સાર્ધત્રિશતિકાલોત્તરાગમ · અધ્યાય 9

અભિષેકં પ્રવક્ષ્યામિ સંક્ષેપાન્ન તુ વિસ્તરાત્
હિતાય સાધકેન્દ્રાણાં પરમેશેન ભાષિતમ્ ॥

મૃણ્મયં કલશં હ્યેકં ચન્દનેન વિલેપિતમ્
બ્રહ્મપત્રપુટં વાથ પદ્મપત્રમથાપિ વા ॥

સર્વૌષધિયુતં કૃત્વા સર્વગન્ધોપશોભિતમ્
શતમષ્ટોત્તરં જપ્ત્વા પ્રાસાદં સર્વતોમુખમ્ ॥

યાગં કૃત્વા તુ પૂર્વોક્તમ્ અભિષેકં તુ કારયેત્
શુભનક્ષત્રદિવસે મુહૂર્તે કરણાન્વિતે ॥

બહુમઙ્ગલનિર્ઘોષૈઃ શઙ્ખવાદિત્રનિઃસ્વનૈઃ
બ્રહ્મઘોષૈશ્ચ વિવિધૈર્ નૃત્તગીતસમન્વિતૈઃ
અનુજ્ઞાતો ઽભિષિક્તશ્ચ આચાર્યઃ પાશહા ભવેત્ ॥