Sārdhatriśatikālottarāgama · Chapter 22

prāsādaḥ kīdṛśo jñeyo vyāptistasya ca kīdṛśī
śarīraṃ kīdṛśaṃ tasya kathayasva maheśvara //

prāsādaṃ yo na jānāti pañcamantramahātanum
aṣṭatriṃśatkalopetaṃ nāsāvācārya ucyate //

prāsādaṃ samyagajñātvā yo dīkṣāṃ kurute guruḥ
adhastācchiṣyamātmānaṃ nayatyatra na saṃśayaḥ //

prāsādābjaśikhāntastho yastu dīkṣāṃ karoti saḥ
ācāryaḥ saha śiṣyeṇa śivasāyujyamāpnuyāt //

brahmā viṣṇuśca rudraśca indraścandro bṛhaspatiḥ
prajāpatistathādityaḥ śukraḥ skando bhṛgustathā //

ye cānye prāṇino devāḥ sarve proktāḥ prasādajāḥ
ete cānye ca bahavo munayaḥ saṃśitavratāḥ //

dhyāyanti paramaṃ haṃsaṃ prāsādaṃ nāmarūpataḥ
vibhāgaṃ cāsya vakṣyāmi yaṃ dhyātvāmṛtamaśnute //

sadyaḥ kalāṣṭasaṃyuktam akārākṣarajaṃ viduḥ
vidyādukārajaṃ vāmam aghoraṃ ca makārajam //

bindujaḥ puruṣo jñeya īśānastu śikhātmajaḥ
evaṃ mantrāstu pañcaite prāsādātsambhavanti ye //

daśakoṭiḥ sahasrāṇāṃ mantrāṇāmamitaujasām
iṣṭena tu prasādena sarva iṣṭā na saṃśayaḥ //

mārutā nava śaktyādyā ye mantrāḥ parikīrtitāḥ
prāsādābjasamutpannāḥ sarve cāmoghaśaktayaḥ //

sadyastu pṛthivī jñeyo vāmo hyāpaḥ prakīrtitaḥ
aghorasteja ityukto vāyustatpuruṣaḥ smṛtaḥ //

ākāśastu bhavedīśaḥ svayaṃ devo maheśvaraḥ
sadyojātastu ṛgvedo vāmadevo yajuḥ smṛtaḥ //

aghoraḥ sāmavedaḥ syād atharvaḥ puruṣaḥ smṛtaḥ
pañcamastu paraḥ sūkṣmo vyomavyāpī sadāśivaḥ //

sadyojātastu vai brahmā vāmo viṣṇuḥ prakīrtitaḥ
aghoro rudradaivatya īśvaraḥ puruṣaḥ smṛtaḥ //

īśānaḥ śivadaivatyo hṛdayādāvavasthitaḥ
ṣaṣṭhaṃ tu yatparaṃ tattvam asādṛśyaguṇaiḥ sthitam //

tasya deho na vaktavyaḥ prākṛtairguṇasambhavaiḥ
jñātvā paramaniḥśreṇīṃ pañcasaṃsthānagāminīm //

jñātameva sakṛdyena vistṛtaṃ tu tadeva tat
tatkāla eva mukto 'sau yadā jñātaṃ hi tatpadam //