Shiva Purana · Chapter 2.2.13

nārada uvāca //
brahmanvidhe mahā prājña vada no vadatāṃ vara //
dakṣe gṛhaṃ gate prītyā kimabhūttadanaṃtaram

brahmovāca //
dakṣaḥ prajāpatirgatvā svāśramaṃ hṛṣṭamānasaḥ //
sargaṃ cakāra bahudhā mānasaṃ mama cājñayā

tamabṛṃhitamālokya prajāsargaṃ prajāpatiḥ //
dakṣo nivedayāmāsa brahmaṇe janakāya me

dakṣa uvāca //
brahmaṃstāta prajānātha varddhante na prajāḥ prabho //
mayā viracitāssarvāstāvatyo hi sthitāḥ khalu

kiṃ karomi prajānātha varddheyuḥ kathamātmanā //
tadupāyaṃ samācakṣva prajāḥ kuryāṃ na saṃśayaḥ

brahmovāca //
dakṣa prajāpate tāta śṛṇu me paramaṃ vacaḥ //
tatkuruṣva suraśreṣṭha śivaste śaṃ kariṣyati

yā ca pañcajanasyāṃga sutā ramyā prajāpateḥ //
asiknī nāma patnītve prajeśa pratigṛhyatām

vāmavyavāyadharmastvaṃ prajāsargamimaṃ punaḥ //
tadvidhāyāṃ ca kāminyāṃ bhūriśo bhāvayiṣyasi

brahmovāca //
tatassamutpādayituṃ prajā maithunadharmataḥ //
upayeme vīraṇasya nideśānme sutāṃ tataḥ

atha tasyāṃ svapatnyāṃ ca vīriṇyāṃ sa prajāpatiḥ //
haryaśvasaṃjñānayutaṃ dakṣaḥ putrānajījanat

apṛthagdharmaśīlāste sarva āsan sutā mune //
pitṛbhaktiratā nityaṃ vedamārgaparāyaṇāḥ

pitṛproktāḥ prajāsargakaraṇārthaṃ yayurdiśam //
pratīcīṃ tapase tāta sarve dākṣāyaṇāssutāḥ

tatra nārāyaṇasarastīrthaṃ paramapāvanam//
gamo yatra saṃjāto divyasindhusamudrayoḥ

tadupasparśanādeva protpannamatayo' bhavan //
dharme pāramahaṃse ca vinirddhūtamalāśayāḥ

prajāvivṛddhaye te vai tepira tatra sattamāḥ //
dākṣāyaṇā dṛḍhātmānaḥ pitrādeśa suyaṃtritāḥ

tvaṃ ca tān nārada jñātvā tapatassṛṣṭi hetave //
agamastatra bhūrīṇi hārdamājñāya māpateḥ

adṛṣṭvā taṃ bhuvassṛṣṭi kathaṃ kartuṃ samudyatāḥ //
haryaśvā dakṣatanayā ityavocastamādarāt

brahmovāca //
tanniśamyātha haryaśvāste tvaduktamataṃdritāḥ //
autpattikadhiyassarve svayaṃ vimamṛśurbhṛśam

suśāstrajanakādeśaṃ yo na veda nivartakam//
sa kathaṃ guṇaviśraṃbhī kartuṃ sargamupakramet

iti niścitya te putrāssudhiyaścaikacetasaḥ //
praṇamya taṃ parikramyāyurmārgamanivartakam

nārada tvaṃ manaśśaṃbhorloṃkānanyacaro mune //
nirvikāro maheśānamanovṛttikarastadā

kāle gate bahutare mama putraḥ prajāpatiḥ //
nāśaṃ niśamya putrāṇāṃ nāradādanvatapyata

muhurmuhuruvāceti suprajātvaṃ śucāṃ padam //
śuśoca bahuśo dakṣaśśivamāyāvimohitaḥ

ahamāgatya suprītyā sāṃtvayaṃ dakṣamātmajam //
śāṃtibhāvaṃ pradarśyaiva devaṃ prabalamityuta

atha dakṣaḥ paṃcajanyā mayā sa parisāṃtvitaḥ //
sabalāśvābhidhān putrān sahasraṃ cāpyajījanat

tepi jagmustatra sutāḥ pitrādiṣṭā dṛḍhavratāḥ //
prajāsarge atra siddhāssvapūrvabhrātaro yayuḥ

tadupasparśanādeva naṣṭāghā vimalāśayāḥ //
tepurmahattapastatra japanto brahma suvratāḥ //

prajāsargodyatāṃstān vai jñātvā gatveti nārada //
pūrvavaccāgado vākyaṃ saṃsmarannaiśvarīṃ gatim

bhrātṛpaṃthānamādiśya tvaṃ mune moghadarśanaḥ //
ayāścorddhvagatiṃ te'pi bhrātṛmārgaṃ yayussutāḥ

utpātān bahuśo'paśyattadaiva sa prajāpatiḥ //
vismitobhūtsa me putro dakṣo manasi duḥkhitaḥ

pūrvavattvatkṛtaṃ dakṣaśśuśrāva cakito bhṛśam //
putranāśaṃ śuśocāti putraśoka vimūrchitaḥ

cukrodha tubhyaṃ dakṣosau duṣṭoyamiti cābravīt //
āgatastatra daivāttvamanugrahakarastadā

śokāviṣṭassa dakṣo hi roṣavisphuritādharaḥ //
upalabhya tamāhatya dhigdhik procya vigarhayan

dakṣa uvāca //
kiṃ kṛtaṃ te'dhamaśreṣṭha sādhūnāṃ sādhuliṃgataḥ //
bhikṣomārgo'rbhakānāṃ vai darśitassādhukāri no

ṛṇaistribhiramuktānāṃ lokayorubhayoḥ kṛtaḥ //
vighātaśśreyaso'mīṣāṃ nirdayena śaṭhena te

ṛṇāni trīṇyapākṛtya yo gṛhātpravrajetpumān//
mātaraṃ pitaraṃ tyaktvā mokṣamicchanvrajatyadhaḥ

nirdayastvaṃ sunirlajjaśśiśudhībhidyaśo'pahā//
hareḥ pārṣadamadhye hi vṛthā carasi mūḍhadhīḥ

muhurmuhurabhadraṃ tvamacaro me'dhamā 'dhama //
vibhavedbhramataste'taḥ padaṃ lokeṣu sthiram

śaśāpeti śucā dakṣastvāṃ tadā sādhusaṃmatam//
bubodha neśvarecchāṃ sa śivamāyāvimohitaḥ

śāpaṃ pratyagrahīśca tvaṃ sa mune nirvikāradhīḥ //
eṣa eva brahmasādho sahate sopi ca svayam

iti śrīśiva mahāpurāṇe dvitīyāyāṃ rudrasaṃhitāyāṃ dvi० satīkhaṃḍe dakṣasṛṣṭau nāradaśāpo nāma trayodaśo'dhyāyaḥ