Sārdhatriśatikālottarāgama · Chapter 7

ataḥ paraṃ pravakṣyāmi maṇḍalaṃ sārvakāmikam
bhūmiśodhanaṃ kṛtvā śāstradṛṣṭena karmaṇā //

adhivāsaṃ tataḥ kṛtvā nakṣatre guruṇānvite
ālikhenmaṇḍalaṃ prājñaḥ sarvasiddhipradaṃ śubham //

sūtreṇa sumitaṃ kṛtvā caturaśraṃ samantataḥ
madhye padmaṃ pratiṣṭhāpyam aṣṭapatra sakarṇikam //

ekahastaṃ dvihastaṃ vā caturhastamathāpi vā
svatantravihitaṃ prājño likhedāvaraṇatrayam //

vāhayetpaścimadvāram ācāryaḥ susamāhitaḥ
āgneyyāṃ kārayetkuṇḍaṃ hastamātrapramāṇataḥ //

yajñakarmavidhiṃ kuryāt susamiddhe hutāśane
pūrvādārabhya vaktrādīn vinyasedanupūrvaśaḥ //

pavitrāṇi purā nyasya śivāṅgāni nyasettataḥ
āgneyyāṃ hṛdayaṃ nyasya aiśānyāṃ tu śirastathā //

nairṛtyāṃ tu śikhā jñeyā kavacaṃ vāyugocare
astra dikṣvatha vinyasya karṇikāyāṃ sadāśivam //

garbhanyāsavidhiḥ prokto dvitīyāvaraṇe śṛṇu
hṛdā pūrvaṃ samārabhya lokapālānprapūjayet //

[tṛtīyāvaraṇe 'strāṇi svamantreṇa prapūjayet|]
saṃkṣepeṇa mayā skanda vidhānaṃ parikīrtitam //

anuktaṃ yadbhavetkiṃcit tatsarvaṃ mūlamāśrayet
evaṃ vidhividhānajño dīkṣākarma samācaret //