શિવ ગીતા · અધ્યાય 3

અગસ્ત્ય ઉવાચ ।
ન ગૃહ્ણાતિ વચઃ પથ્યં કામક્રોધાદિપીડિતઃ ॥
હિતં ન રોચતે તસ્ય મુમૂર્ષોરિવ ભેષજમ્

મધ્યેસમુદ્રં યા નીતા સીતા દૈત્યેન માયિના ।
આયાસ્યતિ નરશ્રેષ્ઠ સા કથં તવ સંનિધિમ્

,
બધ્યન્તે દેવતાઃ સર્વા દ્વારિ મર્કટયૂથવત્ ॥
કિંચ ચામરધારિણ્યો યસ્ય સન્તિ સુરાઙ્ગનાઃ

ભુઙ્ક્તે ત્રિલોકીમખિલાં યઃ શંભુવરદર્પિતઃ ॥
નિષ્કણ્ટકં તસ્ય જયઃ કથં તવ ભવિષ્યતિ

ઇન્દ્રજિન્નામ પુત્રો યસ્તસ્યાસ્તીશવરોદ્ધતઃ ॥
તસ્યાગ્રે સઙ્ગરે દેવા બહુવારં પલાયિતાઃ

કુમ્ભકર્ણાહ્વયો ભ્રાતા યસ્યાસ્તિ સુરસૂદનઃ ।
અન્યો દિવ્યાસ્ત્રસંયુક્તશ્ચિરંજીવી વિભીષણઃ

દુર્ગં યસ્યાસ્તિ લઙ્કાખ્યં દુર્જયં દેવદાનવૈઃ ।
ચતુરઙ્ગબલં યસ્ય વર્તતે કોટિસંખ્યયા

એકાકિના ત્વયા જેયઃ સ કથં નૃપનન્દન ।
આકાઙ્ક્ષતે કરે ધર્તું બાલશ્ચન્દ્રમસં યથા

તથા ત્વં કામમોહેન જયં તસ્યાભિવાઞ્છસિ

શ્રીરામ ઉવાચ ।
ક્ષત્રિયોઽહં મુનિશ્રેષ્ઠ ભાર્યા મે રક્ષસા હૃતા ।
યદિ તં ન નિહન્મ્યાશુ જીવને મેઽસ્તિ કિં ફલમ્

અતસ્તે તત્ત્વબોધેન ન મે કિંચિત્પ્રયોજનમ્ ।
કામક્રોધાદયઃ સર્વે દહ્યતે તૈસ્તનુર્મમ

અહંકારોઽપિ મે નિત્યં જીવનં હન્તુમુદ્યતઃ

હૃતાયાં નિજકાન્તાયાં શત્રુણાઽવમતસ્ય વા ॥
યસ્ય તત્ત્વબુભુત્સા સ્યાત્સ લોકે પુરુષાધમઃ

તસ્માત્તસ્ય વધોપાયં લઙ્ઘયિત્વામ્બુધિં રણે ॥
બ્રૂહિ મે મુનિશાર્દૂલ ત્વત્તો નાન્યોઽસ્તિ મે ગુરુઃ

અગસ્ત્ય ઉવાચ ।
એવં ચેચ્છરણં યાહિ પાર્વતીપતિમવ્યયમ્ ।
સ ચેત્પ્રસન્નો ભગવાન્વાઞ્છિતાર્થં પ્રયચ્છતિ

દેવૈરજેયઃ શક્રાદ્યૈર્હરિણા બ્રહ્મણાપિ વા ।
સ તે વધ્યઃ કથં વા સ્યાચ્છંકરાનુગ્રહં વિના

અતસ્ત્વાં દીક્ષયિષ્યામિ વિરજાગમમાશ્રિતઃ ।
તેન માર્ગેણ મર્ત્યત્વં હિત્વા તેજોમયો ભવ

યેન હત્વા રણે શત્રૂન્સર્વાન્કામાનવાપ્સ્યતિ ।
ભુક્ત્વા ભૂમણ્ડલં ચાન્તે શિવસાયુજ્યમાપ્સ્યસિ

સૂત ઉવાચ ।
અથ પ્રણમ્ય રામસ્તં દણ્ડવન્મુનિસત્તમમ્ ।
ઉવાચ દુઃખનિર્મુક્તઃ પ્રહૃષ્ટેનાન્તરાત્મના

શ્રીરામ ઉવાચ ।
કૃતાર્થોઽહં મુને જાતો વાઞ્છિતાર્થો મમાગતઃ ॥
પીતામ્બુધિઃ પ્રસન્નસ્ત્વં યદિ મે કિમુ દુર્લભમ્ ।
અતસ્ત્વં વિરજાદીક્ષાં બ્રૂહિ મે મુનિસત્તમ


અગસ્ત્ય ઉવાચ ।
શુક્લપક્ષે ચતુર્દશ્યામષ્ટમ્યાં વા વિશેષતઃ ।
એકાદશ્યાં સોમવારે આર્દ્રાયાં વા સમારભેત્

યં વામમાહુર્યં રુદ્રં શાશ્વતં પરમેશ્વરમ્ ।
પરાત્પરં પરં ચાહુઃ પરાત્પરતરં શિવમ્ ।
બ્રહ્મણો જનકં વિષ્ણોર્વહ્નેર્વાયોઃ સદાશિવમ્

ધ્યાત્વાગ્નિનાવસથ્યાગ્નિં વિશોધ્ય ચ પૃથક્પૃથક્ ।
પઞ્ચભૂતાનિ સંયમ્ય દગ્ધ્વા ગુણવિધિક્રમાત્

માત્રાઃ પઞ્ચ ચતસ્રશ્ચ ત્રિમાત્રા દ્વિસ્તતઃ પરમ્ ।
એકમાત્રમમાત્રં ચ દ્વાદશાન્તવ્યવસ્થિતમ્

સ્થિત્યાં સ્થાપ્યામૃતો ભૂત્વા વ્રતં પાશુપતં ચરેત્

ઇદં વ્રતં પાશુપતં કથયિષ્યે સમાસતઃ ।
પ્રાતરેવ તુ સંકલ્પ્ય નિધાયાગ્નિં સ્વશાખયા

ઉપોષિતઃ શુચિઃ સ્નાતઃ શુક્લામ્બરધરઃ સ્વયમ્ ।
શુક્લયજ્ઞોપવીતશ્ચ શુક્લમાલ્યાનુલેપનઃ

જુહુયાદ્વિરજોમન્ત્રૈઃ પ્રાણાપાનાદિભિસ્તતઃ ॥
અનુવાકાન્તમેકાગ્રઃ સમિદાજ્યચરૂન્પૃથક્

આત્મન્યગ્નિં સમારોપ્ય યાતે અગ્નેતિ મન્ત્રતઃ ॥
ભસ્માદાયાગ્નિરિત્યાદ્યૈર્વિમૃજ્યાઙ્ગાનિ સંસ્પૃશેત્

ભસ્મચ્છન્નો દ્વિજો વિદ્વાન્મહાપાતકસંભવૈઃ ॥
પાષૈર્વિમુચ્યતે નિત્યં મુચ્યતે ન ચ સંશયઃ

અગ્નિવીર્યં યતો ભસ્મ વીર્યવાન્ભસ્મસંયુતઃ ॥
ભસ્મસ્નાનરતો વિપ્રો ભસ્મશાયી જિતેન્દ્રિયઃ

સર્વપાપવિનિર્મુક્તઃ શિવસાયુજ્યમાપ્નુયાત્।
એવં કુરુ મહારાજ શિવનામસહસ્રકમ્

ઇદં તુ સંપ્રદાસ્યામિ તેન સર્વમવાપ્સ્યસિ

સૂત ઉવાચ ।
ઇત્યુક્ત્વા પ્રદદૌ તસ્મૈ શિવનામસહસ્રકમ્ ॥
વેદસારાભિધં નિત્યં શિવપ્રત્યક્ષકારકમ્

ઉક્તં ચ તેન રામ ત્વં જપ નિત્યં દિવાનિશમ્ ।
તતઃ પ્રસન્નો ભગવાન્મહાપાશુપતાસ્ત્રકમ્ ।
તુભ્યં દાસ્યતિ તેન ત્વં શત્રૂન્હત્વાપ્સ્યસિ પ્રિયામ્

તસ્યૈવાસ્ત્રસ્ય માહાત્મ્યાત્સમુદ્રં શોષયિષ્યસિ ।
સંહારકાલે જગતામસ્ત્રં તત્પાર્વતીપતેઃ

તદલાભે દાનવાનાં જયસ્તવ સુદુર્લભઃ ॥
તસ્માલ્લબ્ધું તદેવાસ્ત્રં શરણં યાહિ શંકરમ્