Shiva Gita · Chapter 4

śrīsūta uvāca /
evamuktvā muniśreṣṭhe gate tasminnijāśramam /
atha rāmagirau rāmaḥ puṇye godāvarītaṭe

śivaliṅgaṃ pratiṣṭhāpya kṛtvā dīkṣāṃ yathāvidhi /
bhūtibhūṣitasarvāṅgo rudrākṣābharaṇairyutaḥ

abhiṣicya jalaiḥ puṇyairgautamīsindhusaṃbhavaiḥ //
arcayitvā vanyapuṣpaistadvadvanyaphalairapi

bhasmacchanno bhasmaśāyī vyāghracarmāsane sthitaḥ /
nāmnāṃ sahasraṃ prajapannaktaṃdivamananyadhīḥ

māsamekaṃ phalāhāro māsaṃ parṇāśanaḥ sthitaḥ /
māsamekaṃ jalāhāro māsaṃ ca pavanāśanaḥ

śānto dāntaḥ prasannātmā dhyāyannevaṃ maheśvaram /
hṛtpaṅkaje samāsīnamumādehārdhadhāriṇam

caturbhujaṃ trinayanaṃ vidyutpiṅgajaṭādharam /
koṭisūryapratīkāśaṃ candrakoṭisuśītalam

sarvābharaṇasaṃyuktaṃ nāgayajñopavītinam //
vyāghracarmāmbaradharaṃ varadābhayadhāriṇam

vyāghracarmottarīyaṃ ca surāsuranamaskṛtam /
pañcavaktraṃ candramauliṃ triśūlaḍamarūdharam

nityaṃ ca śāśvataṃ śuddhaṃ dhruvamakṣaramavyayam //
evaṃ nityaṃ prajapato gataṃ māsacatuṣṭayam

atha jāto mahānādaḥ pralayāmbudhibhīṣaṇaḥ /
samudramathanodbhūtamandarāvanibhṛddhvaniḥ

rudrabāṇāgnisaṃdīptabhṛśatripuravibhramaḥ /
tamākarṇyātha saṃbhrānto yāvatpaśyati puṣkaram/
tāvadeva mahātejo rāmasyāsītpuro dvijāḥ

tejasā tena saṃbhrānto nāpaśyatsa diśo daśa/
andhīkṛtekṣaṇastūrṇaṃ mohaṃ yāto nṛpātmajaḥ

vicintya tarkayāmāsa daityamāyāṃ dvijeśvarāḥ //
athotthāya mahāvīraḥ sajyaṃ kṛtvā dhanuḥ svakam

avidhyanniśitairbāṇairdivyāstrairabhimantritaiḥ //
āgneyaṃ vāruṇaṃ saumyaṃ mohanaṃ saurapārvatam

viṣṇucakraṃ mahācakraṃ kālacakraṃ ca vaiṣṇavam //
raudraṃ pāśupataṃ brāhmaṃ kauberaṃ kuliśānilam

bhārgavādibahūnyastrāṇyayaṃ prāyuṅkta rāghavaḥ

tasmiṃstejasi śastrāṇi cāstrāṇyasya mahīpateḥ /
vilīnāni mahābhrasya karakā iva nīradhau

tataḥ kṣaṇena jajvāla dhanustasya karāccyutam /
tūṇīraṃ cāṅgulitrāṇaṃ godhikāpi mahīpateḥ

taddṛṣṭvā lakṣmaṇo bhītaḥ papāta bhuvi mūrcchitaḥ /
athākiṃcitkaro rāmo jānubhyāmavaniṃ gataḥ

mīlitākṣo bhayāviṣṭaḥ śaṃkaraṃ śaraṇaṃ gataḥ /
svareṇāpyuccarannuccaiḥ śaṃbhornāmasahasrakam

śivaṃ ca daṇḍavadbhūmau praṇanāma punaḥ punaḥ /
punaśca pūrvavañcāsīcchabdo diṅmaṇḍalaṃ svanan /
cacāla vasudhā ghoraṃ parvatāśva cakampire

atha kṣaṇena śītāṃśuśītalaṃ teja ādadhat //
unmīlitākṣo rāmastu yāvadyāvatprapaśyati

 tāvaddadarśa vṛṣabhaṃ sarvālaṃkārasaṃyutam //
pīyūṣamathanodbhūtanavanītasya piṇḍavat

protasvarṇaṃ marakatacchāyāśrṛṅgadvayāñcitam //
nīlaratnekṣaṇaṃ hrasvakaṇṭhakambalabhūṣitam

ratnapalyāṇasaṃyuktaṃ nibaddhaśvetaścāmaraiḥ /
ghaṇṭikāghargharīśabdaiḥ pūrayantaṃ diśo daśa

tatrāsīnaṃ mahādevaṃ śuddhasphaṭikavigraham /
koṭisūryapratīkāśaṃ koṭiśītāṃśuśītalam

vyāghracarmāmbaradharaṃ nāgayajñopavītinam //
sarvālaṃkārasaṃyuktaṃ vidyutpiṅgajaṭādharam

nīlakaṇṭhaṃ vyāghracarmottarīyaṃ candraśekharam /
nānāvidhāyudhodbhāsidaśabāhuṃ trilocanam

yuvānaṃ puruṣaśreṣṭhaṃ saccidānandavigraham

tatraiva ca sukhāsīnāṃ pūrṇacandranibhānanām //
nīlendīvaradāmābhāmudyanmarakataprabhām

muktābharaṇasaṃyuktāṃ rātriṃ tārācitāmiva /
vindhyakṣitidharottuṅgakucabhārabharālasām

sadasatsaṃśayāviṣṭamadhyadeśāntarāṃ varām /
divyābharaṇasaṃyuktāṃ divyagandhānulepanām

divyamālyāmbaradharāṃ nīlendīvaralocanām /
alakodbhāsivadanāṃ tāmbūlagrāsaśobhitām

śivāliṅganasaṃjātapulakodbhāsivigrahām /
saccidānandarūpāḍhyāṃ jaganmātaramambikām


saundaryasārasaṃdohāṃ dadarśa raghunandanaḥ/
svasvavāhanasaṃbaddhānnānāyudhalasatkarān

bṛhadrathantarādīni sāmāni parigāyataḥ //
svasvakāntāsamāyuktāndikpālānparitaḥ sthitān

agragaṃ garuḍārūḍhaṃ śaṅkacakragadādharam /
kālāmbudapratīkāśaṃ vidyutkāntaśriyā yutam

japantamekamanasā rudrādhyāyaṃ janārdanam /
paścāccaturmukhaṃ devaṃ brahmāṇaṃ haṃsavāhanam

caturvaktraiścaturvedarudrasūktairmaheśvaram /
stuvantaṃ bhāratīyuktaṃ dīrghakūrcaṃ jaṭādharam

atharvaśirasā devaṃ stuvantaṃ munimaṇḍalam /
gaṅgāditaṭinīyuktamambudhiṃ nīlavigraham

śvetāśvataramantreṇa stuvantaṃ girijāpatim /
anantādimahānāgānkailāsagirisaṃnibhān

kaivalyopaniṣatpāṭhānmaṇiratnavibhūṣitān/
suvarṇavetrahastāḍhyaṃ nandinaṃ purataḥ sthitam

dakṣiṇe mūṣakārūḍhaṃ gaṇeśaṃ parvatopamam /
mayūravāhanārūḍhamuttare ṣaṇmukhaṃ tathā

mahākālaṃ ca caṇḍeśaṃ pārśvayorbhīṣaṇākṛtim /
kālāgnirudraṃ dūrasthaṃ jvaladdāvāgnisaṃnibham

tripādaṃ kuṭilākāraṃ naṭadbhṛṅgiriṭiṃ puraḥ /
nānāvikāravadanānkoṭiśaḥ pramathādhipān

nānāvāhanasaṃyuktaṃ parito mātṛmaṇḍalam /
pañcākṣarījapāsaktānsiddhavidyādharādikān

divyarudrakagītāni gāyatkinnaravṛndakam /
tatra traiyambakaṃ mantraṃ japaddvijakadambakam

gāyantaṃ vīṇayā gītaṃ nṛtyantaṃ nāradaṃ divi //
nṛtyato nāṭyanṛtyena rambhādīnapsarogaṇān

gāyaccitrarathādīnāṃ gandharvāṇāṃ kadambakam //
kambalāśvatarau śaṃbhukarṇakuṇḍalatāṃ gatau

gāyantau pannagau gītaṃ kapālaṃ kambalaṃ tathā /
evaṃ devasabhāṃ dṛṣṭvā kṛtārtho raghunandanaḥ

harṣagadgadayā vācā stuvandevaṃ maheśvaram /
divyanāmasahasreṇa praṇanāma punaḥpunaḥ