Sārdhatriśatikālottarāgama · Chapter 2

antaḥkaraṇavinyāso bhūtaśuddhistathaiva ca
bhūtaśuddhiṃ purā kṛtvā tato 'ntaḥkaraṇaṃ kuru //

hṛdbījaṃ pārthive yuktaṃ pārthivīṃ dhārayetkramāt
śiro 'psu tejasi śikhāṃ kavacaṃ vāyunā saha //

astraṃ ca śivasaṃyuktam ākāśaṃ dhārayetsadā
huṃphaḍantena paṭalaṃ bhittvā cordhvaṃ viśeṣataḥ //

pañcodghātāśca catvāras trayo dvāveka eva ca
dvādaśānte nirālambaṃ vijñānaṃ kevalaṃ sthitam //

dīkṣāyāṃ tu yathā vatsa tatprayogaṃ samācaret
prakriyāntasthamamṛtaṃ sravantaṃ cintayettataḥ //

omityanena kamalaṃ yogapīṭhaṃ tadā bhavet
sūryamaṇḍalasaṃkāśam akāraṃ hyātmasambhavam //

vidyātattvamukāraṃ tu śivatattvaṃ makārajam
puryaṣṭakaṃ ca tanmātraṃ turyātītaṃ sadāśivam //

cintayetparamaṃ dhāma suṣumnābhinnamastakam
tenāplāvitamātmānaṃ paripūrṇaṃ vicintayet //

yo 'bhasedīdṛśaṃ martyaḥ samādhiṃ mṛtyunāśanam
na tasya jāyate mṛtyur iti śāstrasya niścayaḥ //

paścādguroḥ sādhakānāṃ mūrtestu grahaṇaṃ bhavet
īśānādyāstu sadyāntaṃ mūrdhna ārabhya vinyaset //

netraṃ dattvā tadāvāhyo devadevaḥ sadāśivaḥ
sarvajñaṃ ca tadātmānaṃ cintayettu vicakṣaṇaḥ //

hṛdayaṃ ca śiraścaiva śikhāṃ kavacameva ca
nyasedastraṃ ca mantrajño yathāsthāneṣvanukramāt //

hṛdaye 'rcāvidhānaṃ tu nābhau homaṃ prakalpayet
lalāṭe tvīśvaraṃ dhyāyed varadaṃ sarvatomukham //

yathārcane tathāgnau ca dhyāne snāne tathaiva ca
yathā deve tathā dehe cintayettu vicakṣaṇaḥ //

kṛtvāntaḥkaraṇaṃ hyevaṃ paścādbāhyaṃ tu ṣaṇmukha
sabāhyantaraṃ kṛtvā paścādyajanamārabhet //