Shiva Purana · Chapter 2.2.14

brahmovāca // //
etasminnantare devamune lokapitāmaha //
tatrāgamamahaṃ prītyā jñātvā taccaritaṃ drutam

asāṃtvayamahaṃ dakṣaṃ pūrvavatsuvicakṣaṇaḥ //
akārṣaṃ tena susnehaṃ tava suprītimāvahan

svātmajaṃ munivaryaṃ tvāṃ suprītyā devavallabham//
samāśvāsya samādāya pratyapadye svadhāma ha

tataḥ prajāpatirdakṣo'nunīto me nijastriyām //
janayāmāsa duhitṝssubhagāḥ ṣaṣṭisaṃmitāḥ

tāsāṃ vivāhakṛtavāndharmādibhirataṃdritaḥ //
tadeva śṛṇu suprītyā pravadāmi munīśvara

dadau daśa sutā dakṣo dharmāya vidhivanmune //
trayodaśa kaśyapāya munaye trinaveṃdave

bhūtāṃgiraḥ kṛśāśvebhyo dvedve putrī pradattavān //
tārkṣyāya cāparaḥ kanyā prasūtiprasavairyataḥ

trilokāḥ pūritāstanno varṇyate vyāsato bhayāt

kecidvadaṃti tāṃ jyeṣṭhāṃ madhyamāṃ cāpare śivām //
sarvānantarajāṃ kecitkalpabhedāttrayaṃ ca sata

anaṃtaraṃ sutotpatteḥ sapatnīkaḥ prajāpatiḥ //
dakṣo dadhau suprītmā tāṃ manasā jagadambikām

ataḥ premṇā ca tuṣṭāva girā gadgadayā hi saḥ //
bhūyobhūyo namaskṛtya sāṃjalirvinayānvitaḥ

santuṣṭā sā tadā devī vicāraṃ manasīti ca //
cakre'vatāraṃ vīriṇyāṃ kuryāṃ paṇavipūrtaye

atha sovāsa manasi dakṣasya jagadambikā //
vilalāsa tadātīva sa dakṣo munisattama

sumuhūrtenātha dakṣo'pi svapatnyāṃ nidadhe mudā //
dakṣapatnyāstadā citte śivovāsa dayānvitā

āvirbabhūvuścihnāni dohadasyākhilāni vai

vireje vīriṇī tāta hṛṣṭacittādhikā ca sā //
śivāvāsaprabhāvāttu mahāmaṃgala rūpiṇī

kulasya saṃpadaścaiva śruteścittasamunnateḥ //
vyadhatta sukriyā dakṣaḥ prītyā puṃsavanādikāḥ

utsavotīva saṃjātastadā teṣu ca karmasu //
vittaṃ dadau dvijātibhyo yathākāmaṃ prajāpatiḥ

atha tasminnavasare sarve haryādayassurāḥ //
jñātvā garbhagatāṃ devīṃ vīriṇyāste mudaṃ yayuḥ

tatrāgatya ca sarve te tuṣṭuvurjagadambikām //
lokopakārakariṇīṃ praṇamya ca muhurmuhuḥ

kṛtvā tataste bahudhā praśaṃsāṃ hṛṣṭamānasāḥ //
dakṣaprajāpateścaiva vīriṇyāssvagṛhaṃ yayuḥ

gateṣu navamāseṣu kārayitvā ca laukikīm //
gatiṃ śivā ca pūrṇe sā daśame māsi nārada

āvirbabhūva purato mātussadyastadā mune//
muhūrte sukhade candragrahatārānukūlake

tasyāṃ tu jātamātrāyāṃ suprīto'sau prajāpatiḥ //
saiva devīti tāṃ mene dṛṣṭvā tāṃ tejasolbaṇām

tadābhūtpuṣpasadvṛṣṭirmeghāśca vavṛṣurjalam //
diśaśśāṃtā drutaṃ tasyāṃ jātāyāṃ ca munīśvara

avādayaṃta tridaśāśśubhavādyāni khe gatāḥ//
jajjvaluścāgnayaśśāṃtāḥ sarvamāsītsumaṃgalam

vīriṇosaṃbhavāṃ dṛṣṭvā dakṣastāṃ jagadambikām //
namaskṛtya karau baddhvā bahu tuṣṭāva bhaktitaḥ

dakṣa uvāca //
maheśāni namastubhyaṃ jagadambe sanātani //
kṛpāṃ kuru mahādevi satye satyasvarūpiṇi

śivā śāṃtā mahāmāyā yoganidrā jaganmayī//
yā procyate vedavidbhirnamāmi tvāṃ hitāvahām

yayā dhātā jagatsṛṣṭau niyuktastāṃ purākarot //
tāṃ tvāṃ namāmi paramāṃ jagaddhātrīṃ maheśvarīm

yayā viṣṇurjagatsthityai niyuktastāṃ sadākarot //
tāṃ tvāṃ namāmi paramāṃ jagaddhātrīṃ maheśvarīm

yayā rudro jagannāśe niyuktastāṃ sadākarot//
tāṃ tvāṃ namāmi paramāṃ jagaddhātrīṃ maheśvarīm

rajassattvatamorūpāṃ sarvakāryakarīṃ sadā //
tridevajananīṃ devīṃ tvāṃ namāmi ca tāṃ śivām

yastvāṃ viciṃtayeddevīṃ vidyāvidyātmikāṃ parām //
tasya bhuktiśca muktiśca sadā karatale sthitā

/
yastvāṃ pratyakṣato devi śivāṃ paśyati pāvanīm //
tasyāvaśyaṃ bhavenmuktirvidyāvidyāprakāśikā

/
ye stuvaṃti jaganmātarbhavānīmaṃbiketi ca //
jaganmayīti durgeti sarvaṃ teṣāṃ bhaviṣyati

brahmovāca //
iti stutā jaganmātā śivā dakṣeṇa dhīmatā //
tathovāca tadā dakṣaṃ yathā mātā śṛṇoti na

sarvaṃ mumoha tathyaṃ ca tathā dakṣaḥ śṛṇotu tat //
nānyastathā śivā prāha nānotiḥ parameśvarī

devyuvāca //
ahamārādhitā pūrvaṃ sutārthaṃ te prajāpate //
īpsitaṃ tava siddhaṃ tu tapo dhāraya saṃprati

brahmovāca //
evamuktvā tadā devī dakṣaṃ ca nijamāyayā //
āsthāya śaiśavaṃ bhāvaṃ jananyaṃte ruroda sā

atha tadrodanaṃ śrutvā striyo vākyaṃ sasaṃbhramāḥ//
āgatāstatra suprītyā dāsyopi ca sasaṃbhramāḥ

dṛṣṭvāsiknīsutārūpaṃ nanandussarvayoṣitaḥ //
sarve paurajanāścāpi cakrurjayaravaṃ tadā

utsavaśca mahānāsīdgānavādyapurassaram //
dakṣosiknī mudaṃ lebhe śubhaṃ dṛṣṭvā sutānanam

dakṣaḥ śrutikulācāraṃ cakre ca vidhivattadā //
dānaṃ dadau dvijātibhyonyebhyaśca draviṇaṃ tathā

babhūva sarvato gānaṃ nartanaṃ ca yathocitam //
nedurvādyāni bahuśassumaṃgalapurassaram

atha haryādayo devāssarve sānucarāstadā //
munivṛndaiḥ samāgatyotsavaṃ cakruryathāvidhi

dṛṣṭvā dakṣasutāmaṃbāṃ jagataḥ parameśvarīm //
nemuḥ savinayāssarve tuṣṭuvuśca śubhaistavaiḥ

ūcussarve pramuditā giraṃ jayajayātmikām //
praśaśaṃsurmudā dakṣaṃ vīriṇīṃ ca viśeṣataḥ

tadometi nāma cakre tasyā dakṣastadājñayā //
praśastāyāssarvaguṇasattvādapi mudānvitaḥ

nāmānyanyāni tasyāstu paścājjātāni lokataḥ //
mahāmaṃgaladānyeva duḥkhaghnāni viśeṣataḥ

dakṣastadā hariṃ natvā māṃ sarvānamarānapi //
munīnapi karau baddhvā stutvā cānarca bhaktitaḥ

atha viṣṇvādayassarve supraśasyājanaṃdanam //
prītyā yayusvadhāmāni saṃsmaran saśivaṃ śivam

atastāṃ ca sutāṃ mātā susaṃskṛtya yathocitam //
śiśupānena vidhinā tasyai stanyādikaṃ dadau

pālitā sātha vīriṇyā dakṣeṇa ca mahātmanā //
vavṛdhe śuklapakṣasya yathā śaśikalānvaham

tasyāṃ tu sadguṇāssarve viviśurdvijasattama //
śaiśavepi yathā candre kalāssarvā manoharāḥ

ācarannijabhāvena sakhīmadhyagatā yadā //
tadā lilekha bhargasya pratimāmanvahaṃ muhuḥ

yadā jagau sugītāni śivā bālyocitāni sā //
tadā sthāṇuṃ haraṃ rudraṃ sasmāra smaraśāsanam

vavṛdhetīva daṃpatyoḥ pratyahaṃ karuṇātulā //
tasyā bālyepi bhaktāyāstayornityaṃ muhurmuhuḥ

sarvabālāguṇā krāṃtāṃ sadā svālayakāriṇīm//
toṣayāmāsa pitarau nityaṃnityaṃ muhurmuhuḥ

iti śrīśivamahāpurāṇe dvitīyāyāṃ rudrasaṃhitāyāṃ satī khaṇḍe satījanma bālalīlāvarṇanaṃnāma caturdaśo'dhyāyaḥ