સાર્ધત્રિશતિકાલોત્તરાગમ · અધ્યાય 7

અતઃ પરં પ્રવક્ષ્યામિ મણ્ડલં સાર્વકામિકમ્
ભૂમિશોધનં કૃત્વા શાસ્ત્રદૃષ્ટેન કર્મણા ॥

અધિવાસં તતઃ કૃત્વા નક્ષત્રે ગુરુણાન્વિતે
આલિખેન્મણ્ડલં પ્રાજ્ઞઃ સર્વસિદ્ધિપ્રદં શુભમ્ ॥

સૂત્રેણ સુમિતં કૃત્વા ચતુરશ્રં સમન્તતઃ
મધ્યે પદ્મં પ્રતિષ્ઠાપ્યમ્ અષ્ટપત્ર સકર્ણિકમ્ ॥

એકહસ્તં દ્વિહસ્તં વા ચતુર્હસ્તમથાપિ વા
સ્વતન્ત્રવિહિતં પ્રાજ્ઞો લિખેદાવરણત્રયમ્ ॥

વાહયેત્પશ્ચિમદ્વારમ્ આચાર્યઃ સુસમાહિતઃ
આગ્નેય્યાં કારયેત્કુણ્ડં હસ્તમાત્રપ્રમાણતઃ ॥

યજ્ઞકર્મવિધિં કુર્યાત્ સુસમિદ્ધે હુતાશને
પૂર્વાદારભ્ય વક્ત્રાદીન્ વિન્યસેદનુપૂર્વશઃ ॥

પવિત્રાણિ પુરા ન્યસ્ય શિવાઙ્ગાનિ ન્યસેત્તતઃ
આગ્નેય્યાં હૃદયં ન્યસ્ય ઐશાન્યાં તુ શિરસ્તથા ॥

નૈરૃત્યાં તુ શિખા જ્ઞેયા કવચં વાયુગોચરે
અસ્ત્ર દિક્ષ્વથ વિન્યસ્ય કર્ણિકાયાં સદાશિવમ્ ॥

ગર્ભન્યાસવિધિઃ પ્રોક્તો દ્વિતીયાવરણે શૃણુ
હૃદા પૂર્વં સમારભ્ય લોકપાલાન્પ્રપૂજયેત્ ॥

[તૃતીયાવરણે ઽસ્ત્રાણિ સ્વમન્ત્રેણ પ્રપૂજયેત્।]
સંક્ષેપેણ મયા સ્કન્દ વિધાનં પરિકીર્તિતમ્ ॥

અનુક્તં યદ્ભવેત્કિંચિત્ તત્સર્વં મૂલમાશ્રયેત્
એવં વિધિવિધાનજ્ઞો દીક્ષાકર્મ સમાચરેત્ ॥