Shiva Purana · Chapter 2.1.9

brahmovāca //
athākarṇya nurtiviṣṇukṛtāṃ svasya maheśvaraḥ //
prādurbabhūva suprītassavāmaṃ karuṇānidhiḥ

paṃcavaktrastrinayano bhālacandro jaṭādharaḥ //
gauravarṇo viśālākṣo bhasmoddhūlitavigrahaḥ

daśabāhurnīlagala sarvābharaṇabhūṣitaḥ //
sarvāṃgasundaro bhasmatripuṇḍrāṃkitamastakaḥ

taṃ dṛṣṭvā tādṛśaṃ devaṃ savāmaṃ parameśvaram //
tuṣṭāva punariṣṭābhirvāgbhirviṣṇurmayā saha

nigamaṃ śvāsarūpeṇa dadau tasmai tato haraḥ //
viṣṇave ca prasannātmā maheśaḥ karuṇākaraḥ

tato jñānamadāttasmai haraye paramātmane //
paramātmā punarmahyaṃ dattavānkṛpayā mune

saṃprāpya nigamaṃ viṣṇuḥ papraccha punareva tam //
kṛtārthassāṃjalirnatvā mayā saha maheśvaram

viṣṇuruvāca //
kathaṃ ca tuṣyase deva mayā pūjyaḥ kathaṃ prabho /
kathaṃ dhyānaṃ prakartavyaṃ kathaṃ vrajasi vaśyatām

kiṃ kartavyaṃ mahādeva hyāvābhyāṃ tava śāsanāt //
sadāsadājñāpaya nau prītyarthaṃ kuru śaṃkara

etatsarvaṃ mahārāja kṛpāṃ kṛtvā'vayoḥ prabho //
kathanīyaṃ tathānyacca vijñāya svānugau śiva

brahmovāca//
ityetadvacanaṃ śrutvā prasanno bhagavānharaḥ //
uvāca vacanaṃ prītyā suprasannaḥ kṛpānidhiḥ

śrīśiva uvāca //
bhaktyā ca bhavatornūnaṃ prītohaṃ surasattamau //
paśyataṃ māṃ mahādevaṃ bhayaṃ sarvaṃ vimuṃcatām

mama liṃgaṃ sadā pūjya dhyeyaṃ caitādṛśaṃ mama //
idānīṃ dṛśyate yadvattathā kāryaṃ prayatnataḥ

pūjito liṃgarūpeṇa prasanno vividhaṃ phalam //
dāsyāmi sarvalokebhyo manobhīṣṭānyanekaśaḥ

yadā duḥkhaṃ bhavettatra yuvayossurasattamau //
pūjite mama liṃge ca tadā syādduḥkhanāśanam

yuvāṃ prasūtau prakṛtermadīyāyā mahābalau //
gātrābhyāṃ savyasavyābhyāṃ mama sarveśvarasya hi

ayaṃ me dakṣiṇātpārśvādbrahmā lokapitāmahaḥ //
vāmapārśvācca viṣṇustvaṃ samutpannaḥ parātmanaḥ

prītohaṃ yuvayossamyagvaraṃ dadyāṃ yathepsitam //
mayi bhaktirdṛḍhā bhūyādyuvayorabhyanujñayā

pārthivīṃ caiva manmūrtiṃ vidhāya kurutaṃ yuvām //
sevāṃ ca vividhāṃ prājñau kṛtvā sukhamavāpsyatha

brahmansṛṣṭiṃ kuru tvaṃ hi madājñāparipālakaḥ //
vatsa vatsa hare tvaṃ ca pālayaivaṃ carācaram

brahmovāca //
ityuktvā nau prabhuratābhyāṃ pūjāvidhimadācchubhām //
yenaiva pūjitaśśaṃbhuḥ phalaṃ yacchatyanekaśaḥ

brahmovāca //
ityākarṇya vacaśśaṃbhormayā ca sahito hariḥ //
pratyuvāca maheśānaṃ praṇipatya kṛtāṃjaliḥ

viṣṇuruvāca //
yadi prītiḥ samutpannā yadi deyo varaśca nau //
bhaktirbhavatu nau nityaṃ tvayi cāvyabhicāriṇī

tvamapyavatarasvādya līlayā nirguṇopi hi //
sahāyaṃ kuru nau tāta tvaṃ paraḥ parameśvaraḥ

āvayordevadeveśa vivādamapi śobhanam //
ihāgato bhavānyasmādvivādaśamanāya nau

brahmovāca //
tasya tadvacanaṃ śrutvā punaḥ prāha haro harim //
praṇipatya sthitaṃ mūrdhnā kṛtāṃjalipuṭaḥ svayam

śrīmaheśa uvāca //
pralayasthitisargāṇāṃ kartāhaṃ saguṇo'guṇaḥ //
parabrahma nirvikārī saccidānaṃdalakṣaṇaḥ

triyā bhinno hyahaṃ viṣṇo brahmaviṣṇuharākhyayā//
sargarakṣālayaguṇairniṣkalohaṃ sadā hare

stuto'haṃ yattvayā viṣṇo brahmaṇā me'vatāraṇe//
prārthanāṃ tāṃ kariṣyāmi satyāṃ yadbhaktavatsalaḥ

madrūpaṃ paramaṃ brahmannīdṛśaṃ bhavadaṃgataḥ //
prakaṭībhavitā loke nāmnā rudraḥ prakīrtitaḥ

madaṃśāttasya sāmarthyaṃ nyūnaṃ naiva bhaviṣyati //
yohaṃ sohaṃ na bhedosti pūjāvidhividhānataḥ

yathā ca jyotiṣassaṃgājjalādeḥ sparśatā na vai //
tathā mamāguṇasyāpi saṃyogādbandhanaṃ na hi

śivarūpaṃ mamaitañca rudro'pi śivavattadā //
na tatra parabhedo vai kartavyaśca mahāmune

vastuto hyekarūpaṃ hi dvidhā bhinnaṃ jagatyuta //
ato na bhedā vijñeyaḥ śive rudre kadācana

suvarṇasya tathaikasya vastutvaṃ naiva gacchati //
alaṃkṛtikṛte deva nāmabhedo na vastutaḥ

tathaikasyā mṛdo bhedo nānāpātre na vastutaḥ//
kāraṇasyaiva kārye ca sannidhānaṃ nidarśanam

jñātavyaṃ budhavaryaiśca nirmalajñānibhiḥ surau //
evaṃ jñātvā bhavabhyāṃ tu na dṛśyaṃ bhedakāra ṇam

vastuvatsarvadṛśyaṃ ca śivarūpammatammama //
ahaṃ bhavānajaścaiva rudro yo'yaṃ bhaviṣyati

ekarūpā na bhedastu bhede vai baṃdhanaṃ bhavet //
tathāpi ca madīyaṃ hi śivarūpaṃ sanātanam

mūlībhūtaṃ sadoktaṃ ca satyajñānamanaṃtakam//
evaṃ jñātvā sadā dhyeyaṃ manasā caiva tattvataḥ

śrūyatāṃ caiva bho brahmanyadgopyaṃ kathyate mayā //
bhavaṃtau prakṛteryātau nāyaṃ vai prakṛteḥ punaḥ

madājñā jāyate tatra brahmaṇo bhrukuṭeraham//
guṇeṣvapi yathā proktastāmasaḥ prakṛto haraḥ

vaikārikaśca vijñeyo yo'haṃkāra udāhṛtaḥ //
nāmato vastuto naiva tāmasaḥ paricakṣyate

etasmātkāraṇādbrahmankaraṇīyamidaṃ tvayā //
sṛṣṭikartā bhava brahmansṛṣṭeśca pālako hariḥ

madīyaśca tathāṃ'śo yo layakartā bhaviṣyati //
iyaṃ yā prakṛtirdevī hyumākhyā parameśvarī

tasyāstu śaktirvā devī brahmāṇaṃ sā bhajiṣyati //
anyā śaktiḥ punastatra prakṛteḥ saṃbhaviṣyati

samāśrayiṣyati viṣṇuṃ lakṣmīrūpeṇa sā tadā//
punaśca kālī nāmnā sā madaṃśaṃ prāpsyati dhruvam

jyotī rūpeṇa sā tatra kāryārthe saṃbhaviṣyati //
evaṃ devyāstathā proktāśśaktayaḥ paramāśśubhāḥ

sṛṣṭisthitilayānāṃ hi kāryaṃ tāsāṃ kramāddhruvam //
etasyāḥ prakṛtteraṃśā matpriyāyāssurauttama

tvaṃ ca lakṣmīmupāśritya kāryaṃ kartumihārhasi //
brahmaṃstvaṃ ca girāṃ devīṃ prakṛtyaṃśāmavāpya ca

sṛṣṭikāryaṃ hṛdā kartummannideśādihārhasi //
ahaṃ kālīṃ samāśritya matpriyāṃśāṃ parātparām

rudrarūpeṇa pralayaṃ kariṣye kāryamuttamam //
caturvarṇamayaṃ lokaṃ tatsarvairāśramai dhruvam

tadanyairvividhaiḥ kāryaiḥ kṛtvā sukhamavāpsyathaḥ//
jñānavijñānasaṃyukto lokānāṃ hitakārakaḥ

muktido'tra bhavānadya bhava loke madājñayā //
maddarśane phalaṃ yadvattadeva tava darśane

iti datto varastedya satyaṃ satyaṃ na saṃśayaḥ//
mamaiva hṛdaye viṣṇurviṣṇośca hṛdaye hyaham

ubhayoraṃtaraṃ yo vai na jānāti mano mama //
vāmāṃgajo mama harirdakṣiṇāṃgodbhavo vidhiḥ

mahāpralayakṛdrudro viśvātmā hṛdayodbhavaḥ //
tridhā bhinno hyahaṃ viṣṇo brahmaviṣṇubhavākhyayā

sargarakṣālayakarastriguṇairaja ādibhiḥ //
guṇabhinnaśśivassākṣātprakṛte puruṣātparaḥ

paraṃ brahmādvayo nityo'nantaḥ pūrṇo niraṃjanaḥ //
aṃtastamo vahissattvastrijagatpālako hariḥ

aṃtassattvastamobāhyastrijagallayakṛddharaḥ

aṃtarbahīrajāścaiva trijagatsṛṣṭikṛdvidhiḥ //
evaṃ guṇāstrideveṣu guṇabhinnaḥ śivaḥ smṛtaḥ

viṣṇo sṛṣṭikaraṃ prītyā pālayainaṃ pitāmaham //
saṃpūjyastriṣu lokeṣu bhaviṣyasi madājñayā

tava sevyo vidheścāpi rudra eva bhaviṣyati //
śivapūrṇāvatāro hi trijagallayakārakaḥ

pādme bhaviṣyati sutaḥ kalpe tava pitāmahaḥ //
tadā drakṣyasi māṃ caiva so'pi drakṣyati padmajaḥ

evamuktvā maheśānaḥ kṛpāṃ kṛtvātulāṃ haraḥ //
punaḥ provāca suprītyā viṣṇuṃ sarveśvaraḥ prabhuḥ

iti śrīśivamahāpurāṇe dvitīyāyāṃ rudrasaṃhitāyāṃ prathama khaṇḍe sṛṣṭyupākhyāne śivatattvavarṇano nāma navamo'dhyāyaḥ