Sārdhatriśatikālottarāgama · Chapter 8

atha dīkṣāṃ pravakṣyāmi pañcatattvavyavasthitām
pṛthivyāpastathā tejo vāyurākāśameva ca //

pañcaitāni ca tattvāni yairvyāptamakhilaṃ jagat
sarvatattvāni tatraiva draṣṭavyāni tu sādhakaiḥ //

brahmāṇḍe tu nivṛttirvai śatarudrāvadhistathā
tadūrdhvaṃ tu pratiṣṭhā syād yāvadavyaktagocaram //

tato vidyā niyuktā sā yāvadvidyeśvarāntikam
śāntistadūrdhvamadhvānte śaktireva śive pade //

ajñātvaitāni tattvāni yo dīkṣāṃ kartumicchati
vṛthā pariśramastasya naiva tatphalamāpnuyāt //

nivṛttiḥ pṛthivī jñeyā pratiṣṭhā āpa ucyate
vidyāṃ tejo vijānīyād vāyuḥ śāntiḥ prakīrtitaḥ //

śāntyatītā bhavedvyoma tatparaṃ śāntamavyayam
taṃ viditvā mahāsena śvapacānapi dīkṣayet //

nivṛttiṃ hṛdayenaiva pratiṣṭhāṃ śirasā guruḥ
śivo vidyāṃ tu śikhayā śāntiṃ vai kavacena tu //

śāntyatītaṃ paraṃ vyoma prāsādena tu homayet
ekaikasya śataṃ homyam ityevaṃ pañca homayet //

pañcapūrṇāhutīrdadyāt prāsādena tu ṣaṇmukha
prāyaścittaviśuddhyartham aṣṭāvekaikayāhutīḥ //

astrabījena mantrajño homayedanupūrvaśaḥ
evaṃ samāpyate dīkṣā jananādivivarjitā //

hutenaiva tu mucyante sādhakā janmabandhanāt
iyamiṣṭirna prakāśyā gopanīyā prayatnataḥ //

rahasyaṃ sarvatantrāṇām eṣa saṃskāra uttamaḥ
yoninyāsādikaṃ karmod dhāraṇaṃ cāpyapaścimam //

śodhanānukramaṃ deva kathayasva yathāvidhi
daśa sapta ca ye śodhyāḥ pṛṣṭāścātra tvayā guha //

yasya yadbījamuktaṃ tu tadvakṣyāmyanupūrvaśaḥ
yonibījaṃ tu hṛdaye kalpayecca yathākramam //

arcanaṃ prokṣaṇaṃ caiva tāḍanaṃ ca tathā param
saṃdhānaṃ caiva saṃyogaṃ nikṣepaṃ tadanantaram //

arcanaṃ ca tataḥ kuryād garbhādhānaṃ tathaiva ca
jananaṃ cādhikāraṃ ca bhogaṃ caiva layaṃ tathā //

svatattve cāhutiśataṃ hṛdayena tu ṣaṇmukha
pāśacchedaṃ tathāstreṇa dadyātpūrṇāhutiṃ tataḥ //

hṛdayenātra tūddhāraḥ kartavyaścāpyanukramāt
uddhāre prokṣaṇe caiva tāḍane ca tathaiva ca //

humphaṭkārasamāyuktaṃ kartavyaṃ cānupūrvaśaḥ
saṃdhānaṃ caiva tattvānāṃ kartavyaṃ tu yathākramam //

tattve tattve tvidaṃ karma eṣa eva vidhikramaḥ
ebhistu śodhitairvatsa vidhiṃ prāpnoti puṣkalam //

anyathā naiva mucyante vidhihīnāḥ ṣaḍānana
pūrṇāhutipradānaṃ ca kartavyaṃ dhāraṇāyutam //

amṛtaṃ yatparaṃ vatsa sravantaṃ manasā smaret
dīkṣāprakaraṇe hyetad yojyaṃ sarvatra sarvadā //

liṅgoddhāravidhāne ca nityasaṃskārakarmasu
paśorgrahaṇamokṣaṃ tu yattvayoktaṃ purānagha //

pāśā ābhyantarā bāhyāḥ kamsinsthāne kathaṃ sthitāḥ
kasminsthāne tu vicchedyāḥ sadya utkramaṇaṃ katham //

paśūnāṃ caiva nirdeśaṃ kathayasva maheśvara
ādimasya dvitīyena gṛhītvātmānamātmanā //

muṣṭinā yāvatsthānaṃ tan nayettaṃ suvicakṣaṇaḥ
viṣuvatsamprayogeṇa brahmādyāste śivāntakāḥ //

ekatra samatāṃ yānti anyathā tu pṛthakpṛthak
dvādaśānte tu te cchedyāḥ śareṇāstreṇa saṃyutāḥ //

tadā sāyujyatāṃ yānti samayaiḥ parivarjitāḥ
anirdiṣṭamasaṃjñaṃ ca yatkṛtaṃ tadvṛthā bhavet //

tamuddiśya kṛtaṃ karma mokṣadaṃ tanna saṃśayaḥ
sūryasya grahaṇe vatsa viṣuvadyogasaṃyutam //

āyāmānte yadā cchinnaṃ tadā cotkramate dhruvam
manasi grathitāḥ pāśāḥ sūtre maṇigaṇā iva //

hṛtpadmādyāvattatpadmaṃ manastantuvitānitam
taddṛṣṭvā chedanaṃ kuryān manovṛttyā manaścchidā //

manasā manasi cchinne jīvaḥ kevalatāṃ vrajet
vistaraṃ tyaja deveśa saṃkṣepātkathayasva me //

yena vijñātamātreṇa paśūnmocayate kṣaṇāt
śṛṇu ṣaṇmukha tattvena yena mokṣo dhruvaṃ bhavet //

prayogeṇātisūkṣmeṇa yogadṛṣṭena mantravit
divyena yogamārgeṇa śaktiṃ yaḥ prerayettu tām //

taṃ viditvā mahāsena jīvaṃ prāṇamayaṃ budhaḥ
viṣuvatsamprayogeṇa yojayecchāśvate pade //

yogaṃ tu viṣuvaṃ prāpya ko na mucyeta bandhanāt
pṛthivyādyabjanāḍīrvai śabdādiguṇavāyubhiḥ //

ātmādhidevatā mantrāñ jñātvā muktastu mocayet
nāḍīvivarasambandhā ūrdhvanālā hyadhomukhāḥ //

granthidvayayutāḥ sarve humphaḍantena yojitāḥ
tataścordhvatvamāyānti udghātaiḥ pūrvavadguha //

kṣmādyānālokya manasā sabāhyābhyantaraṃ punaḥ
tattve tattve niyoktavyā viyuktā nirahaṃkṛtā //

brahmādyāñśrāvayedvatsa na punarjanmatāṃ vrajet
tejaśceto dvirabhyasya āyāmo bhāskarasya tu //

tāḍayitvā purā vatsa grahaṇaṃ pūrvavadbhavet
bhittvārgalāṃ nyasedyoniṃ tattvaṃ tattvena saṃdhayet
śaktibhiḥ sampuṭīkṛtya vauṣaḍantena nikṣipet //