Shiva Gita · Chapter 6

śrīrāma uvāca /
bhagavannatra me citraṃ mahadetatprajāyate /
śuddhasphaṭikasaṃkāśastrinetraścandraśekharaḥ

mūrtastvaṃ tu paricchinnākṛtiḥ puruṣarūpadhṛk /
ambayā sahito'traiva ramase pramathaiḥ saha

tvaṃ kathaṃ pañcabhūtādi jagadetaccarācaram /
tadbrūhi girijākānta yadi te'nugraho mayi

śrībhagavānuvāca /
śṛṇu rāma mahābhāga durjñeyamamarairapi /
tatpravakṣyāmi yatnena brahmacaryeṇa suvrata /
pāraṃ yāsyasyanāyāsādyena saṃsaranīradheḥ

dṛśyante pañcabhūtāni ye ca lokāścaturdaśa //
samudrāḥ parvatā devā rākṣasā ṛṣayastathā

dṛśyante yāni cānyāni sthāvarāṇi carāṇi ca /
gandharvāḥ pramathā nāgāḥ sarve te madvibhūtayaḥ

purā brahmādayo devā draṣṭukāmā mamākṛtim /
mandaraṃ prayayuḥ sarve mama priyataraṃ girim

stutvā prāñjalayo devā māṃ tathā purataḥ sthitāḥ //
tāndṛṣṭvātha mayā devaॉllīlākulitacetasaḥ //
teṣāmapahṛtaṃ jñānaṃ brahmādīnāṃ divaukasām

āsaṃste'sakṛdajñānā māmāhuḥ ko bhavāniti /
athābruvamahaṃ devānahameva purātanaḥ

āsaṃ prathamamevāhaṃ vartāmi ca sureśvarāḥ /
bhaviṣyāmi ca loke'sminmatto nānyo'sti kaścana

vyatiriktaṃ ca matto'sti nānyatkiṃcitsureśvarāḥ /
nityo'nityo'hamanagho brahmaṇāṃ brahmaṇaspatiḥ

dakṣiṇāñca udañco'haṃ prāñcaḥ pratyañca eva ca /
adhaścordhvaṃ ca vidiśo diśaścāhaṃ sureśvarāḥ

sāvitrī cāpi gāyatrī strī pumānapumānapi /
triṣṭup jagatyanuṣṭup ca paṅkiśchandastrayīmayaḥ

satyo'haṃ sarvataḥ śāntastretāgnirgauravaṃ guruḥ /
gauravaṃ gahvaraṃ cāhaṃ dyaurahaṃ jagatāṃ prabhuḥ

jyeṣṭhaḥ sarvasuraśreṣṭho varṣiṣṭho'hamapāṃpatiḥ //
āryo'haṃ bhagavānīśastejo'haṃ cādirapyaham

ṛgvedo'haṃ yajurvedaḥ sāmavedo'hamātmabhūḥ /
atharvaṇaśca mantro'haṃ tathā cāṅgiraso varaḥ

itihāsapurāṇāni kalpo'haṃ kalpavānaham /
nārāśaṃsī ca gāthāhaṃ vidyopaniṣado'smyaham

ślokāḥ sūtrāṇi caivāhamanuvyākhyānameva ca //
vyākhyānāni tathā vidyā iṣṭaṃ hutamathāhutiḥ

dattādattamayaṃ lokaḥ paraloko'hamakṣaraḥ /
kṣaraḥ savāṇi bhūtāni dāntiḥ śāntarahaṃ khagaḥ

guhyo'haṃ sarvavedeṣu āraṇyo'hamajo'pyaham //
puṣkaraṃ ca pavitraṃ ca madhyaṃ cāhamataḥparam /
bahiścāhaṃ tathā cāntaḥ purastādahamavyayaḥ

jyotiścāhaṃ tamaścāhaṃ tanmātrāṇīndriyāṇyaham /
buddhiścāhamahaṃkāro viṣayāṇyahameva hi

brahmā viṣṇurmaheśo'hamumā skando vināyakaḥ /
indro'gniśca yamaścāhaṃ nirṛtirvaruṇo'nilaḥ

kubero'haṃ tatheśāno bhūrbhuvaḥsvarmaharjanaḥ //
tapaḥ satyaṃ ca pṛthivī cāpastejo'nilo'pyaham

ākāśo'haṃ raviḥ somo nakṣatrāṇi gṛhāṇyaham /
prāṇaḥ kālastathā mṛtyuramṛtaṃ bhūtamapyaham

bhavyaṃ bhaviṣyatkṛtsnaṃ ca viśvaṃ sarvātmako'pyaham /
omādau ca tathā madhye bhūrbhuvaḥ svastathaiva ca /
tato'haṃ viśvarūpo'smi śīrṣaṃ ca japatāṃ sadā

aśitaṃ pāyitaṃ cāhaṃ kṛtaṃ cākṛtamapyaham //
paraṃ caivāparaṃ cāhamahaṃ sūryaḥ parāyaṇaḥ

ahaṃ jagaddhitaṃ divyamakṣaraṃ sūkṣmamapyaham //
prājāpatyaṃ pavitraṃ ca saumyamagrāhyamagriyam

ahamevopasaṃhartā mahāgrāsaujasāṃ nidhiḥ /
hṛdaye devatātvena prāṇatvena pratiṣṭhitaḥ

śiraścottarato yasya pādau dakṣiṇatastathā /
yasya sarvo'ntaraḥ sākṣādoṃkāro'haṃ trimātrakaḥ

ūrdhvamunnāmaye yasmādadhaścāpanayāmyatha/
tasmādoṃkāra evāhameko nityaḥ sanātanaḥ

ṛco yajūṃṣi sāmāni yo brahmā yajñakarmaṇi /
praṇāmaye brāhmaṇebhyastenāhaṃ praṇavo mataḥ

sneho yathā māṃsakhaṇḍaṃ vyāpnoti vyāpayatyapi /
sarvalokānahaṃ tadvatsarvavyāpī tato'smyaham

brahmā hariśca bhagavānādyantaṃ nopalabdhavān /
tato'nye ca surā yasmādananto'hamitīritaḥ

garbhajanmajarāmṛtyusaṃsārabhayasāgarāt/
tārayāmi yato bhaktaṃ tasmāttāro'hamīritaḥ

caturvidheṣu deheṣu jīvatvena vasāmyaham /
sūkṣmo bhūtvātha hṛddeśe yattatsūkṣmaḥ prakīrtitaḥ

mahātamasi magnebhyo bhaktebhyo yatprakāśaye /
vidyudvadatulaṃ rūpaṃ tasmādvaidyuttamasmyaham

eka eva yato lokānvisṛjāmi sṛjāmi ca /
vivāsayāmi gṛhṇāmi tasmādeko'hamīśvaraḥ

na dvitīyo yatastasthe turīyaṃ brahma yatsvayam //
bhūtānyātmani saṃhṛtya caiko rudro vasāmyaham

sarvalokānyadīśe'hamīśinībhiśca śaktibhiḥ /
īśānamasya jagataḥ svadṛśaṃ cakṣurīśvaram

īśānamindra tasthuṣaḥ sarveṣāmapi sarvadā /
īśānaḥ sarvavidyānāṃ yadīśānastadasmyaham

sarvānbhāvānnirīkṣe'hamātmajñānaṃ nirīkṣaye /
yogaṃ ca samaye yasmādbhagavānmahato mataḥ

ajasraṃ yacca gṛhṇāmi visṛjāmi sṛjāmi ca /
sarvāṃllokānvāsayāmi tenāhaṃ vai maheśvaraḥ

mahatsvātmajñānayogairaiśvaryaistu mahīyate /
sarvānbhāvānmahādevaḥ sṛjatyavati so'smyaham

eṣo'smi devaḥ pradiśo'pi sarvāḥ
pūrvo hi jāto'smyahameva garbhe/
ahaṃ hi jātaśca janiṣyamāṇaḥ
pratyagjanāstiṣṭhati sarvatomukhaḥ

viśvataścakṣuruta viśvatomukho
viśvatobāhuruta viśvataspāt /
saṃbāhubhyāṃ dhamati saṃpatatrai-
rdyāvābhūmī janayandeva ekaḥ

vālāgramātraṃ hṛdayasya madhye
viśvedevaṃ jātavedaṃ vareṇyam //
māmātmasthaṃ ye'nupaśayanti dhīrā-
steṣāṃ śāntiḥ śāśvatī netareṣām

ahaṃ yonimadhitiṣṭhāmi caiko
mayedaṃ pūrṇaṃ pañcavidhaṃ ca sarvam //
māmīśānaṃ puruṣaṃ devamitthaṃ
vicāryamāṇaṃ śāntimatyantameti

prāṇeṣvantarmanaso liṅgamāhu-
ryasminnaśanāyā ca tṛṣṇā kṣamā ca /
tṛṣṇāṃ chittvā hetujālasya mūlaṃ
buddhyā cittaṃ sthāpayitvā mayīha /
evaṃ māṃ ye dhyāyamānā bhajante
teṣāṃ śāntiḥ śāśvatī netareṣām

yato vāco nivartante aprāpya manasā saha /
ānandaṃ brahma māṃ jñātvā na bibheti kutaścana

śrutveti devā madvākyaṃ kaivalyajñānamuttamam //
japanto mama nāmāni mama dhyānaparāyaṇāḥ

sarve te svasvadehānte matsāyujyaṃ gatāḥ purā /
tato ye paridṛśyante padārthā madvibhūtayaḥ //.५१ //
mayyeva sakalaṃ jātaṃ mayi sarvaṃ pratiṣṭhitam /
mayi sarvaṃ layaṃ yāti tadbrahmādvayamasmyaham

aṇoraṇīyānahameva tadvanmahānahaṃ viśvamahaṃ viśuddhaḥ /
purātano'haṃ puruṣo'hamīśo hiraṇmayoyaṃ śivarūpamasmi

apāṇipādo'hamacintvaśaktiḥ
paśyāmyacakṣuḥ sa śṛṇomyakarṇaḥ /
ahaṃ vijānāmi viviktarūpo
na cāsti vettā mama citsadāham

vedairaśeṣairahameva vedyo
vedāntakṛdvedavideva cāham /
na puṇyapāpe mayi nāsti nāśo
na janmadehendriyabuddhayaśca

na bhūmirāpo na ca vahnirasti
na cānilo me'sti na me nabhaśca /
evaṃ viditvā paramātmarūpaṃ
guhāśayaṃ niṣkalamadvitīyam/
samastasākṣiṃ sadasadvihīnaṃ
prayāti śuddhaṃ paramātmarūpam

evaṃ māṃ tattvato vetti yastu rāma mahāmate /
sa eva nānyo lokeṣu kaivalyaphalamaśrute