Sārdhatriśatikālottarāgama · Chapter 5
yajanaṃ saṃpravakṣyāmi yathāvidhyanupūrvaśaḥ
bījāṅkuraṃ purā śaktyā paścādānantamāsanam //
anantaṃ cāntagaṃ kuryāt krameṇaiva ṣaḍānana
hṛdayaṃ karṇikā padmaṃ dharmaṃ jñānādimeva ca //
vairāgyaṃ ca tathaiśvaryam īśāntaṃ vahnito nyaset
śaktibhiḥ kesaravyūhaṃ hṛdayena ca kalpayet //
āvāhayettato devaṃ hṛdayena tu ṣaṇmukha
sthāpanaṃ pādyamarghyaṃ ca tathācamanameva ca //
snapanaṃ pūjanaṃ caiva hṛdayena tu kārayet
uktānuktaṃ ca yatkiñcit tatsarvaṃ hṛdayena tu //
ekāvaraṇametattu sarvakāmārthasādhanam
sarvatantreṣu sāmānyaṃ sarvajñāneṣu cottamam //
Original text: Sārdhatriśatikālottarāgama · Edition: N.R. Bhatt: Sardhatrisatikalottaragama, avec le commentaire de Bhatta Ramakantha. Pondicherry : Institut Francais d'Indologie 1979. (Publications de l'Institut Francais d'Indologie, 61) · Data entry Dominic Goodall · GRETIL (Göttingen) · CC BY-NC-SA 4.0