सार्धत्रिशतिकालोत्तरागम · अध्याय 3

अतः परं प्रवक्ष्यामि स्नानं पापहरं शुभम्
सकृज्जप्तेन संगृह्य मृदा अस्त्रेण मन्त्रवित् ॥

मलस्नानं पुरा कृत्वा सकृज्जप्त्वा तु संहिताम्
तामेव मृत्तिकां पश्चाद् अभिमन्त्र्य सकृत्सकृत् ॥

भागत्रयं ततः कृत्वा एकमस्त्रेण मन्त्रयेत्
द्वितीयं ब्रह्मभिर्वत्स शिवजप्तं तृतीयकम् ॥

अस्त्रजप्तेन भागेन दिशां बन्धं तु कारयेत्
शिवजप्तेन तीर्थं तु ब्रह्मजप्तेन विग्रहम् ॥

कुण्ठयित्वा ततः स्नायाच् छिवतीर्थस्य मध्यतः
चक्रवत्युपचारेण सुगन्धामलकादिभिः ॥

उपस्पृश्य विधानेन संध्यां वन्देत साधकः
मन्त्रैः सर्वैः सकृद्वत्स उपस्थानं तु कारयेत् ॥

अभिषेकं पुरा कृत्वा ततः संध्यां समाचरेत्
अस्त्रं न योजयेद्देहे क्षिपेत्तद्बहिरेव च ॥

शरीरं शोषयेद्वत्स तेनात्मनि न योजयेत्
विघ्नेषु पाशजालेषु सदा योज्यं विचक्षणैः ॥

हृदयेन ततो विद्वान् पितृदेवांश्च तर्पयेत्
संहारं तस्य तीर्थस्य प्रासादेनैव कारयेत् ॥