Shiva Gita · Chapter 3

agastya uvāca /
na gṛhṇāti vacaḥ pathyaṃ kāmakrodhādipīḍitaḥ //
hitaṃ na rocate tasya mumūrṣoriva bheṣajam

madhyesamudraṃ yā nītā sītā daityena māyinā /
āyāsyati naraśreṣṭha sā kathaṃ tava saṃnidhim

,
badhyante devatāḥ sarvā dvāri markaṭayūthavat //
kiṃca cāmaradhāriṇyo yasya santi surāṅganāḥ

bhuṅkte trilokīmakhilāṃ yaḥ śaṃbhuvaradarpitaḥ //
niṣkaṇṭakaṃ tasya jayaḥ kathaṃ tava bhaviṣyati

indrajinnāma putro yastasyāstīśavaroddhataḥ //
tasyāgre saṅgare devā bahuvāraṃ palāyitāḥ

kumbhakarṇāhvayo bhrātā yasyāsti surasūdanaḥ /
anyo divyāstrasaṃyuktaściraṃjīvī vibhīṣaṇaḥ

durgaṃ yasyāsti laṅkākhyaṃ durjayaṃ devadānavaiḥ /
caturaṅgabalaṃ yasya vartate koṭisaṃkhyayā

ekākinā tvayā jeyaḥ sa kathaṃ nṛpanandana /
ākāṅkṣate kare dhartuṃ bālaścandramasaṃ yathā

tathā tvaṃ kāmamohena jayaṃ tasyābhivāñchasi

śrīrāma uvāca /
kṣatriyo'haṃ muniśreṣṭha bhāryā me rakṣasā hṛtā /
yadi taṃ na nihanmyāśu jīvane me'sti kiṃ phalam

ataste tattvabodhena na me kiṃcitprayojanam /
kāmakrodhādayaḥ sarve dahyate taistanurmama

ahaṃkāro'pi me nityaṃ jīvanaṃ hantumudyataḥ

hṛtāyāṃ nijakāntāyāṃ śatruṇā'vamatasya vā //
yasya tattvabubhutsā syātsa loke puruṣādhamaḥ

tasmāttasya vadhopāyaṃ laṅghayitvāmbudhiṃ raṇe //
brūhi me muniśārdūla tvatto nānyo'sti me guruḥ

agastya uvāca /
evaṃ ceccharaṇaṃ yāhi pārvatīpatimavyayam /
sa cetprasanno bhagavānvāñchitārthaṃ prayacchati

devairajeyaḥ śakrādyairhariṇā brahmaṇāpi vā /
sa te vadhyaḥ kathaṃ vā syācchaṃkarānugrahaṃ vinā

atastvāṃ dīkṣayiṣyāmi virajāgamamāśritaḥ /
tena mārgeṇa martyatvaṃ hitvā tejomayo bhava

yena hatvā raṇe śatrūnsarvānkāmānavāpsyati /
bhuktvā bhūmaṇḍalaṃ cānte śivasāyujyamāpsyasi

sūta uvāca /
atha praṇamya rāmastaṃ daṇḍavanmunisattamam /
uvāca duḥkhanirmuktaḥ prahṛṣṭenāntarātmanā

śrīrāma uvāca /
kṛtārtho'haṃ mune jāto vāñchitārtho mamāgataḥ //
pītāmbudhiḥ prasannastvaṃ yadi me kimu durlabham /
atastvaṃ virajādīkṣāṃ brūhi me munisattama


agastya uvāca /
śuklapakṣe caturdaśyāmaṣṭamyāṃ vā viśeṣataḥ /
ekādaśyāṃ somavāre ārdrāyāṃ vā samārabhet

yaṃ vāmamāhuryaṃ rudraṃ śāśvataṃ parameśvaram /
parātparaṃ paraṃ cāhuḥ parātparataraṃ śivam /
brahmaṇo janakaṃ viṣṇorvahnervāyoḥ sadāśivam

dhyātvāgnināvasathyāgniṃ viśodhya ca pṛthakpṛthak /
pañcabhūtāni saṃyamya dagdhvā guṇavidhikramāt

mātrāḥ pañca catasraśca trimātrā dvistataḥ param /
ekamātramamātraṃ ca dvādaśāntavyavasthitam

sthityāṃ sthāpyāmṛto bhūtvā vrataṃ pāśupataṃ caret

idaṃ vrataṃ pāśupataṃ kathayiṣye samāsataḥ /
prātareva tu saṃkalpya nidhāyāgniṃ svaśākhayā

upoṣitaḥ śuciḥ snātaḥ śuklāmbaradharaḥ svayam /
śuklayajñopavītaśca śuklamālyānulepanaḥ

juhuyādvirajomantraiḥ prāṇāpānādibhistataḥ //
anuvākāntamekāgraḥ samidājyacarūnpṛthak

ātmanyagniṃ samāropya yāte agneti mantrataḥ //
bhasmādāyāgnirityādyairvimṛjyāṅgāni saṃspṛśet

bhasmacchanno dvijo vidvānmahāpātakasaṃbhavaiḥ //
pāṣairvimucyate nityaṃ mucyate na ca saṃśayaḥ

agnivīryaṃ yato bhasma vīryavānbhasmasaṃyutaḥ //
bhasmasnānarato vipro bhasmaśāyī jitendriyaḥ

sarvapāpavinirmuktaḥ śivasāyujyamāpnuyāt/
evaṃ kuru mahārāja śivanāmasahasrakam

idaṃ tu saṃpradāsyāmi tena sarvamavāpsyasi

sūta uvāca /
ityuktvā pradadau tasmai śivanāmasahasrakam //
vedasārābhidhaṃ nityaṃ śivapratyakṣakārakam

uktaṃ ca tena rāma tvaṃ japa nityaṃ divāniśam /
tataḥ prasanno bhagavānmahāpāśupatāstrakam /
tubhyaṃ dāsyati tena tvaṃ śatrūnhatvāpsyasi priyām

tasyaivāstrasya māhātmyātsamudraṃ śoṣayiṣyasi /
saṃhārakāle jagatāmastraṃ tatpārvatīpateḥ

tadalābhe dānavānāṃ jayastava sudurlabhaḥ //
tasmāllabdhuṃ tadevāstraṃ śaraṇaṃ yāhi śaṃkaram