhiśikharaṃ meroruccaissurālayam //
raṃbhāśacīmenakādiraṃbhorugaṇasevitam //

kiṃ tvamicchasi sarveṣāṃ parvatānāṃ hi bhūbhṛtām //
sārabhūte mahāramye saṃvihartuṃ mahāgirau

tatra devī sakhiyutā sāpsarogaṇamaṃḍitā //
nityaṃ kariṣyati śacī tava yogyāṃ sahāyatām

athavā mama kailāse parvateṃdre sadāśraye //
sthānamicchasi vitteśapurīparivirājite

gaṃgājalaughaprayate pūrṇacandrasamaprabhe //
darīṣu sānuṣu sadā brahmakanyābhyudīrite

nānāmṛgagaṇairyukte padmākaraśatāvṛte //
sarvairguṇaiśca sadvastusumerorapi suṃdari

sthāneṣveteṣu yatrāpi tavāṃtaḥkaraṇe spṛhā //
taṃ drutaṃ me samācakṣva vāsakartāsmi tatra te

brahmovāca //
itīrite śaṃkareṇa tadā dākṣāyaṇī śanaiḥ //
idamāha mahādevaṃ lakṣaṇaṃ svaprakāśanam

// satyuvāca //
himādrāveva vasitumahamicche tvayā saha //
na cirātkuru saṃvāsaṃ tasminneva mahāgirau

brahmovāca //
atha tadvākyamākarṇya haraḥ paramamohitaḥ //
himādriśikharaṃ tuṃgaṃ dākṣāyaṇyā samaṃ yayau

siddhāṃganāgaṇayutamagamyaṃ caiva pakṣibhiḥ //
agamacchikharaṃ ramyaṃ sarasīvanarājitam

vicitrarūpaiḥ kamalaiḥ śikharaṃ ratnakarburam//
bālārkasadṛśaṃ śaṃbhurāsasāda satīsakhaḥ

sphaṭikābhramaye tasmin śādavaladrumarājite
vicitrapuṣpāvalibhissarasobhiśca saṃyute

praphullataruśākhāgraṃ guṃjadbhramarasevitam/
paṃkeruhaiḥ praphullaiśca nīlotpalacayaistathā

śobhitaṃ cakravākādyaiḥ kādaṃbairhaṃsaśaṃkubhiḥ//
pramattasārasaiḥ krauṃcairnīlaskaṃdhaiśca śabditaiḥ

puṃskokilānāṃ ninadairmadhurairgaṇasevitaiḥ//
turaṃgavadanaissiddhairapsarobhiśca guhyakaiḥ

vidyādharībhirdevībhiḥ kinnarībhirvihāritam//
puraṃdhrībhiḥ pārvatībhiḥ kanyābhirabhisaṃgatam

vipaṃcītāṃtrikāmattamṛdaṃgapaṭahasvanaiḥ/
nṛtyadbhirapsarobhiśca kautukotthaiśca śobhitam

devikābhirdīrghikābhirgaṃdhibhissusamāvṛtam //
praphullakusumairnityaṃ sakuṃjairupaśobhitam

śailarājapurābhyarṇe śikhare vṛṣabhadhvajaḥ //
saha satyā ciraṃ reme evaṃbhūteṣu śobhanam //

tasminsvargasame sthāne divyamānena śaṃkaraḥ //
daśavarṣasahasrāṇi reme satyā samaṃ mudā

sa kadācittatassthānādanyadyāti sthalaṃ haraḥ //
kadācinmeruśikharaṃ devī devavṛtaṃ sadā

dvīpānnānā tathodyānavanāni vasudhātalam//
gatvāgatvā punastatrābhyetya reme satīsukham

na jajñe sa divā rātrau na brahmaṇi tapassamam //
satyāṃ hi manasā śaṃbhuḥ prītimeva cakāra ha

evaṃ mahādevamukhaṃ satyapaśyatsma sarvadā //
mahādevo'pi sarvatra sadādrākṣītsatīmukham

evamanyonyasaṃsargādanurāgamahīruham //
varddhayāmāsatuḥ kālīśivau bhāvāṃbusecanaiḥ

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe śivāśivavihāravarṇanaṃ nāma dvāviṃśo'dhyāyaḥ