Shiva Gita · Chapter 7

śrīrāma uvāca /
bhagavanyanmayā pṛṣṭaṃ tattathaiva sthitaṃ vibho /
atrottaraṃ mayā labdhaṃ tvatto naiva maheśvara

paricchinnaparīmāṇe dehe bhagavatastava /
utpattiḥ sarvabhūtānāṃ sthitirvā vilayaḥ katham

svasvādhikārasaṃbaddhāḥ kathaṃ nāma sthitāḥ surāḥ //
te sarve tvaṃ kathaṃ deva bhuvanāni caturdaśa

tvattaḥ śrutvāpi devātra saṃdeho me mahānabhūt /
apratyāyitacittasya saṃśayaṃ chettumarhasi

śrībhagavānuvāca /
vaṭabīje susūkṣme'pi mahāvaṭataruryathā /
sarvadāste'nyathā vṛkṣaḥ kuta āāyati, tadvada //
tadvanmama tanau rāma bhūtānāmāgatirlayaḥ

mahāsaindhavapiṇḍo'pi jale kṣiso vilīyate /
na dṛśyate punaḥ pākāttata āyāti pūrvavat

prātaḥprātaryathā loko jāyate sūryamaṇḍalāt /
evaṃ matto jagatsarvaṃ jāyate'sti vilīyate /
mayyeva sakalaṃ rāma tadvajjānīhi suvrata

śrīrāma uvāca /
kathite'pi mahābhāga digjaḍasya yathā diśi /
nivartate bhramo naiva tadvanmama karomi kim

śrībhagavānuvāca /
mayi sarvaṃ yathā rāma jagadetaccarācaram /
vartate taddarśayāmi na draṣṭuṃ kṣamate bhavān

divyaṃ cakṣuḥ pradāsyāmi tubhyaṃ daśarathātmaja /
tena paśya bhayaṃ tyaktvā mattejomaṇḍalaṃ dhruvam

na carmacakṣuṣā draṣṭuṃ śakyate māmakaṃ mahaḥ /
nareṇa vā sureṇāpi tanmamānugrahaṃ vinā

śrīsūta uvāca /
ityuktvā pradadau tasmai divyaṃ cakṣurmaheśvaraḥ /
athādarśayadetasmai vaktraṃ pātālasaṃnibham

vidyutkoṭipratīkāśamatibhīmabhayāvaham/
tadṛṣṭvaiva bhayādrāmo jānubhyāmavaniṃ gataḥ

praṇamya daṇḍavadbhūmau tuṣṭāva ca punaḥpunaḥ //
athotthāya mahāvīro yāvadeva prapaśyati

vakraṃ purabhidastāvadantarbrahmāṇḍakoṭayaḥ //
caṭakā iva lakṣyante jvālāmālāsamākulāḥ

merumandaravindhyādyā girayaḥ saptasāgarāḥ /
dṛśyante candrasūryādyāḥ pañcabhūtāni te surāḥ

araṇyāni mahānāgā bhuvanāni caturdaśa /
pratibrahmāṇḍamevaṃ tu dṛṣṭvā daśarathātmajaḥ

surāsurāṇāṃ saṃgrāmāṃstatra pūrvāparānapi /
viṣṇordaśāvatārāṃśca tatkartavyānyapi dvijāḥ

parābhavāṃśca devānāṃ puradāhaṃ maheśituḥ //
utpadyamānānutpannānsarvānapi vinaśyataḥ

dṛṣṭvā rāmo bhayāviṣṭaḥ praṇanāma muhurmuhuḥ /
utpannatattvajñāno'pi babhūva raghunandanaḥ

athopaniṣadāṃ sārairarthaistuṣṭāva śaṃkaram

śrīrāma uvāca /
deva prapannārtihara prasīda prasīda viśveśvara viśvavandya /
prasīda gaṅgādhara candramaule māṃ trāhi saṃsārabhayādanātham २२
tvatto hi jātaṃ jagadetadīśa
tvayyeva bhūtāni vasanti nityam /
tvayyeva śaṃbho vilayaṃ prayānti
bhūmau yathā vṛkṣalatādayo'pi

brahmendrarudrāśca marudgaṇāśca
gandharvayakṣāsurasiddhasaṅghāḥ /
gaṅgādinadyo varuṇālayāśca
vasanti śūliṃstava vakramanti

tvanmāyayā kalpitamindumaule
tvayyeva dṛśyatvamupaiti viśvam //
bh
bhrāntyā janaḥ paśyati sarvameta
cchuktau yathā rūpyamahiṃ ca rajjau

tejobhirāpūrya jagatsamagraṃ prakāśamānaḥ kuruṣe prakāśam /
vināprakāśaṃ tava devadeva na dṛśyate viśvamidaṃ kṣaṇena

alpāśrayo naiva bṛhantamartha
dhatte'ṇureko nahi vindhyaśailam //
tadvaktramātre jagadetadasti
tvanmāyayaiveti ca niścinomi

rajjau bhujaṃgo bhayado yathaiva
na jāyate nāsti na caiti nāśam //
tvanmāyayā kevalamāttarūpaṃ
tathaiva viśvaṃ tvayi nīlakaṇṭha

vicāryamāṇe tava yaccharīra-
mādhārabhāva jagatāmupaiti /
tadapyavaśyaṃ madavidyayaiva
pūrṇaścidānandamayo yatastvam

pūjeṣṭapūrtādivarakriyāṇāṃ
bhoktuḥ phalaṃ yacchasi śastameva /
mṛṣaitadevaṃ vacanaṃ purāre
tvatto'sti bhinnaṃ naca kiṃcideva

ajñānamūḍhā munayo vadanti
pūjopacārādibahiḥkriyābhiḥ /
toṣaṃ girīśo bhajatīti mithyā
kutastvamūrtasya tu bhogalipsā

kiṃciddalaṃ vā culakodakaṃ vā /
yattvaṃ maheśa pratigṛhya datse /
trailokyalakṣmīmapi tajjanebhyaḥ
sarvaṃ tvavidyākṛtameva manye

vyāpnoṣi sarvā vidiśo diśaśva
tvaṃ viśvamekaḥ puruṣaḥ purāṇaḥ //
naṣṭe'pi tasmiṃstava nāsti hāni-
rghaṭe vinaṣṭe nabhaso yathaiva

yathaikamākāśagamarkabimbaṃ
kṣudveṣu pātreṣu jalānviteṣu /
bhajatyanekapratibimbabhāvaṃ
tathā tvamantaḥkaraṇeṣu deva

susarjane vāpyarvane vināśe
viśvasya kiṃcittava nāsti kāryam /
anādibhirdehabhṛtāmadṛṣṭai-
stathāpi tatsvapnavadātanoṣi

sthūlasya sūkṣmasya jaḍasya deha-
dvayasya śaṃbho na cidaṃ vināsti /
atastvadāropaṇamātanoti
śrutiḥ purāre sukhaduḥkhayoḥ sadā

namaḥ saccidambhodhihaṃsāya tubhyaṃ
namaḥ kālakaṇṭhāya kalātmakāya /
namaste samastāghasaṃhārakartre
namaste mṛṣācittavṛtyaikabhoktre

sūta uvāca /
evaṃ praṇamya viśveśaṃ purataḥ prāñjaliḥ sthitaḥ //
vismitaḥ parameśānaṃ jagade raghunandanaḥ

śrīrāma uvāca /
upasaṃhara viśvātmanviṣvarūpamidaṃ tava /
pratītaṃ jagadaikātmyaṃ śaṃbho bhavadanugrahāt

śrībhagavānuvāca /
paśya rāma mahābāho matto nānyo'sti kaścana /
sūta uvāca /
ityuktvaivopasaṃjahre svadehe devatādikān

mīlitākṣaḥ punarharṣādyāvadrāmaḥ prapaśyati /
tāvadeva gireḥ śṛṅge vyāghracarmopari sthitam

dadarśa pañcavadanaṃ nīlakaṇṭhaṃ trilocanam //
vyāghracarmāmbaradharaṃ bhūtibhūṣitavigraham

phaṇikaṅkaṇabhūṣāḍhyaṃ nāgayajñopavītinam/
vyāghracarmīttarīyaṃ ca vidyutpiṅgajaṭādharam

ekākinaṃ candramauliṃṃ vareṇyamabhayapradam /
caturbhujaṃ khaṇḍaparaśuṃ mṛgahastaṃ jagatpatim

athājñayā purastasya praṇamyopaviveśa saḥ /
athāha rāmaṃ deveśo yadyatpraṣṭumabhīcchasi /
tatsarvaṃ pṛccha rāma tvaṃ matto nānyo'sti te guruḥ