Shiva Purana · Chapter 2.1.14

ṛṣaya ūcuḥ // //
vyāsaśiṣya mahābhāga kathaya tvaṃ pramāṇataḥ //
kaiḥ puṣpaiḥ pūjitaśśaṃbhuḥ kiṃ kiṃ yacchati vai phalam

// sūta uvāca // //
śaunakādyāśca ṛṣayaḥ śṛṇutādarato'khilam //
kathayāmyadya suprītyā puṣpārpaṇavinirṇayam

eṣa eva vidhiḥ pṛṣṭo nāradena maharṣiṇā //
provāca paramaprītyā puṣpārpaṇavinirṇayam

brahmovāca//
kamalairbilvapatraiśca śatapatraistathā punaḥ //
śaṃkhapuṣpaistathā devaṃ lakṣmīkāmo'rcayecchivam

etaiśca lakṣasaṃkhyākaiḥ pūjitaścedbhavecchivaḥ //
pāpahānistathā vipra lakṣmīssyānnātra saṃśayaḥ

viṃśatiḥ kamalānāṃ tu prasthamekamudāhṛtam //
bilvo dalasahasreṇa prasthārddhaṃ paribhāṣitam

śatapatrasahasreṇa prasthārddhaṃ paribhāṣitam //
palaiḥ ṣoḍaśabhiḥ pratthaḥ palaṃ ṭaṃkadaśasmṛtaḥ

anenaiva tu mānena tulāmāropayedyadā//
sarvānkāmānavāpnoti niṣkāmaścecchivo bhavet

rājyasya kāmuko yo vai pārthivānāṃ ca pūjayā //
toṣayecchaṃkaraṃ devaṃ daśakoṣṭyā munīśvarāḥ

liṃgaṃ śivaṃ tathā puṣpamakhaṇḍaṃ taṃdulaṃ tathā //
carcitaṃ caṃdanenaiva jaladhārāṃ tathā punaḥ

pratirūpaṃ tathā maṃtraṃ bilvīdalamanuttamam //
athavā śatapatraṃ ca kamalaṃ vā tathā punaḥ

śaṃkhapuṣpaistathā proktaṃ viśeṣeṇa purātanaiḥ //
sarvakāmaphalaṃ divyaṃ paratrehāpi sarvathā

dhūpaṃ dīpaṃ ca naivedyamarghaṃ cārārtika tathā //
pradakṣiṇāṃ namaskāraṃ kṣamāpanavisarjane

kṛtvā sāṃgaṃ tathā bhojyaṃ kṛtaṃ yena bhavediha //
tasya vai sarvathā rājyaṃ śaṃkaraḥ pradadāti ca

pradhānyakāmuko yo vai tadarddhenārcayetpumān //
kārāgṛhagato yo vai lakṣenaivārcayeddhanam

rogagrasto yadā syādvai tadarddhenārcayecchivam //
kanyākāmo bhavedyo vai tadarddhena śivaṃ punaḥ

vidyākāmastathā yaḥ syāttadarddhenārcayecchivam //
vāṇīkāmo bhavedyo vai ghṛtenaivārcayecchivam

uccāṭanārthaṃ śatrūṇāṃ tanmitenaiva pūjanam //
māraṇe vai tu lakṣeṇa mohane tu tadardhataḥ

sāmaṃtānāṃ jaye caiva koṭipūjā praśasyate //
rājñāmayutasaṃkhyaṃ ca vaśīkaraṇakarmaṇi

yaśase ca tathā saṃkhyā vāhanādyaiḥ sahasrikā //
muktikāmorcayecchaṃbhuṃ paṃcakoṭyā subhaktitaḥ

jñānārthī pūjayetkoṭyā śaṃkaraṃ loka śaṃkaram //
śivadarśanakāmo vai tadardhena prapūjayet

tathā mṛtyuṃjayo jāpyaḥ kāmanāphalarūpataḥ //
paṃcalakṣā japā yarhi pratyakṣaṃ tu bhavecchivaḥ

lakṣeṇa bhajate kaściddvitīye jātisaṃbhavaḥ //
tṛtīye kāmanālābhaścaturthe taṃ prapaśyati

paṃcamaṃ ca yadā lakṣaṃ phalaṃ yacchatyasaṃśayam //
anenaiva tu maṃtreṇa daśalakṣe phalaṃ bhavet

muktikāmo bhavedyo vai darbhaiśca pūjanaṃ caret //
lakṣasaṃkhyā tu sarvatra jñātavyā ṛṣisattama

āyuṣkāmo bhavedyo vai dūrvābhiḥ pūjanaścaret //
putrakāmo bhavedyo vai dhattūrakusumaiścaret

raktadaṇḍaśca dhattūraḥ pūjane śubhadaḥ smṛtaḥ //
agastyakusumaiścaiva pūjakasya mahadyaśaḥ

bhuktimuktiphalaṃ tasya tulasyāḥ pūjayedyadi //
arkapuṣpaiḥ pratāpaśca kubjakalhārakaistathā

japākusumapūjā tu śatrūṇāṃ mṛtyudā smṛtā //
rogoccāṭanakānīha karavīrāṇi vai kramāt

baṃdhukairbhūṣaṇāvāptirjātyāvāhānna saṃśayaḥ //
atasīpuṣpakairdevaṃ viṣṇuvallabhatāmiyāt//

śamīpatraistathā muktiḥ prāpyate puruṣeṇa ca //
mallikākusumairdattaiḥ striyaṃ śubhatarāṃ śivaḥ

yūthikākusumaiśśasyairgṛhaṃ naiva vimucyate //
karṇikāraistathā vastrasaṃpattirjāyate nṛṇām

nirguṇḍīkusumairloke mano nirmalatāṃ vrajet //
bilvapatraistathā lakṣaiḥ sarvānkāmānavāpnuyāt

śṛṅgārahārapuṣpaistu varddhate sukha sampadā //
ṛtujātāni puṣpāṇi muktidāni na saṃśayaḥ

rājikākusumānīha śatrūṇāṃ mṛtyudāni ca //
eṣāṃ lakṣaṃ śive dadyāddadyācca vipulaṃ phalam

vidyate kusumaṃ tanna yannaiva śivavallabham//
caṃpakaṃ ketakaṃ hitvā tvanyatsarvaṃ samarpayet

ataḥ paraṃ ca dhānyānāṃ pūjane śaṃkarasya ca //
pramāṇaṃ ca phalaṃ sarvaṃ prītyā śṛṇu ca sattama

taṃdulāropaṇe nṝṇāṃ lakṣmī vṛddhiḥ prajāyate //
akhaṇḍitavidhau vipra samyagbhaktyā śivopari

ṣaṭkenaiva tu prasthānāṃ tadardhena tathā punaḥ //
paladvayaṃ tathā lakṣamānena samadāhṛtam

pūjāṃ rudrapradhānena kṛtvā vastraṃ susundaram //
śivopari nyasettatra taṃdulārpaṇamuttamam //2.1.14.४०
upari śrīphalaṃ tvekaṃ gaṃdhapuṣpādibhistathā //
ropayitvā ca dhūpādi kṛtvā pūjāphalaṃ bhavet//

prajāpatyadvayaṃ raupyamāsaṃkhyā ca dakṣiṇā //
deyā tadupadeṣṭre hi śaktyā vā dakṣiṇā matā

ādityasaṃkhyayā tatra brāhmaṇānbhojayettataḥ //
lakṣapūjā tathā jātā sāṅgaśca mantrapūrvakam

śatamaṣṭottaraṃ tatra maṃtre vidhirudāhṛtaḥ//
tilānāṃ ca palaṃ lakṣaṃ mahāpātakanāśanam

ekādaśapalaireva lakṣamānamudāhṛtam //
pūrvavatpūjanaṃ tatra kartavyaṃ hitakāmyayā

bhojyā vai brāhmaṇāstasmādatra kāryā nareṇa hi //
mahāpātakajaṃ dukhaṃ tatkṣaṇānnaśyati dhruvam

yavapūjā tathā proktā lakṣeṇa paramā śive //
prasthānāmaṣṭakaṃ caiva tathā prasthārddhakaṃ punaḥ

paladvayayutaṃ tatra mānametatpurātanam //
yavapūjā ca munibhiḥ svargasaukhyavivarddhinī

prājāpatyaṃ brāhmaṇānāṃ kartavyaṃ ca phalepsubhiḥ //
godhūmānnaistathā pūjā praśastā śaṃkarasya vai

saṃtatirvarddhate tasya yadi lakṣāvadhiḥ kṛtā //
droṇārddhena bhavellakṣaṃ vidhānaṃ vidhipūrvakam

mudgānāṃ pūjane devaḥ śivo yacchati vai sukham //
prasthānāṃ saptakenaiva prasthārddhenāthavā punaḥ

paladvayayutenaiva lakṣamuktaṃ purātanaiḥ //
brāhmaṇāśca tathā bhojyā rudrasaṃkhyāpramāṇataḥ

priyaṃgupūjanādeva dharmādhyakṣe parātmani //
dharmārthakāmā varddhaṃte pūjā sarvasukhāvahā

prasthaikena ca tasyoktaṃ lakṣamekaṃ purātanaiḥ//
brahmabhojaṃ tathā proktamarkasaṃkhyāpramāṇataḥ

rājikāpūjanaṃ śaṃbhośśatrormṛtyukaraṃ smṛtam//
sārṣapānāṃ tathā lakṣaṃ palairviśatisaṃkhyayā

teṣāṃ ca pūjanādeva śatrormṛtyurudāhṛtaḥ //
āḍhakīnāṃ dalaiścaiva śobhayitvārcayecchivam

vṛtā gauśca pradātavyā balīvardastathaiva ca //
marīcisaṃbhavā pūjā śatrornāśakarī smṛtā

āḍhakīnāṃ dalaiścaiva raṃjayi tvārcayecchivam //
nānāsukhakarī hyeṣā pūjā sarvaphalapradā

dhānyamānamiti proktaṃ mayā te munisattama //
lakṣamānaṃ tu puṣpāṇāṃ śṛṇu prītyā munīśvara

prasthānāṃ ca tathā caikaṃ śaṃkhapuṣpasamudbhavam //
proktaṃ vyāsena lakṣaṃ hi sūkṣmamānapradarśinā

prasthairekādaśairjātilakṣamānaṃ prakīrtitam //
yūthikāyāstathā mānaṃ rājikāyāstadarddhakam

prasthairviṃśatikaiścaiva mallikāmāna muttamam //
tilapuṣpaistathā mānaṃ prasthānnyūnaṃ tathaiva ca

tataśca dviguṇaṃ mānaṃ karavīrabhave smṛtam //
nirguṃḍīkusume mānaṃ tathaiva kathitaṃ budhaiḥ

karṇikāre tathā mānaṃ śirīṣakusume punaḥ //
baṃdhujīve tathā mānaṃ prasthānaṃ daśakena ca

ityādyairvividhai mānaṃ dṛṣṭvā kuryācchivārcanam //
sarvakāmasamṛdhyarthaṃ muktyarthaṃ kāmanojjhitaḥ

ataḥ paraṃ pravakṣyāmi dhārāpūjāphalaṃ mahat //
yasya śravaṇamātreṇa kalyāṇaṃ jāyate nṛṇām

vidhānapūrvakaṃ pūjāṃ kṛtvā bhaktyā śivasya vai //
paścācca jaladhārā hi kartavyā bhaktitatparaiḥ

jvarapralāpaśāṃtyarthaṃ jala dhārā śubhāvahā //
śatarudriyamaṃtreṇa rudrasyaikādaśena tu

rudrajāpyena vā tatra sūkten pauruṣeṇa vā //
ṣaḍaṃgenātha vā tatra mahāmṛtyuṃjayena ca

gāyatryā vā namoṃtaiśca nāmabhiḥ praṇavādibhiḥ //
maṃtraivāthāgamoktaiśca jaladhārādikaṃ tathā

sukhasaṃtānavṛddhyarthaṃ dhārāpūjanamuttamam //
nānādravyaiḥ śubhairdivyaiḥ prītyā sadbhasmadhāriṇā

ghṛtadhārā śive kāryā yāvanmaṃtrasahasrakam //
tadā vaṃśasya vistāro jāyate nātra saṃśayaḥ //

evaṃ maduktamaṃtreṇa kāryaṃ vai śivapūjanam //
brahmabhojyaṃ tathā proktaṃ prājāpatyaṃ munīśvaraiḥ

kevalaṃ dugdhadhārā ca tadā kāryā viśeṣataḥ //
śarkarāmiśritā tatra yadā buddhijaḍo bhavet

tasyā saṃjāyate jīvasadṛśī buddhiruttamā //
yāvanmaṃtrāyutaṃ na syāttāvaddhārāprapūjanam

yadā coccāṭanaṃ dehe jāyate kāraṇaṃ vinā //
yatra kutrāpi vā prema duḥkhaṃ ca parivarddhitam

svagṛhe kalaho nityaṃ yadā caiva prajāyate //
taddhārāyāṃ kṛtāyāṃ vai sarvaṃ duḥkhaṃ vilīyate

śatrūṇāṃ tāpanārthaṃ vai tailadhārā śivopari //
kartavyā suprayatnena kāryasiddhirdhuvaṃ bhavet

māsi tenaiva tailena bhogavṛddhiḥ prajāyate //
sārṣapenaiva tailena śatrunāśo -bhaveddhruvam

madhunā yakṣarājo vai gacchecca śivapūjanāta //
dhārā cekṣurasasyāpi sarvānandakarī śive

dhārā gaṃgājalasyaiva bhuktimuktiphalapradā //
etāssarvāśca yāḥ proktā mṛtyaṃjayasamudbhavāḥ

tatrā'yutapramāṇaṃ hi kartavyaṃ tadvidhānataḥ //
kartavyaṃ brāhmaṇānāṃ ca bhojyaṃ vai rudrasaṃkhyayā

etatte sarvamākhyātaṃ yatpṛṣṭo'haṃ munīśvara //
etadvai saphalaṃ loke sarvakāmahitāvaham

skaṃdomāsahitaṃ śaṃbhuṃ saṃpūjya vidhinā saha //
yatphalaṃ labhate bhaktyā tadvadāmi yathāśrutam

atra bhuktvākhilaṃ saukhyaṃ putrapautrādibhiḥ śubham //
tato yāti maheśasya lokaṃ sarvasukhāvaham

/
sūryakoṭipratīkāśairvimānaiḥ sarvakāmagaiḥ //
rudrakanyāsamākīrṇairgeyavādyasamanvitaiḥ

krīḍate śivabhūtaśca yāvadābhūtasaṃplavam //
tato mokṣamavāpnoti vijñānaṃ prāpya cāvyayam

iti śrīśivamahāpurāṇe prathama khaṃḍe dvitīyāyāṃ rudrasaṃhitāyāṃ sṛṣṭyupākhyāne śivapūjāvidhānavarṇano nāma caturdaśo'dhyāyaḥ