સાર્ધત્રિશતિકાલોત્તરાગમ · અધ્યાય 3

અતઃ પરં પ્રવક્ષ્યામિ સ્નાનં પાપહરં શુભમ્
સકૃજ્જપ્તેન સંગૃહ્ય મૃદા અસ્ત્રેણ મન્ત્રવિત્ ॥

મલસ્નાનં પુરા કૃત્વા સકૃજ્જપ્ત્વા તુ સંહિતામ્
તામેવ મૃત્તિકાં પશ્ચાદ્ અભિમન્ત્ર્ય સકૃત્સકૃત્ ॥

ભાગત્રયં તતઃ કૃત્વા એકમસ્ત્રેણ મન્ત્રયેત્
દ્વિતીયં બ્રહ્મભિર્વત્સ શિવજપ્તં તૃતીયકમ્ ॥

અસ્ત્રજપ્તેન ભાગેન દિશાં બન્ધં તુ કારયેત્
શિવજપ્તેન તીર્થં તુ બ્રહ્મજપ્તેન વિગ્રહમ્ ॥

કુણ્ઠયિત્વા તતઃ સ્નાયાચ્ છિવતીર્થસ્ય મધ્યતઃ
ચક્રવત્યુપચારેણ સુગન્ધામલકાદિભિઃ ॥

ઉપસ્પૃશ્ય વિધાનેન સંધ્યાં વન્દેત સાધકઃ
મન્ત્રૈઃ સર્વૈઃ સકૃદ્વત્સ ઉપસ્થાનં તુ કારયેત્ ॥

અભિષેકં પુરા કૃત્વા તતઃ સંધ્યાં સમાચરેત્
અસ્ત્રં ન યોજયેદ્દેહે ક્ષિપેત્તદ્બહિરેવ ચ ॥

શરીરં શોષયેદ્વત્સ તેનાત્મનિ ન યોજયેત્
વિઘ્નેષુ પાશજાલેષુ સદા યોજ્યં વિચક્ષણૈઃ ॥

હૃદયેન તતો વિદ્વાન્ પિતૃદેવાંશ્ચ તર્પયેત્
સંહારં તસ્ય તીર્થસ્ય પ્રાસાદેનૈવ કારયેત્ ॥