Shiva Purana · Chapter 2.1.11

ṛṣaya ūcuḥ //
sūtasūta mahābhāga vyāsaśiṣya namostu te //
śrāvitādyādbhutā śaivakathā paramapāvanī

tatrādbhutā mahādivyā liṃgotpattiḥ śrutā śubhā //
śrutvā yasyāḥ prabhāvaṃ ca duḥkhanāśo bhavediha

brahmanāradasaṃvādamanusṛtya dayānidhe//
śivārcanavidhiṃ brūhi yena tuṣṭo bhavecchivaḥ

brāhmaṇaiḥ kṣatriyairvaiśyaiḥ śūdrairvā pūjyate śivaḥ//
kathaṃ kāryaṃ ca tad brūhi yathā vyāsamukhācchrutam

tacchrutvā vacanaṃ teṣāṃ śarmadaṃ śrutisaṃmatam//
uvāca sakalaṃ prītyā muni praśnānusārataḥ

sūta uvāca //
sādhu pṛṣṭaṃ bhavadbhiśca tadrahasyaṃ munīśvarāḥ //
tadahaṃ kathayāmyadya yathābuddhi yathāśrutam

bhavadbhiḥ pṛcchayate tadvattathā vyāsena vai purā//
pṛṣṭaṃ sanatkumārāya tacchrutaṃ hyupamanyunā

tato vyāsena vai śrutvā śivapūjādikaṃ ca yat //
mahyaṃ ca pāṭhitaṃ tena lokānāṃ hitakāmyayā

tacchrutaṃ caiva kṛṣṇena hyupamanyormahātmanaḥ //
tadahaṃ kathayiṣyāmi yathā brahmāvadatpurā

brahmovāca //
śṛṇu nārada vakṣyāmi saṃkṣepālliṃgapūjanam //
vaktuṃ varṣaśatenāpi na śakyaṃ vistarānmune

evaṃ tu śāṃkaraṃ rūpaṃ mukhaṃ svacchaṃ sanātanam //
pūjayetparayā bhaktyā sarvakāmaphalāptaye

dāridryaṃ rogaduḥkhaṃ ca pīḍanaṃ śatrusaṃbhavam //
pāpaṃ caturvidhaṃ tāvadyāvannārcayate śivam

sampūjite śive deve sarvaduḥkhaṃ vilīyate //
saṃpadyate sukhaṃ sarvaṃ paścānmuktiravāpyate

ye vai mānuṣyamāśritya mukhyaṃ saṃtānatassukham //
tena pūjyo mahādevaḥ sarvakāryārthasādhakaḥ

brāhmaṇāḥ kṣatriyā vaiśyāśśūdrāśca vidhivatkramāt //
śaṃkarārcāṃ prakurvaṃtu sarvakāmārthasiddhaye

prātaḥkāle samutthāya muhūrte brahmasaṃjñake//
gurośca smaraṇaṃ kṛtvā śaṃbhoścaiva tathā punaḥ

tīrthānāṃ smaraṇaṃ kṛtvā dhyānaṃ caiva harerapi //
mamāpi nirjarāṇāṃ vai munyādīnāṃ tathā mune/१७//
tataḥ stotraṃ śubhaṃ nāma gṛhṇīyādvidhipūrvakam //
tatotthāya malotsargaṃ dakṣiṇasyāṃ careddiśi

ekānte tu vidhiṃ kuryānmalotsargassa yacchrutam //
tadeva kathayāmyadya śṛṇvādhāya mano mune

śuddhāṃ mṛdaṃ dvijo lipyātpaṃcavāraṃ viśuddhaye //
kṣatriyaśca caturvāraṃ vaiśyo varatrayaṃ tathā

śūdro dvivāraṃ ca mṛdaṃ gṛhṇīyādvidhiśuddhaye //
gude vātha sakṛlliṃge vāramekaṃ prayatnataḥ

daśavāraṃ vāmahaste saptavāraṃ dvayostathā //
pratyekampādayostāta trivāraṃ karayoḥ punaḥ

strībhiśca śūdravatkāryaṃ mṛdāgrahaṇamuttamam//
hastau pādau ca prakṣālya pūrvavanmṛdamāharet

daṃtakāṣṭhaṃ tataḥ kuryātsvavarṇakramato naraḥ

vipraḥ kuryāddaṃtakāṣṭhaṃ dvādaśāṃgulamānataḥ//
ekādaśāṃgulaṃ rājā vaiśyaḥ kuryāddaśāṃgulam

śūdro navāgulaṃ kuryāditi mānamidaṃ smṛtam //
kāladoṣaṃ vicāryyaiva manudṛṣṭaṃ vivarjayet

ṣaṣṭyādyāmāśca navamī vratamastaṃ raverdinam//
tathā śrāddhadinaṃ tāta niṣiddhaṃ radadhāvane

snānaṃ tu vidhivatkāryaṃ tīrthādiṣu krameṇa tu //
deśakālaviśeṣeṇa snānaṃ kāryaṃ samaṃtrakam

ācamya prathamaṃ tatra dhautavastreṇa cādharet //
ekānte susthale sthitvā saṃdhyāvidhimathācaret

yathāyogyaṃ vidhiṃ kṛtvā pūjāvidhimathārabhet //
manastu susthiraṃ kṛtvā pūjāgāraṃ praviśya ca

pūjāvidhiṃ samādāya svāsane hyupaviśya vai //
nyāsādikaṃ vidhāyādau pūjayetkramaśo haram

prathamaṃ ca gaṇādhīśaṃ dvārapālāṃstathaiva ca //
dikpālāṃśca susaṃpūjya paścātpīṭhaṃ prakalpayet

atha vā'ṣṭadalaṃ kṛtvā pūjādravyaṃ samīpataḥ //
upaviśya tatastatra upaveśya śivam prabhum

ācamanatrayaṃ kṛtvā prakṣālya ca punaḥ karau //
prāṇāyāmatrayaṃ kṛtvā madhye dhyāyecca tryambakam

paṃcavaktraṃ daśabhujaṃ śuddhasphaṭikasannibham //
sarvābharaṇasaṃyuktaṃ vyāghracarmottarīyakam

tasya sārūpyatāṃ smṛtvā dahetpāpaṃ narassadā //
śivaṃ tataḥ samutthāpya pūjayetparameśvaram

dehaśuddhiṃ tataḥ kṛtvā mūla maṃtraṃ nyasetkramāt //
sarvatra praṇavenaiva ṣaḍaṃganyāsamācaret

kṛtvā hṛdi prayogaṃ ca tataḥ pūjāṃ samārabhet //
pādyārghācamanārthaṃ ca pātrāṇi ca prakalpayet

sthāpayedvividhānkuṃbhānnava dhīmānyathāvidhi//
darbhairācchādya taireva saṃsthāpyābhyukṣya vāriṇā

teṣu teṣu ca sarveṣu kṣipettoyaṃ suśītalam//
praṇavena kṣipetteṣu dravyāṇyālokya buddhimān

uśīraṃ candanaṃ caiva pādye tu parikalpayet //
jātīkaṃ kolakarpūravaṭamūla tamālakam

cūrṇayitvā yathānyāyaṃ kṣipedācamanīyake //
etatsarveṣu pātreṣu dāpayeccandanānvitam

pārśvayordevadevasya naṃdīśaṃ tu samarcayet //
gaṃdhairdhūpaistathā dīpairvividhaiḥ pūjayecchivam

liṃgaśuddhiṃ tataḥ kṛtvā mudā yukto narastadā //
yathocitaṃ tu maṃtraughaiḥ praṇavādirnamoṃtakaiḥ

kalpayedāsanaṃ svastipadmādi praṇavena tu //
tasmātpūrvadiśaṃ sākṣādaṇimāmayamakṣaram

laghimā dakṣiṇaṃ caiva mahimā paścimaṃ tathā //
prāptiścaivottaraṃ patraṃ prākāmyaṃ pāvakasya ca

īśitvaṃ nairṛtaṃ patraṃ vaśitvaṃ vāyugocare//
sarvajñatvaṃ tathaiśānyaṃ karṇikā soma ucyate

somasyādhastathā sūryastasyādhaḥ pāvakastvayam//
dharmādīnapi tasyādho bhavataḥ kalpayet kramāt

avyaktādi caturdikṣu somasyāṃte guṇatrayam //
sadyojātaṃ pravakṣyāmītyāvāhya parameśvaram

vāmadevena maṃtreṇa tiṣṭheccaivāsanopari //
sānnidhyaṃ rudragāyatryā aghoreṇa nirodhayet

īśānaṃ sarvavidyānāmiti maṃtreṇa pūjayet//
pādyamācanīyaṃ ca vidhāyārghyaṃ pradāpayet

sthāpayedvidhinā rudraṃ gaṃdhacaṃdanavāriṇā //
pañcāgavyavidhānena gṛhyapātre'bhimaṃtrya ca//

praṇavenaiva gavyena snāpayetpayasā ca tam //
dadhnā ca madhunā caiva tathā cekṣurasena tu

ghṛtena tu yathā pūjya sarvakāmahitāvaham //
puṇyairdravyairmahādevaṃ praṇavenābhiṣecayet

pavitrajalabhāṇḍeṣu maṃtraiḥ toyaṃ kṣipettataḥ //
śuddhīkṛtya yathānyāyaṃ sitavastreṇa sādhakaḥ

/
tāvaddūraṃ na kartavyaṃ na yāvaccandanaṃ kṣipet //
taṃdulaissundaraistatra pūjayecchaṃkarammudā

kuśāpāmārgakarpūra jāticaṃpakapāṭalaiḥ //
karavīraissitaiścaiva mallikākamalotpalaiḥ

apūrvapuṣpairvividhaiścandanādyaistathaiva ca //
jalena jaladhārāñca kalpayetparameśvare

pātraiśca vividhairdevaṃ snāpayecca maheśvaram //
maṃtrapūrvaṃ prakartavyā pūjā sarvaphalapradā

maṃtrām̐śca tubhyaṃ tām̐stāta sarvakāmārthasiddhaye //
pravakṣyāmi samāsena sāvadhānatayā śṛṇu

pāṭhayamānena maṃtreṇa tathā vāṅmayakena ca//
rudreṇa nīlarudreṇa suśuklena subhena ca

hotāreṇa tathā śīrṣṇā śubhenātharvaṇena ca //
śāṃtyā vātha punaśśāṃtyāmāruṇenāruṇena ca

arthābhīṣṭena sāmnā ca tathā devavratena ca

rathāṃtareṇa puṣpeṇa sūktena yuktena ca //
mṛtyuṃjayena maṃtreṇa tathā paṃcākṣareṇa ca

jaladhārāḥ sahasreṇa śatenaikottareṇa vā //
kartavyā vedamārgeṇa nāmabhirvātha vā punaḥ

tataścaṃdanapuṣpādi ropaṇīyaṃ śivopari //
dāpayetpraṇavenaiva mukhavāsādikaṃ tathā

tataḥ sphaṭikasaṃkāśaṃ devaṃ niṣkalamakṣayam //
kāraṇaṃ sarvalokānāṃ sarvalokamayaṃ param

brahmendropendraviṣṇvādyairapi devairagocaram //
vedavidbhirhi vedāṃte tvagocara miti smṛtam

ādimadhyāntarahitaṃ bheṣajaṃ sarvarogiṇām //
śivatattvamiti khyātaṃ śivaliṃgaṃ vyavasthitam

praṇavenaiva maṃtreṇa pūjayelliṃgamūrddhani //
dhūpairdīpaiśca naivaidyaistāmbūlaiḥ sundaraistathā

nīrājanena ramyeṇa yathoktavidhinā tataḥ //
namaskāraiḥ stavaiścānyairmaṃtrairnānāvidhairapi

arghyaṃ dattvā tu puṣpāṇi pādayossuvikīrya ca //
praṇipatya ca deveśamātmanārādhayecchivam

haste gṛhītvā puṣpāṇi samutthāya kṛtāṃjaliḥ //
prārthayetpunarīśānaṃ maṃtreṇānena śaṃkaram

ajñānādyadi vā jñānājjapapūjādikaṃ mayā //
kṛtaṃ tadastu saphalaṃ kṛpayā tava śaṃkara

paṭhitvaivaṃ ca puṣpāṇi śivopari mudā nyaset //
svastyayanaṃ tataḥ kṛtvā hyāśiṣo vividhāstathā

mārjanaṃ tu tataḥ kāryaṃ śivasyopari vai punaḥ //
namaskāraṃ tataḥ kṣāṃtiṃ punarācamanāya ca //७६
aghoccāraṇamuccārya namaskāraṃ prakalpayet //
prārthayecca punastatra sarvabhāvasamanvitaḥ

śive bhaktiśśive bhaktiśśive bhaktirbhave bhave //
anyathā śaraṇaṃ nāsti tvameva śaraṇaṃ mama

iti saṃprārthya deveśaṃ sarvasiddhipradāyakam //
pūjayetparayā bhaktyā galanādairviśeṣataḥ

namaskāraṃ tataḥ kṛtvā parivāragaṇaissaha //
praharṣamatulaṃ labdhvā kāryaṃ kuryādyathāsukham

evaṃ yaḥ pūjayennityaṃ śivabhaktiparāyaṇaḥ //
tasya vai sakalā siddhirjāyate tu pade pade

vāgmī sa jāyate tasya manobhī ṣṭaphalaṃ dhruvam //
rogaṃ duḥkhaṃ ca śokaṃ ca hyudvegaṃ kṛtrimaṃ tathā

kauṭilyaṃ ca garaṃ caiva yadyaduḥkhamupasthitam //
tadduḥkhaṃ nāśa yatyeva śivaḥ śivakaraḥ paraḥ

kalyāṇaṃ jāyate tasya śuklapakṣe yathā śaśī //
varddhate sadguṇastatra dhruvaṃ śaṃkarapūjanāt

iti pūjāvidhiśśaṃbhoḥ proktaste munisattama //
ataḥ paraṃ ca śuśrūṣuḥ kiṃ praṣṭāsi ca nārada

iti śrīśivamahāpurāṇe dvitī yāyāṃ rudrasaṃhitāyāṃ prathamakhaṇḍe sṛṣṭyupākhyāne śivapūjāvidhivarṇano nāmaikādaśo'dhyāyaḥ