Sārdhatriśatikālottarāgama · Chapter 21

ataḥ paraṃ pravakṣyāmi aṣṭadhā pratyayo yathā
anagnijvalanaṃ caiva vṛkṣasyālabhanaṃ tathā //

pāśānāṃ stobhanaṃ caiva mahāpātakanāśanam
viṣasaṃharaṇaṃ caiva nirbījakaraṇaṃ tathā //

grahajvaravināśaśca pratyayo 'ṣṭavidhaḥ smṛtaḥ
evaṃ jñātvā tu vidhivat khyātiḥ sarvatra jāyate //

praṇavenāgnimadhyastho hakāro hrīṃ tathaiva ca
ādiroṃ ca namaścānte anagnijvalane hitam //

agniṃ srotasi saṃyojya sahasrodghātasaṃyutam
pañcākṣaraprayogeṇa jvalatyeva na saṃśayaḥ //

oṃkāraḥ sarvato 'dhastād rephastasyordhvataḥ sthitaḥ
pūrvavatsamprayukto 'yaṃ prayogo bhuvi durlabhaḥ //

śataiḥ saptabhirudghātair ālabdho mriyate drumaḥ
bhūyasścāpyāyanaṃ tasya vāruṇe srotasi sthitam //

sa jīvati punarvṛkṣo yathāpūrvaṃ tathaiva saḥ
tādṛgeva punaścāsau kiṃ tu rephavivarjitaḥ //

āpyāyanavidhau hyeṣa pañcadhā bindudīpitaḥ
aukāramadhyasaṃyuktaḥ praṇavenāntadīpitaḥ //

īkārādiḥ sa hau madhye vahnimadhyaṃ tataḥ param
prayogo viṣuvatkāle pāśānāṃ stobhakārakaḥ //

śataiḥ pañcabhirudghātaiḥ patatyeva na saṃśayaḥ
punaścotthāpanaṃ tasya yathā bhavati tacchṛṇu //

īkārādyantasaṃyuktaṃ hau ca madhye niyojitam
prāṇānusvārasandīptaṃ namo 'ntaṃ praṇavaṃ punaḥ //

utthāpane prayuñjīta sarvabhūteṣu tattvavit
tāvadbhireva codghātair yojanīyaḥ prayatnataḥ //

labījaṃ jīvasaṃviṣṭaṃ hakārādyantasaṃsthitam
pūrvavanmadhyasaṃsthaṃ ca vāyubindusamanvitam //

yadasyārohaṇe proktaṃ gurutvaṃ jāyate yathā
bhūya eva pravakṣyāmi laghutvaṃ jāyate yathā //

oṃkāro haṃ yakāreṇa hyaukāro haṃ namastathā
tulāpuruṣayogo 'yam udghātairayutena tu //

sa hakāro vakāreṇa yakāreṇa ca dīpitaḥ
hyau madhye hlīṃ namaścānte vāruṇena tu buddhimat //

udghātāṣṭaśatenaiva viṣaṃ saṃharati dhruvam
yathāgnijvalane dṛṣṭo nirbījakaraṇe tathā //

śataiḥ pañcabhirudghātair viśeṣo 'tra vidhīyate
oṃkāramāditaḥ kṛtvā hrūṃkāraṃ tadanantaram //

hrauṃ hrūṃ ca phaṇṇamaścānte grahāṇāṃ nāśane mataḥ
prayoge vāruṇe mārge udghātāṣṭaśatena tu //

praṇavādi tato huṃ phaṭ huṃ phaṭ huṃ phaṭ tathaiva ca
phaṭ phaṭ phaṭ phaṭ phaḍevaṃ syād vāruṇena tu buddhimān
udghātāṣṭaśatenaiva kṣipraṃ nāśayati jvaram //