Shiva Purana · Chapter 2.1.10

parameśvara uvāca //
anyacchṛṇu hare viṣṇo śāsanaṃ mama suvrata//
sadā sarveṣu lokeṣu mānyaḥ pūjyo bhaviṣyasi

brahmaṇā nirmite loke yadā dukhaṃ prajāyate //
tadā tvaṃ sarvaduḥkhānāṃ nāśāya tatparo bhava

sahāyaṃ te kariṣyāmi sarvakārye ca dussahe //
tava śatrūnhaniṣyāmi dussādhyānparamotkaṭān

vividhānavatārāṃśca gṛhītvā kīrtimuttamām //
vistāraya hare loke tāraṇāya paro bhava

guṇarūpo hyayaṃ rudro hyanena vapuṣā sadā //
kāryaṃ kariṣye lokānāṃ tavāśakyaṃ na saṃśayaḥ

rudradhyeyo bhavāṃścaiva bhavaddhyeyo harastathā //
yuvayorantarannaiva tava rudrasya kiṃcana

vastutaścāpi caikatvaṃ varato'pi tathaiva ca //
līlayāpi mahāviṣṇo satyaṃ satyaṃ na saṃśayaḥ

rudrabhakto naro yastu tava niṃdāṃ kariṣyati //
tasya puṇyaṃ ca nikhilaṃ drutaṃ bhasma bhaviṣyati

narake patanaṃ tasya tvaddveṣātpuruṣottama //
madājñayā bhavedviṣṇo satyaṃ satyaṃ na saṃśayaḥ

loke'sminmuktido nṝṇāṃ bhuktidaśca viśeṣataḥ //
dhyeyaḥ pūjyaśca bhaktānāṃ nigrahānugrahau kuru

ityuktvā māṃ ca dhātāraṃ haste dhṛtvā svayaṃ harim //
kathayāmāsa duḥkheṣu sahāyo bhava sarvadā

sarvādhyakṣaśca sarveṣu bhuktimuktipradāyakaḥ //
bhava tvaṃ sarvathā śreṣṭhassarvakāmaprasādhakaḥ

sarveṣāṃ prāṇarūpaśca bhava tvaṃ ca mamājñayā //
saṃkaṭe bhajanīyo hi sa rudro mattanurhare

tvāṃ yassamāśrito nūnaṃ māmeva sa samāśritaḥ//
aṃtaraṃ yaśca jānāti niraye patati dhruvam

āyurbalaṃ śṛṇuṣvādya tridevānāṃ viśeṣataḥ //
saṃdeho'tra na karttavyo brahmaviṣṇu harātmanām

caturyugasahasrāṇi brahmaṇo dinamucyate //
rātriśca tāvatī tasya mānametatkrameṇa ha

teṣāṃ triṃśaddinermāso dvādaśaistaiśca vatsaraḥ//
śatavarṣapramāṇena brahmāyuḥ parikīrtitam

brahmaṇo varṣamātreṇa dinaṃ vaiṣṇavamucyate //
so'pi varṣaśataṃ yāvadātmamānena jīvati

vaiṣṇavena tu varṣeṇa dinaṃ raudraṃ bhaveddhruvam//
haro varṣaśate yāte nararūpeṇa saṃsthitaḥ

yāvaducchvasitaṃ vaktre sadāśivasamudbhavam //
paścācchaktiṃ samabhyeti yāvanniśvasitaṃ bhavet

niḥśvāsocchvasitānāṃ ca sarveṣāmeva dehinām //
brahmaviṣṇuharāṇāṃ ca gaṃdharvoragarakṣasām

ekaviṃśasahasrāṇi śataiḥ ṣaḍbhiśśatāni ca//
ahorātrāṇi coktāni pramāṇaṃ surasattamau

ṣaḍbhicchavāsaniśvāsaiḥ palamekaṃ pravartitam //
ghaṭī ṣaṣṭi palāḥ proktā sā ṣaṣṭyā ca dinaṃ niśā

niśvāsocchvāsitānāṃ ca parisaṃkhyā na vidyate //
sadāśivasamutthānametasmātso'kṣayaḥ smṛtaḥ

itthaṃ rūpaṃ tvayā tāvadrakṣaṇīyaṃ mamājñayā //
tāvatsṛṣṭeśca kāryaṃ vai kartavyaṃ vividhairguṇaiḥ

brahmovāca//
ityākarṇya vacaśśaṃbhormayā ca bhagavānhariḥ//
praṇipatya ca viśveśaṃ prāha maṃdataraṃ vaśī

viṣṇuruvāca //
śaṃkara śrūyatāmetatkṛpāsiṃdho jagatpate //
sarvametatkariṣyāmi bhavadājñāvaśānugaḥ

mama dhyeyassadā tvaṃ ca bhaviṣyasi na cānyathā //
bhavatassarvasāmarthyaṃ labdhaṃ caiva purā mayā

kṣaṇamātramapi svāmiṃstava dhyānaṃ paraṃ mama //
cetaso dūrato naiva nirgacchatu kadācana

mama bhaktaśca yaḥ svāmim̐stava niṃdā kariṣyati //
tasya vai niraye vāsaṃ prayaccha niyataṃ dhruvam

tvadbhakto yo bhavetsvāminmama priyataro hi saḥ //
evaṃ vai yo vijānāti tasya muktirna durlabhā

mahimā ca madīyodya varddhito bhavatā dhruvam //
kadācidaguṇaścaiva jāyate kṣamyatāmiti

brahmovāca //
tadā śaṃbhustadīyaṃ hi śrutvā vacanamuttamam //
uvāca viṣṇuṃ suprītyā kṣamyā te'guṇatā mayā

evamuktvā hariṃ nau sa karābhyāṃ parameśvaraḥ //
pasparśa sakalāṃgeṣu kṛpayā tu kṛpānidhiḥ

ādiśya vividhāndharmānsarvaduḥkhaharo haraḥ //
dadau varānanekāṃścāvayorhitacikīrṣayā

tatassa bhagavāñchaṃbhuḥ kṛpayā bhaktavatsalaḥ //
dṛṣṭayā saṃpaśyato śīghraṃ tatraivāṃtaradhīyataḥ

tadā prakṛti loke'smim̐lliṃgapūjāvidhiḥ smṛtaḥ //
liṃge pratiṣṭhitaśśaṃbhurbhuktimuktipradāyakaḥ

liṃgavedirmahādevī liṃgaṃ sākṣānmaheśvaraḥ //
layanālliṃgamityuktaṃ tatraiva nikhilaṃ jagat

yastu laiṃgaṃ paṭhennityamākhyānaṃ liṃgasannidhau //
ṣaṇmāsācchivarūpo vai nātra kāryā vicāraṇā

yastu liṃgasamīpe tu kāryaṃ kiṃcitkaroti ca //
tasya puṇyaphalaṃ vaktuṃ na śaknomi mahāmune

iti śrīśivamahāpurāṇe dvitīyāyāṃ rudrasaṃhitāyāṃ prathamakhaṃḍe sṛṣṭyupākhyāne parama śivatattvavarṇanaṃ nāma daśamo'dhyāyaḥ