Shiva Purana · Chapter 2.1.16

brahmovāca //
śabdādīni ca bhūtāni paṃcīkṛtvāhamātmanā //
tebhyaḥ sthūlaṃ nabho vāyuṃ vahniṃ caiva jalaṃ mahīm

parvatāṃśca samudrāṃśca vṛkṣādīnapi nārada //
kalādiyugaparyetānkālānanyānavāsṛjam

sṛṣṭyaṃtānaparāṃścāpi nāhaṃ tuṣṭo'bhava nmune //
tato dhyātvā śivaṃ sāmbaṃ sādhakānasṛjaṃ mune

marīciṃ ca svanetrābhyāṃ hṛdayādbhṛgumeva ca //
śiraso'girasaṃ vyānātpulahaṃ munisattamam

udānācca pulastyaṃ hi vasiṣṭhañca samānataḥ //
kratuṃ tvapānācchrotrābhyāmatriṃ dakṣaṃ ca prāṇataḥ

asṛjaṃ tvāṃ tadotsaṃgācchāyāyāḥ kardamaṃ munim //
saṃkalpādasṛjaṃ dharmaṃ sarvasādhanasādhanam

evametānahaṃ sṛṣṭvā kṛtārthassādhakottamān //
abhavaṃ muniśārdūla mahādevaprasādataḥ

tato madājñayā tāta dharmaḥ saṃkalpasaṃbhavaḥ //
mānavaṃ rūpamāpannassādhakaistu pravartitaḥ

tato'sṛjaṃ svagātrebhyo vividhebhyo'mitānsutān //
surāsurādikāṃstebhyo dattvā tāṃ tāṃ tanuṃ mune

tato'haṃ śaṃkareṇātha preritoṃ'targatena ha //
dvidhā kṛtvātmano dehaṃ dvirūpaścābhavaṃ mune

arddhena nārī puruṣaścārddhena saṃtato mune /
sa tasyāmasṛjaddvaṃdvaṃ sarvasādhanamuttamam

svāyaṃbhuvo manustatra puruṣaḥ parasādhanam //
śatarūpābhidhā nārī yoginī sā tapasvinī

sā punarmanunā tena gṛhītātīva śobhanā //
vivāhavidhinā tātā'sṛjatsargaṃ samaithunam

tasyāṃ tena samutpannastanayaśca priyavrataḥ //
tathaivottānapādaśca tathā kanyātrayaṃ punaḥ

ākūtirdevahūtiśca prasūtiriti viśrutāḥ //
ākūtiṃ rucaye prādātkardamāya tu madhyamām

dadau prasūtiṃ dakṣāyottānapādānujāṃ sutāḥ //
tāsāṃ prasūtiprasavaissarvaṃ vyāptaṃ carācaram

ākūtyāṃ ca ruceścābhūdvaṃdvaṃ yajñaśca dakṣiṇā //
yajñasya jajñire putrā dakṣiṇāyāṃ ca dvādaśa

devahūtyāṃ kardamācca bahvyo jātāssutā mune //
daśājjātāścatasraśca tathā putryaśca viṃśatiḥ

dharmāya dattā dakṣeṇa śraddhādyāstu trayodaśa //
śṛṇu tāsāṃ ca nāmāni dharmastrīṇāṃ munīśvara

śraddhā lakṣmīrdhṛtistuṣṭiḥ puṣṭirmedhā tathā kriyā //
vasuḥrbuddhi lajjā śāṃtiḥ siddhiḥ kīrtistrayodaśa

tābhyāṃ śiṣṭā yavīyasya ekādaśa sulocanāḥ //
khyātissatpathasaṃbhūtiḥ smṛtiḥ prītiḥ kṣamā tathā

sannatiścānurūpā ca ūrjā svāhā svadhā tathā //
bhṛgurbhavo marīciśca tathā caivāṃgirā muniḥ

pulastyaḥ pulahaścaiva kratuścarṣivarastathā //
atrirvāsiṣṭho vahniśca pitaraśca yathākramam

khyātāstā jagṛhuḥ kanyā bhṛgvādyāssādhakā varāḥ //
tatassaṃpūritaṃ sarvaṃ trailokyaṃ sacarācaram

evaṃ karmānurūpeṇa praṇināmaṃbikāpate//
ājñayā bahavo jātā asaṃkhyātā dvijarṣabhāḥ

kalpabhedena dakṣasya ṣaṣṭiḥ kanyāḥ prakīrtitāḥ //
tāsāṃ daśa ca dharmāya śaśine saptaviṃśatim

vidhinā dattavāndakṣaḥ kaśyapāya trayodaśa //
catasraḥ pararūpāya dadau tārkṣyāya nārada

bhṛgvaṃgiraḥ kṛśāśvebhyo dve dve kanye ca dattavān //
tābhyastebhyastu saṃjātā bahvī sṛṣṭiścarācarā

trayodaśamitāstasmai kaśyapāya mahātmane //
dattā dakṣeṇa yāḥ kanyā vidhivanmunisattama

tāsāṃ prasūtibhirvyāptaṃ trailokyaṃ sacarācaram //
sthāvaraṃ jaṃgamaṃ caiva śūnya naiva tu kiṃcana

devāśca ṛṣayaścaiva daityāścaiva prajajñire //
vṛkṣāśca pakṣiṇaścaiva sarve parvatavīrudhaḥ

dakṣakanyāprasūtaiśca vyāptamevaṃ carācaram //
pātālatalamārabhya satyalokāvadhi dhruvam

brahmāṃḍaṃ sakalaṃ vyāptaṃ śūnyaṃ naiva kadācana //
evaṃ sṛṣṭiḥ kṛtā samyagbrahmaṇā śaṃbhuśāsanāt

satī nāma triśūlāgre sadā rudreṇa rakṣitā //
taporthaṃ nirmitā pūrvaṃ śaṃbhunā sarvaviṣṇunā

saiva dakṣātsamudbhūtā lokakāryārthameva ca //
līlāṃ cakāra bahuśo bhaktoddharaṇahetave//

vāmāṃgo yasya vaikuṃṭho dakṣiṇāṃgo'hameva ca //
rudro hṛdayajo yasya trividhastu śivaḥ smṛtaḥ

ahaṃ viṣṇuśca rudraśca guṇāstraya udāhṛtāḥ//
svayaṃ sadā nirguṇaśca parabrahmāvyayaśśivaḥ

viṣṇussattvaṃ rajo'haṃ ca tamo rudra udāhṛtaḥ//
lokācārata ityevaṃ nāmato vastuto'nyathā

aṃtastamo bahissattvo viṣṇūrudrastathā mataḥ //
aṃtassattvastamobāhyo rajohaṃ sarvethā mune //

rājasī ca surā devī sattvarūpāttu sā satī //
lakṣmīstamomayī jñeyā virūpā ca śivā parā

evaṃ śivā satī bhūtvā śaṃkareṇa vivāhitā //
pituryajñe tanuṃ tyaktvā nādāttāṃ svapadaṃ yayau

punaśca pārvatī jātā devaprārthanayā śivā //
tapaḥ kṛtvā suvipulaṃ punaśśivamupāgatā

tasyā nāmānyanekāni jātāni ca munīśvara//
kālikā caṃḍikā bhadrā cāmuṃḍā vijayā jayā

jayaṃtī bhadrakālī ca durgā bhagavatīti ca //
kāmākhyā kāmadā hyambā mṛḍānī sarvamaṃgalā

nāmadheyānyanekāni bhuktimuktipradāni ca//
guṇakarmānurūpāṇi prāyaśastatra pārvatī

guṇamayyastathā devyo devā guṇamayāstrayaḥ //
militvā vividhaṃ sṛṣṭeścakruste kāryamuttamam

evaṃ sṛṣṭiprakāraste varṇito munisattama//
śivājñayā viracito brahmāṃḍasya mayā'khilaḥ //

paraṃ brahma śivaḥ proktastasya rūpāstrayaḥ surāḥ //
ahaṃ viṣṇuśca rudraśca guṇabhedānurūpataḥ

śivayā ramate svairaṃ śivaloke manorame //
svataṃtraḥ paramātmā hi nirguṇassaguṇo'pi vai

tasya pūrṇavatāro hiṃ rudrassākṣācchivaḥ smṛtaḥ //
kailāse bhavanaṃ ramyaṃ paṃcavaktraścakāra ha //
brahmāṃḍasya tathā nāśe tasya nāśosti vai na hi

iti śrīśivamahāpurāṇe dvitīyāyāṃ rudrasaṃhitāyāṃ prathama khaṃḍe sṛṣṭyupākhyāne brahmanāradasaṃvāde sṛṣṭivarṇano nāma ṣoḍaśo'dhyāyaḥ