Sārdhatriśatikālottarāgama · Chapter 3

ataḥ paraṃ pravakṣyāmi snānaṃ pāpaharaṃ śubham
sakṛjjaptena saṃgṛhya mṛdā astreṇa mantravit //

malasnānaṃ purā kṛtvā sakṛjjaptvā tu saṃhitām
tāmeva mṛttikāṃ paścād abhimantrya sakṛtsakṛt //

bhāgatrayaṃ tataḥ kṛtvā ekamastreṇa mantrayet
dvitīyaṃ brahmabhirvatsa śivajaptaṃ tṛtīyakam //

astrajaptena bhāgena diśāṃ bandhaṃ tu kārayet
śivajaptena tīrthaṃ tu brahmajaptena vigraham //

kuṇṭhayitvā tataḥ snāyāc chivatīrthasya madhyataḥ
cakravatyupacāreṇa sugandhāmalakādibhiḥ //

upaspṛśya vidhānena saṃdhyāṃ vandeta sādhakaḥ
mantraiḥ sarvaiḥ sakṛdvatsa upasthānaṃ tu kārayet //

abhiṣekaṃ purā kṛtvā tataḥ saṃdhyāṃ samācaret
astraṃ na yojayeddehe kṣipettadbahireva ca //

śarīraṃ śoṣayedvatsa tenātmani na yojayet
vighneṣu pāśajāleṣu sadā yojyaṃ vicakṣaṇaiḥ //

hṛdayena tato vidvān pitṛdevāṃśca tarpayet
saṃhāraṃ tasya tīrthasya prāsādenaiva kārayet //