Scripture Library

Sārdhatriśatikālottarāgama · Chapter 9

9.1

abhiṣekaṃ pravakṣyāmi saṃkṣepānna tu vistarāt
hitāya sādhakendrāṇāṃ parameśena bhāṣitam //

9.2

mṛṇmayaṃ kalaśaṃ hyekaṃ candanena vilepitam
brahmapatrapuṭaṃ vātha padmapatramathāpi vā //

9.3

sarvauṣadhiyutaṃ kṛtvā sarvagandhopaśobhitam
śatamaṣṭottaraṃ japtvā prāsādaṃ sarvatomukham //

9.4

yāgaṃ kṛtvā tu pūrvoktam abhiṣekaṃ tu kārayet
śubhanakṣatradivase muhūrte karaṇānvite //

9.5

bahumaṅgalanirghoṣaiḥ śaṅkhavāditraniḥsvanaiḥ
brahmaghoṣaiśca vividhair nṛttagītasamanvitaiḥ
anujñāto 'bhiṣiktaśca ācāryaḥ pāśahā bhavet //

Original text: Sārdhatriśatikālottarāgama · Edition: N.R. Bhatt: Sardhatrisatikalottaragama, avec le commentaire de Bhatta Ramakantha. Pondicherry : Institut Francais d'Indologie 1979. (Publications de l'Institut Francais d'Indologie, 61) · Data entry Dominic Goodall · GRETIL (Göttingen) · CC BY-NC-SA 4.0