Shiva Purana · Chapter 2.2.15

brahmovāca //
athaikadā pituḥ pārśve tiṣṭhaṃtīṃ tāṃ satīmaham //
tvayā saha munedrākṣaṃ sārabhūtāṃ trilokake

pitrā namaskṛtaṃ vīkṣya satkṛtaṃ tvāṃ ca māṃ satī //
praṇanāma mudā bhaktyā lokalīlānusāriṇī

praṇāmāṃte satīṃ vīkṣya dakṣadattaśubhāsane //
sthitohaṃ nārada tvaṃ ca vinatāmahamāgadam

tvāmeva yaḥ kāmayate yantu kāmayase sati //
tamāpnuhi patiṃ devaṃ sarvajñaṃ jagadīśvaram

yo nānyāṃ jagṛhe nāpi gṛhṇāti na grahīṣyati //
jāyāṃ sa te patirbhūyādananyasadṛśaśśubhe

ityuktvā suciraṃ tāṃ vai sthitvā dakṣālaye punaḥ//
visṛṣṭau tena saṃyātau svasthānaṃ tau ca nārada

dakṣobhavacca suprītaḥ tadākarṇya gatajvaraḥ //
ādade tanayāṃ svāṃ tāṃ matvā hi parameśvarīm

itthaṃ vihārai ruciraiḥ kaumārairbhaktavatsalā //
jahāvavasthāṃ kaumārīṃ svecchādhṛtanarākṛtiḥ

bālyaṃ vyatītya sā prāpa kiñcidyauvanatāṃ satī /९/
atīva tapasāṃgena sarvāṃgeṣu manoharā

dakṣastāṃ vīkṣya lokeśaḥ prodbhinnāṃtarvayasthitām //
ciṃtayāmāsa bhargāya kathaṃ dāsya imāṃ sutām // 2.2.15.१ ०//
atha sāpi svayaṃ bhargaṃ prāptumaicchattadānvaham //
piturmanogatiṃ jñātvā māturnikaṭamāgamat

papracchājñāṃ tapohetośśaṃkarasya vinītadhīḥ //
mātuśśivātha vairiṇyāssā sakhī parameśvarī

tatassatī maheśānaṃ patiṃ prāptuṃ dṛḍhavratā //
sā tamārādhayāmāsa gṛhe māturanujñayā // १ ३//
āśvine māsi nandāyāṃ tithāvānarca bhaktitaḥ //
guḍaudanaissalavaṇairharaṃ natvā nināya tam

kārtikasya caturdaśyāmapūpaiḥ pāyasairapi //
samākīrṇaissamārādhya sasmāra parameśvaram

mārgaśīrṣe'sitāṣṭamyāṃ satilaissayavaudanaiḥ //
pūjayitvā haraṃ kīlairnināya divasān satī

pauṣe tu śuklasaptamyāṃ kṛtvā jāgaraṇaṃ niśi //
apūjayacchivaṃ prātaḥ kṛśarānnena sā satī

māghe tu paurṇamāsyāṃ sa kṛtvā jāgaraṇaṃ niśi //
ārdravastrā nadītīre'karocchaṃkarapūjanam

tapasyasitabhūtāyāṃ kṛtvā jāgaraṇaṃ niśi///
viśeṣatassamānarca śailūṣaissarvayāmasu

caitre śuklacaturdaśyāṃ palāśairdamanaiśśivam //
apūjayaddivārātrau saṃsmaran sā nināya tam

rādhaśuklatṛtīyāyāṃ tilāhārayavaudanaiḥ//
pūjayitvā satī rudraṃ navyairmāsaṃ nināya tam

jyeṣṭhasya pūrṇimāyāṃ vai rātrai saṃpūjya śaṃkaram //
vasanairbṛhatīpuṣpairnirāhārā nināya tam

āṣāḍhasya caturdaśyāṃ śuklāyāṃ kṛṣṇavāsasā/
bṛhatīkusumaiḥ pūjā rudrasyākāri vai tayā

śrāvaṇasya sitāṣṭamyāṃ caturdaśyāṃ ca sā śivam//
yajñopavītairvāsobhiḥ pavitrairapyapūjayat

bhādre kṛṣṇatrayodaśyāṃ puṣpairnānāvidhaiḥ phalaiḥ //
saṃpūjya ca caturdaśyāṃ cakāra jalabho janam

nānāvidhaiḥ phalaiḥ puṣpaissasyaistatkālasaṃbhavaiḥ //
cakre suniyatāhārā japanmāse śivārcanam

sarvamāse sarvadine śivārcanaratā satī//
dṛḍhavratābhavaddevī svecchādhṛtanarākṛtiḥ

itthaṃ naṃdāvrataṃ kṛtsnaṃ samāpya susamāhitā //
dadhyau śivaṃ satī premṇā niścalābhūdananyadhīḥ

etasminnaṃtare devā munayaścākhilā mune //
viṣṇuṃ māṃ ca puraskṛtya yayurdraṣṭuṃ satītapaḥ //

dṛṣṭāgatya satī devairmūrtā siddhirivāparā //
śivadhyānamahāmagnā siddhāvasthāṃ gatā tadā

cakruḥ sarve surāssatye mudā sāṃjalayo natim //
munayaśca nataskaṃdhā viṣṇvādyāḥ prītamānasāḥ

atha sarve suprasannā viṣṇvādyāśca surarṣayaḥ //
praśaśaṃsustapastasyāssatyāstasmātsavismayāḥ

tataḥ praṇamya tāṃ devīṃ punaste munayassurāḥ //
jagmurgirivaraṃ sadyaḥ kailāsaṃ śivavallabham

sāvitrīsahitaścāhaṃ saha lakṣmyā mudānvitaḥ //
vāsudevopi bhagavāñjagāmātha harāṃtikam

gatvā tatra prabhuṃ dṛṣṭvā supraṇamya susaṃbhramāḥ//
tuṣṭuvurvividhaiḥ stotraiḥ karau baddhvā vinamrakāḥ

devā ūcuḥ //
namo bhagavate tubhyaṃ yata etaccarācaram //
puruṣāya maheśāya pareśāya mahātmane

ādibījāya sarveṣāṃ cidrūpāya parāya ca //
brahmaṇe nirvikārāya prakṛteḥ puruṣasya ca

ya idaṃ pratipaṃcyedaṃ yenedaṃ vicakāsti hi //
yasmādidaṃ yataścedaṃ yasyedaṃ tvaṃ ca yatnataḥ

yosmātparasmācca paro nirvikārī mahāprabhuḥ //
īkṣate yassvātmanīdaṃ taṃ natāḥ sma svayaṃbhuvam

aviddhadṛk paraḥ sākṣī sarvātmā 'nekarūpadhṛk //
ātmabhūtaḥ parabrahma tapaṃtaṃ śaraṇaṃ gatāḥ

na yasya devā ṛṣayaḥ siddhāśca na viduḥ padam //
kaḥ punarjaṃturaparo jñātumarhati veditum

didṛkṣavo yasya padaṃ muktasaṃgāssusādhavaḥ //
caritaṃ sugatirnastvaṃ salokavratamavraṇam

tvajjanmādivikārā no vidyaṃte kepi duḥkhadā //
tathāpi māyayā tvaṃ hi gṛhṇāsi kṛpayā ca tān

tasmai namaḥ pareśāya tubhyamāścaryakarmaṇe //
namo girāṃ vidūrāya brahmaṇe paramātmane

arūpāyorurūpāya parāyānaṃtaśaktaye //
trilokapataye sarvasākṣiṇe sarvagāya ca

nama ātmapradīpāya nirvāṇasukhasaṃpade //
jñānātmane namaste'stu vyāpakāyeśvarāya ca

naiṣkarmyeṇa sulabhyāya kaivalyapataye namaḥ //
puruṣāya pareśāya namaste sarvadāya ca

kṣetrajñāyātmarūpāya sarvapratyayahetave

sarvādhyakṣāya mahate mūlaprakṛtaye namaḥ //
puruṣāya pareśāya namaste sarvadāya ca

trinetrāyeṣuvaktrāya sadābhāsāya te namaḥ //
sarvendriyaguṇadraṣṭre niṣkāraṇa namostu te

trilokakāraṇāyāthāpavargāya namonamaḥ //
apavargapradāyāśu śaraṇāgatatāriṇe

sarvāmnāyāgamānāṃ codadhaye parameṣṭhine //
parāyaṇāya bhaktānāṃ guṇānāṃ ca namostu te

namo guṇāraṇicchanna cidūṣmāya maheśvara //
mūḍhaduṣprāptarūpāya jñānihṛdvāsine sadā

paśupāśavimokṣāya bhaktasanmuktidāya ca //
svaprakāśāya nityāyā'vyayāyājasrasaṃvide

pratyagdraṣṭrai'vikārāya paramaiśvarya dhāriṇe //
yaṃ bhajanti caturvarge kāmayaṃtīṣṭasadgatim //
so'bhūdakaruṇastvaṃ naḥ prasanno bhava te namaḥ

ekāṃtinaḥ kaṃcanārthaṃ bhaktā vāṃchaṃti yasya na //
kevalaṃ caritaṃ te te gāyaṃti paramaṃgalam

akṣaraṃ paramaṃ brahmatamavyaktākṛtiṃ vibhum //
adhyātmayogagamyaṃ tvāṃ paripūrṇaṃ stumo vayam

atīṃdriyamanādhāraṃ sarvādhāramahetukam //
anaṃtamādyaṃ sūkṣmaṃ tvāṃ praṇamāmo'khileśvaram

haryādayo'khilā devāstathā lokāścarācarāḥ //
nāmarūpavibhedena phalgvyā ca kalayā kṛtāḥ

yathārciṣognessavituryāṃti niryāṃti vāsakṛt //
gabhastayastathāyaṃ vai pravāho gauṇa ucyate

na tvaṃ devo 'suro martyo na tiryaṅ na dvijaḥ prabho //
na strī na ṣaṃḍho na pumānsadasanna ca kiṃcana

niṣedhaśeṣassarvaṃ tvaṃ viśvakṛdviśva pālakaḥ //
viśvalayakṛdviśvātmā praṇatāssmastamīśvaram

yogaraṃdhitakarmāṇo yaṃ prapaśyanti yoginaḥ //
yogasaṃbhāvite citte yogeśaṃ tvāṃ natā vayam

namostu te'sahyavega śaktitraya trayīmaya //
namaḥ prasannapālāya namaste bhūriśaktaye

kadiṃdriyāṇāṃ durgeśānavāpya paravartmane //
bhaktoddhāraratāyātha namaste gūḍhavarcase

yacchaktyāhaṃ dhiyātmānaṃ haṃta veda na mūḍhadhī //
taṃ duratyayamāhātmyaṃ tvāṃ nataḥ smo mahāprabhum

brahmovāca //
iti stutvā mahādevaṃ sarve viṣṇvādikāssurāḥ //
tūṣṇīmāsanprabhoragre sadbhaktinatakaṃdharāḥ

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe naṃdāvratavidhānaśivastuti varṇanaṃ nāma paṃcadaśo'dhyāyaḥ